ନୂଆଦିଲ୍ଲୀ : କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ମୁହଁ ଏବଂ କଂଗ୍ରେସୀ ନୀତିକୁ ସେ ପସନ୍ଦ କରନ୍ତି ନାହିଁ ବୋଲି ଗାୟତ୍ରୀ ପରିବାର ପ୍ରମୁଖ ପ୍ରଣବ ପାଣ୍ଡ୍ୟା କହିଛନ୍ତି। ରାହୁଲଙ୍କ କିଛି ଦିନ ପୂର୍ବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ‘ସମର୍ଥନ ପାଇଁ ସମ୍ପର୍କ’ ଅଭିଯାନ କ୍ରମେ ତାଙ୍କୁ ସାକ୍ଷାତ କରିଥିଲେ। ଏହି ଘଟଣା ପରେ ରାହୁଲଙ୍କ ସମ୍ବନ୍ଧରେ ଏଭଳି ମନ୍ତବ୍ୟ ଦେଇ ପାଣ୍ଡ୍ୟା ଆଗାମୀ ଲୋକସଭା ନିର୍ବାଚନରେ ବିଜେପିକୁ ସମର୍ଥନ କରିବାର ସଙ୍କେତ ଦେଇଛନ୍ତି। ପାଣ୍ଡ୍ୟା କହିଛନ୍ତି, ହରିଦ୍ୱାର ଗସ୍ତ ବେଳେ ଶାହାଙ୍କୁ ଯେଭଳି ସ୍ୱାଗତ କରାଯାଇଥିଲା ରାହୁଲଙ୍କୁ ସେଭଳି ସ୍ୱାଗତ ସମ୍ବର୍ଦ୍ଧନା ଦିଆଯିବ ନାହିଁ। ରାହୁଲଙ୍କୁ ହରିଦ୍ୱାରାରେ ଗାୟତ୍ରୀ ପରିବାର ପକ୍ଷରୁ ଭିଆଇପି ଆତିଥ୍ୟ ପ୍ରଦାନ କରାଯିବ ନାହିଁ। ତେବେ କିଛି ଦିନ ପୂର୍ବେ ସେ କେନ୍ଦ୍ର ସରକାରଙ୍କ ନମାମୀ ଗଙ୍ଗେ ଯୋଜନା ଉପରେ ପ୍ରଶ୍ନ ଉଠାଇଥିଲେ। ଏହି ପ୍ରସଙ୍ଗରେ ଯଦିଓ ଏଯାବତ୍ କେନ୍ଦ୍ର ଉପରେ ସେ ଅସନ୍ତୁଷ୍ଟ ଅଛନ୍ତି ତଥାପି ରାହୁଲଙ୍କ ପ୍ରତି ଏଭଳି ମନ୍ତବ୍ୟ ଦେଇ ସେ ପରୋକ୍ଷରେ ବିଜେପି ପ୍ରତି ସମର୍ଥନ ଜାହିର କରିଥିବା କୁହାଯାଉଛି। ସମଗ୍ର ବିଶ୍ୱରେ ଗାୟତ୍ରୀ ପରିବାରର ୧୫ ଲକ୍ଷ ସମର୍ଥକ ରହିଥିବା କୁହାଯାଇଛି।
