ପ୍ରଣବଙ୍କ ସ୍ମୃତିଲେଖ ‘ଦ ପ୍ରେସିଡେନ୍‌ସିଆଲ ଇୟର୍ସ’ର ପ୍ରକାଶନକୁ ନେଇ ପୁଅ ଓ ଝିଅ ମୁହାଁମୁହିଁ

ନୂଆଦିଲ୍ଲୀ : ଦିବଂଗତ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଲିଖିତ ଶେଷ ସ୍ମୃତିଲେଖ ‘ଦ ପ୍ରେସିଡେନ୍‌ସିଆଲ ଇୟର୍ସ’ର ପ୍ରକାଶନକୁ କେନ୍ଦ୍ର କରି କଂଗ୍ରେସ କେବଳ ସଂକଟରେ ପଡ଼ି ନାହିଁ; ବରଂ ପ୍ରଣବଙ୍କ ପୁଅ ଅଭିଜିତ ଓ ଝିଅ ଶର୍ମିଷ୍ଠାଙ୍କ ମଧ୍ୟରେ ଖୋଲାଖୋଲି ବିବାଦ ଆରମ୍ଭ ହୋଇଯାଇଛି। ସ୍ମୃତିଲେଖର ଏହି ଶେଷ ଖଣ୍ଡ ପ୍ରକାଶନ ନେଇ ଉଭୟ ମୁହାଁମୁହିଁ ହୋଇଛନ୍ତି। ପୁସ୍ତକ ପ୍ରକାଶ ପାଇବା ପୂର୍ବରୁ ଏହାର କିୟଦଂଶ ତିନି ଦିନ ପୂର୍ବେ ଗଣମାଧ୍ୟମରେ ପ୍ରକାଶିତ ହୋଇ କଂଗ୍ରେସ ପାଇଁ ଅଡ଼ୁଆ ସୃଷ୍ଟି କରିଥିଲା।

ଏହାକୁ ଦୃଷ୍ଟିରେ ରଖି ଅଭିଜିତ ପ୍ରକାଶକଙ୍କୁ ତୁରନ୍ତ ପୁସ୍ତକର ପ୍ରକାଶନ ବନ୍ଦ କରିବାକୁ କହିଥିବାବେଳେ ଶର୍ମିଷ୍ଠା ଏହାର ପ୍ରତିବାଦ କରିଛନ୍ତି। ସେ ଭାଇ ଅଭିଜିତଙ୍କୁ ପୁସ୍ତକ ପ୍ରକାଶନରେ ଅନାବଶ୍ୟକ ବାଧା ସୃଷ୍ଟି ନ କରିବାକୁ ତାଗିଦା କରିଛନ୍ତି। ବାପା (ପ୍ରଣବ) ମୃତ୍ୟୁ ପୂର୍ବରୁ ଏବଂ ସଚେତନ ଅବସ୍ଥାରେ ପୁସ୍ତକକୁ ଚୂଡ଼ାନ୍ତ ରୂପ ଦେଇଛନ୍ତି। ବାପାଙ୍କ ହସ୍ତାକ୍ଷରରେ ପୁସ୍ତକର ପାଣ୍ଡୁଲିପି ଉପଲବ୍ଧ; ତେଣୁ ଏହାର ପ୍ରକାଶନ ଅବଶ୍ୟମ୍ଭାବୀ ବୋଲି ଶର୍ମିଷ୍ଠା କହିଛନ୍ତି। ଦେଶର ଅନ୍ୟତମ ଖ୍ୟାତନାମା ପ୍ରକାଶନ ସଂସ୍ଥା ‘ରୁପା’ ଏହି ପୁସ୍ତକକୁ ପ୍ରକାଶ କରୁଛି ଏବଂ ଆଉ ମାତ୍ର ମାସକ ବ୍ୟବଧାନରେ ଏହାର ଲୋକାପର୍ଣ କାର୍ଯ୍ୟକ୍ରମ ରହିଛି। ଏଭଳି ପରିସ୍ଥିତିରେ ପୁସ୍ତକର ପ୍ରକାଶନ ଅନ୍ଧକାର ମଧ୍ୟକୁ ଟାଣି ହୋଇଆସିଛି।

2/3
Since my father is no more , I being his son want to go through the contents of the final copy of the book before it’s publication as I believe , had my father been alive today , he too would have done the same.

— Abhijit Mukherjee (@ABHIJIT_LS) December 15, 2020

ଅଭିଜିତ ନିଜ ଟ୍ବିଟରରେ ଉଲ୍ଲେଖ କରିଛନ୍ତି ଯେ ପ୍ରକାଶକ ପୁସ୍ତକର କିଛି ଅଂଶକୁ ଉଦ୍ଦେଶ୍ୟମୂଳକ ଭାବେ ଏବଂ ପରିବାରର ବିନାନୁମତିରେ ସର୍ବସାଧାରଣରେ ପ୍ରଘଟ କରାଇଛନ୍ତି; ତେଣୁ ତୁରନ୍ତ ଏହି ପୁସ୍ତକ ପ୍ରକାଶନକୁ ବନ୍ଦ କରାଯିବା ଆବଶ୍ୟକ ବୋଲି ଲେଖକଙ୍କ ପୁଅ ଭାବେ କହୁଛି। ବାପାଙ୍କ ଅବର୍ତ୍ତମାନରେ ପୁସ୍ତକର ସୂଚୀ ଦେଖିବା ତାଙ୍କର ଦାୟିତ୍ବ ବୋଲି ସେ ଦାବି କରିଛନ୍ତି।

The final draft contains my dads’ hand written notes & comments that have been strictly adhered to. The views expressed by him are his own & no one should try to stop it from being published for any cheap publicity. That would be the greatest disservice to our departed father 2/2

— Sharmistha Mukherjee (@Sharmistha_GK) December 15, 2020

ଅପରପକ୍ଷରେ ଭଉଣୀ ଶର୍ମିଷ୍ଠା ପ୍ରକାଶକଙ୍କ ପକ୍ଷ ନେବା ସହ ଟ୍ବିଟର ମାଧ୍ୟମରେ ଖୋଲାଖୋଲି ଭାବେ ଭାଇ ଅଭିଜିତଙ୍କୁ ଜବାବ ଦେଇଛନ୍ତି। ଝିଅ ଭାବେ ସେ ଦାବି କରିଛନ୍ତି ଯେ ଉଭୟ ଭାଇଭଉଣୀଙ୍କର ପିତାଙ୍କ ସ୍ମୃତିଲେଖ ଉପରେ ନିଷ୍ପତ୍ତି ନେବାର ଅଧିକାର ରହିଛି; ଶସ୍ତା ପ୍ରଚାର ପାଇଁ ପୁସ୍ତକ ପ୍ରକାଶନରେ ଅଯଥା ସମସ୍ୟା ସୃଷ୍ଟି ନ କରନ୍ତୁ ବୋଲି ସେ ଦର୍ଶାଇଛନ୍ତି। ବସ୍ତୁତଃ ପ୍ରଣବଙ୍କ ଦାୟାଦ ଭାବେ ରାଜନୈତିକ ପ୍ରତିଷ୍ଠା ପାଇଁ ଭାଇ-ଭଉଣୀ ପ୍ରୟାସ ଚଳାଇଛନ୍ତି ଏବଂ ପୁସ୍ତକକୁ ନେଇ ସାମ୍ପ୍ରତିକ ବିବାଦ ଏହାର ଏକ ଲକ୍ଷଣ ବୋଲି କୁହାଯାଉଛି। ଅଭିଜିତ ପୂର୍ବତନ ସାଂସଦ ଥିଲାବେଳେ ଶର୍ମିଷ୍ଠା ସର୍ବଭାରତୀୟ କଂଗ୍ରେସ କମିଟି(ଏଆଇସିସି)ର କର୍ମକର୍ତ୍ତା ଅଛନ୍ତି।