ଲକ୍ଷ୍ମୀପୁର: କୋରାପୁଟ ଜିଲା ଲକ୍ଷ୍ମୀପୁର ବ୍ଲକ ସଦର ମହକୁମାରେ ଥିବା କେତେକ ହୋଟେଲ ସହିତ ଦୋକାନ ଉପରେ ଶ୍ରମବିଭାଗ ପକ୍ଷରୁ ଗୁରୁବାର ଚଢାଉ କରାଯାଇ ବେନିୟମ ଭାବେ ଶିଶୁ ଶ୍ରମିକମାନଙ୍କୁ ଖଟାଉଥିବା ଅଭିଯୋଗରେ ତିନି ଜଣଙ୍କ ନାମରେ ମାମଲା ରୁଜ୍ଜୁ ହୋଇଛି । ଜିଲା ଶ୍ରମ ଅଧିକାରୀ ବିମଲ ସେଠୀ ଓ ସହକାରୀ ଶ୍ରମ ଅଧିକାରୀ ବୁଲୁ ଶ୍ରୀହରିଙ୍କ ସହିତ ଶିଶୁ କଲ୍ୟାଣ କମିଟି ସଦସ୍ୟ ମିଳିତ ଚଢାଉ ବେଳେ ବସଷ୍ଟାଣ୍ଡ ନିକଟରେ ଥିବା ସୁଶାନ୍ତ କୁମାର ଚୌଧୁରୀ, ନୀଳମଣି ସ୍ବାଇଁଙ୍କ ତେଜରାତି ଦୋକାନ ଓ ରାମଚନ୍ଦ୍ର ବିଷୋଇଙ୍କ ଫାଷ୍ଟଫୁଡ୍ ଦୋକାନରେ ବେଆଇନ୍ ଭାବେ ଶିଶୁ ଶ୍ରମିକ ରଖାଯାଇ କାମ କରାଯାଉଥିବା ବେଳେ ସେମାନଙ୍କୁ ଉଦ୍ଧାର କରାଯାଇଥିଲା । ତିନି ଜଣଙ୍କ ମଧ୍ୟରେ ଗଞ୍ଜାମ ଜିଲାର ଜଣେ ଥିବାବେଳେ ଲକ୍ଷ୍ମୀପୁର ବ୍ଲକର ବୁର୍ଜା ପଞ୍ଚାୟତର ମାତ୍ଲାମ୍ବା ଗ୍ରାମର ଜଣେ ଏବ ଦଶମନ୍ତପୁର ବ୍ଲକର ପୋଡାଗଡ ନିକଟରେ ଜଣଙ୍କ ଘର ବୋଲି ଜଣାପଡ଼ିଛି । ସରକାର ଶିଶୁ ଶ୍ରମିକ ଉଚ୍ଛେଦ ପାଇଁ ବିଶେଷକରି ଅନୁସୂଚିତ ଜନଜାତି ଓ ଜାତି ବର୍ଗର ପିଲାମାନଙ୍କ ପାଇଁ ମାଗଣାରେ ହଷ୍ଟେଲରେ ରହି ପାଠ ପଢିବା ବ୍ୟବସ୍ଥା ଥିବାବେଳେ ସେମାନେ ହୋଟେଲଠାରୁ ଆରମ୍ଭ କରି ଗ୍ୟାରେଜ୍ ଆଦି ବିଭିନ୍ନ ସ୍ଥାନରେ ବିପଦସଙ୍କୁଳ ଭାବେ କାମ କରୁଛନ୍ତି ।
ସେହିପରି ଚଢାଉ ସମ୍ବନ୍ଧରେ ଖବର ପାଇ ଅନେକ ଯେଉଁମାନେ କି ସାନ ପିଲାଙ୍କୁ ରଖି କାମ କରୁଥିଲେ ସେମାନଙ୍କୁ ଲୁଚାଇ ଦେଇଥିବାବେଳେ କିଛି ସେମାନଙ୍କ ଦୋକାନ ବନ୍ଦ କରି ଦେଇଥିବା ଦେଖିବାକୁ ମିଳିଥିଲା । ଏହି ଚଢାଉର ଲକ୍ଷ୍ମୀପୁର ଥାନା ପୁଲିସର ସହାୟତା ନିଆଯାଇଥିଲା । ସେହିପରି ସମସ୍ତଙ୍କୁ କୋରାପୁଟ ଶିଶୁ କଲ୍ୟାଣ କମିଟି ଜିମା ଦିଆଯିବା ସହିତ ସେମାନଙ୍କ ଅଭିଭାବକ ଆସିଲା ପରେ ଯେକୌଣସି ନିଷ୍ପତ୍ତି ନିଆଯିବ ଓ ଯଦି ସମ୍ପୃକ୍ତ ଉଦ୍ଧାର ପିଲାମାନଙ୍କ ବୟସ ୧୪ ବର୍ଷରୁ କମ୍ ହୋଇଥିବ ତେବେ ଯେଉଁମାନେ ଏମାନଙ୍କୁ ରଖି କାମ କରାଉଥିଲେ ସେମାନଙ୍କ ନାଁରେ ମକଦ୍ଦମା ରୁଜ୍ଜୁ କରାଯିବ ବୋଲି ଶ୍ରୀ ସେଠୀ ପ୍ରକାଶ କରିଛନ୍ତି ।
Comments are closed.