ଓ୍ବାକଫ ବିଧେୟକ ବିରୋଧରେ ବିଭିନ୍ନ ରାଜ୍ୟରେ ବିକ୍ଷୋଭ

ସମାଜ ଡିଜିଟାଲ ଡେସ୍କ: ସଂସଦର ଉଭୟ ସଦନରେ ଓ୍ବାକଫ (ସଂଶୋଧନ) ବିଧେୟକ ପାରିତ ହେବା ପରେ ଏହାକୁ ନେଇ ବିଭିନ୍ନ ରାଜ୍ୟରେ ବିକ୍ଷୋଭ ପ୍ରଦର୍ଶନ ଆରମ୍ଭ ହୋଇଛି। ଜଏଣ୍ଟ ଫୋରମ ଫର ଓ୍ବାକଫ ପ୍ରୋଟେକ୍ସନ ନାମରେ ବ୍ୟାନର ଧରି ମୁସଲମାନ ସଂଗଠନଗୁଡ଼ିକ ରାସ୍ତାକୁ ଓହ୍ଲାଇଛନ୍ତି। ଶୁକ୍ରବାର ନମାଜ ପାଠ ପରେ ସଂଗଠନଗୁଡ଼ିକ ପକ୍ଷରୁ ଏହି ବିକ୍ଷୋଭ କରାଯାଇଛି।

ଗୁଜରାଟର ଅହମ୍ମଦାବରେ ବିକ୍ଷୋଭ ଶୋଭାଯାତ୍ରା ଚାଲିଥିବାବେଳେ ପୁଲିସ ଏଆଇଏମଆଇଏମ ଦଳର ରାଜ୍ୟ ମୁଖ୍ୟଙ୍କ ସମେତ ୪୦ ଜଣଙ୍କୁ ଅଟକ ରଖିଥିଲା। ଦଳର ସଭାପତି ସବିର କାବଲିଓ୍ବାଲାଙ୍କ ନେତୃତ୍ଵରେ ବିକ୍ଷୋଭକାରୀ ବିଜେପି ସରକାର ବିରୋଧରେ ନାରାବାଜି ଚଳାଇଥିଲେ।

କଲକାତାରେ ବିକ୍ଷୋଭକାରୀମାନେ ‘ଓ୍ବି ରିଜେକ୍ଟ ଓ୍ବାକଫ ଆମେଣ୍ଡମେଣ୍ଟ ବିଲ୍‌’ ବ୍ୟାନର ଧରି ଶୋଭାଯାତ୍ରା ଜରିଆରେ ପ୍ରତିବାଦ କରିଥିଲେ। ସେମାନେ କହିଥିଲେ ଯେ, ଦେଶକୁ ବିଭାଜନ କରିବା ଲାଗି ବିଜେପି ସରକାର ଏହି ବିଲ୍‌ ଆଣିଛନ୍ତି। ଏଭଳି ଏକଚ୍ଛତ୍ରବାଦ ଶାସନକୁ ଆମେ ବିରୋଧ କରୁଛୁ ବୋଲି ସେମାନେ କହିଥିଲେ। ସେହିପରି ବେଙ୍ଗାଲୁରୁ ଏବଂ ଚେନ୍ନଇରେ ମଧ୍ୟ ଶୋଭାଯାତ୍ରା ଆୟୋଜନ ହୋଇଛି। ଅଭିନେତାରୁ ରାଜନେତା ପାଲଟିଥିବା ବିଜୟ ମଧ୍ୟ କୋଏମ୍ବାଟୁରରେ ନିଜ ଦଳ ତାମିଲାଗା ଭେଟ୍‌ରି କାଜାଗମ କର୍ମକର୍ତ୍ତାଙ୍କ ସହିତ ବିକ୍ଷୋଭ କରିଥିଲେ।