ନୂଆଦିଲ୍ଲୀ: ଦିଲ୍ଲୀରେ କରୋନା ଭୂତାଣୁର ପ୍ରକୋପ ବଢ଼ି ଚାଲିଥିବାବେଳେ ଗୁରୁବାର ଏକ ବଡ଼ ଖବର ସାମ୍ନାକୁ ଆସିଛି। ଦକ୍ଷିଣ ଦିଲ୍ଲୀର ମାଲବୀୟ ନଗରରେ ପିଜା ଡେଲିଭରି କରୁଥିବା ଜଣେ ଯୁବକଙ୍କଠାରେ କରୋନା ପଜିଟିଭ ଚିହ୍ନଟ ହୋଇଛନ୍ତି। ଏହା ପରେ ସମ୍ପୃକ୍ତ ଅଞ୍ଚଳରେ କରୋନା ବ୍ୟାପିବା ନେଇ ଆଶଙ୍କା ପ୍ରକାଶ ପାଇଛି। ଫଳରେ ଯୁବକ ଜଣକ ଯେଉଁ ଲୋକମାନଙ୍କ ଘରେ ପିଜା ଡେଲିଭରି କରିଛନ୍ତି ସେମାନଙ୍କୁ ଏବେ କ୍ବାରେଣ୍ଟାଇନରେ ରଖିବାକୁ କୁହାଯାଇଛି। ମାଲବୀୟ ନଗରର ପ୍ରାୟ ୭୨ ପରିବାର କ୍ବାରେଣ୍ଟାଇନରେ ରଖାଯାଇଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ସୂଚନା ଅନୁସାରେ, ଏହି ଯୁବକ ଜଣକ କରୋନାରେ ଆକ୍ରାନ୍ତ ହୋଇଥିବା ଏପ୍ରିଲ ୧୪ରେ ଜଣାପଡ଼ିଥିଲା। ଏହା ପରେ ସେ ଯେଉଁ ଘରେ ପିଜା ଡେଲିଭରି କରିଥିଲେ ସେସବୁ ଘରକୁ ଚିହ୍ନଟ କରାଯାଇଛି। ପରେ ସେହି ପରିବାରଗୁଡ଼ିକୁ କ୍ବାରେଣ୍ଟାଇନରେ ରଖାଯାଇଛି। କୁହାଯାଉଛି ଯେ, ଏହି ଯୁବକ ଜଣକ ନିଜଠାରେ କରୋନା ଲକ୍ଷଣ ଅନୁଭବ କରିବା ପରେ ସତର୍କ ହୋଇ କେତେକ ସରକାରୀ ହସ୍ପିଟାଲକୁ ପରୀକ୍ଷା କରାଇବାକୁ ଯାଇଥିଲେ। କିନ୍ତୁ ତାଙ୍କର କୌଣସି ବିଦେଶ ଯାତ୍ରାର ବିବରଣୀ ନ ଥିବାରୁ ହସ୍ପିଟାଲ ପକ୍ଷରୁ ତାଙ୍କୁ ଫେରାଇ ଦିଆଯାଇଥିଲା। ଯେତେବେଳେ ଅବସ୍ଥା ଗମ୍ଭୀର ହେଲା, ସେତେବେଳେ ସେ ହସ୍ପିଟାଲ ଯିବାରୁ ପରୀକ୍ଷା କରାଯାଇଥିଲା। ପରୀକ୍ଷାରୁ ତାଙ୍କର ରିପୋର୍ଟ ପଜିଟିଭ ଆସିଛି। ବର୍ତ୍ତମାନ ତାଙ୍କୁ ଏକ ହସ୍ପିଟାଲରେ ରଖି ଚିକିତ୍ସା କରାଯାଉଛି।
