ନୂଆଦିଲ୍ଲୀ – ଉଡାଣ ଭରିବା ବେଳେ ବିମାନ ମଧ୍ୟରେ ଜଣେ ଯାତ୍ରୀଙ୍କର ମୃତ୍ୟୁ ହୋଇଥିବା ବେଳେ ସେହି ବିମାନଟି ପୁଣିଥରେ ଦିଲ୍ଲୀ ବିମାନ ବନ୍ଦରକୁ ଫେରି ଆସିଥିବା ସୂଚନା ମିଳିଛି । ଆମେରିକା ଯାଉଥିବା ଏହି ବିମାନ ଦିଲ୍ଲୀ ବିମାନ ବନ୍ଦର ଛାଡିବାର ପ୍ରାୟ ୩ ଘଣ୍ଟା ପରେ ଜଣେ ଯାତ୍ରୀଙ୍କର ମୃତ୍ୟୁ ହୋଇଥିଲା । ଏହାପରେ ମେଡିକାଲ୍ ଏମରଜେନ୍ସି ଭାବେ ବିମାନକୁ ଦିଲ୍ଲୀ ବିମାନ ବନ୍ଦରକୁ ଫେରାଇ ଆଣାଯାଇଥିଲା ।
ବିମାନ ଅବତରଣ କରିବା ପରେ ବିମାନ ବନ୍ଦରରେ ନିୟୋଜିତ ଥିବା ଡାକ୍ତରୀ ଦଳ ସେଠାରେ ପହଞ୍ଚି ସମ୍ପୃକ୍ତ ଯାତ୍ରୀଙ୍କୁ ଯାଞ୍ଚ କରିଥିଲେ। ଏହାପରେ ତାଙ୍କର ମୃତ୍ୟୁ ହୋଇଥିବା କଥା ସୂଚନା ଦେଇଥିଲେ । ଜଣେ ଆମେରୀୟ ନାଗରିକ ତାଙ୍କ ପତ୍ନୀଙ୍କ ସହ ଆମେରିକା ଫେରୁଥିବା ବେଳେ ବିମାନ ଭିତରେ ତାଙ୍କର ମୃତ୍ୟୁ ହୋଇଥିଲା । ଏୟାର ଇଣ୍ଡିଆର ଫ୍ଲାଇଟ୍ ଏଆଇ-୧୦୫ରେ ଏହି ଘଟଣା ଘଟିଛି ।
ଦିଲ୍ଲୀରୁ ନେଓ୍ୱାର୍କକୁ ବିମାନଟି ଯାତ୍ରା କରୁଥିଲା। ବିମାନଟି ଦିଲ୍ଲୀ ବିମାନବନ୍ଦରରେ ଅବତରଣ କରିବା ପରେ ଅନ୍ୟଯାତ୍ରୀମାନଙ୍କୁ ଧରି ଦିନ ପ୍ରାୟ ୪ଟାବେଳେ ପୁଣି ଉଡାଣ ଭରିଥିଲା । ଏହି ସମୟରେ ବିମାନରେ ନୂଆ କର୍ମଚାରୀମାନେ ଯାଇଥିବା ବିମାନ ବନ୍ଦର କର୍ତ୍ତୃପକ୍ଷ ସୂଚନା ଦେଇଛନ୍ତି।
ଏହି ଘଟଣା ସମ୍ପର୍କରେ ଏୟାରପୋର୍ଟ ପୋଲିସ୍କୁ ସୂଚନା ଦିଆଯାଇଛି । ପୋଲିସ୍ ମୃତ୍ୟୁର କାରଣ ବିଷୟରେ ଯାଞ୍ଚ କରୁଥିବା ସୂଚନା ମିଳିଛି ।
