ମୁମ୍ବାଇ : ଥାନେ ପୁଲିସ ଷ୍ଟେସନ ଗୁଳିକାଣ୍ଡ ଘଟଣାରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବିଜେପି ବିଧାୟକ ଗଣପତ ଗାୟକୱାଡଙ୍କୁ ପୁଲିସ ଗିରଫ କରିଛି। ଶୁକ୍ରବାର ବିଳମ୍ବିତ ରାତିରେ ଥାନେ ଜିଲାର ଏକ ପୁଲିସ ଷ୍ଟେସନ ପରିସରରେ ସେ ଗୁଳି ଚଳାଇଥିଲେ । ଏଥିରେ ଶିବସେନାର ଜଣେ ନେତା ଆହତ ହୋଇଥିଲେ। ଘଟଣା ଘଟିବା ପରେ ତାଙ୍କୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏହି ମାମଲାରେ ୬ଜଣଙ୍କ ନାଁରେ ମାମଲା ଦାୟର ହୋଇଥିଲା। ପୁଲିସ ଏମାନଙ୍କ ମଧ୍ୟରୁ ୩ ଜଣଙ୍କୁ ଗିରଫ କରିଥିବାବେଳେ ଅନ୍ୟ ୩ ଜଣଙ୍କୁ ଖୋଜାଖୋଜି କରୁଛି। ସେପଟେ ଘଟଣାକୁ ନେଇ ଡିସିପି ସୁଧାକର ପଠାରେ କହିଛନ୍ତି ଯେ ଭାଜପା ବିଧାୟକ ଗଣପତ ଗାୟକୱାଡ ଏବଂ ଶିବସେନା ସିନ୍ଧେ ଦଳ ନେତା ମହେଶ ଗାୟକୱାଡଙ୍କ ମଧ୍ୟରେ କିଛି ଦିନ ହେବ ବିବାଦ ଲାଗି ରହିଥିଲା । ସେ ଏହାକୁ ନେଇ ପୁଲିସ ଷ୍ଟେସନରେ ପହଞ୍ଚିଥିଲେ। କିନ୍ତୁ ପୁଲିସ ଷ୍ଟେସନରେ ଉଭୟଙ୍କ ମଧ୍ୟରେ ବିବାଦ ଏତେ ଉଗ୍ର ହୋଇଥିଲା ଯେ , ଭାଜପା ବିଧାୟକ ଗଣପତ ଗାୟକୱାଡ ଶିବସେନା ଦଳର ନେତା ମହେଶ ଗାୟକୱାଡଙ୍କ ଉପରକୁ ଗୁଳି ଚଳାଇଥିଲେ। ସଙ୍ଗେ ସଙ୍ଗେ ଆହତ ମହେଶ ଗାୟକୱାଡଙ୍କୁ ଡାକ୍ତରଖାନାକୁ ପଠାଯାଇଥିଲା । ସେଠାରେ ତାଙ୍କର ଚିକିତ୍ସା ଜାରି ରହିଛି।
Comments are closed.