ପିପିଲି :ଭୁବନେଶ୍ୱର-ପୁରୀ ଜାତୀୟ ରାଜପଥର ପିପିଲି ବାଇପାସ ରାସ୍ତାରେ ସୃଷ୍ଟି ହୋଇଥିବା ଖାଲର ମରାମତି ଦିଗରେ ଜାତୀୟ ରାଜପଥ ବିଭାଗର ଅବହେଳାକୁ ନେଇ ଜନ ଅସନ୍ତୋଷ ପ୍ରକାଶ ପାଇଛି। ଦୀର୍ଘ ଦିନ ଧରି ଜାତୀୟ ରାଜପଥରେ ଏହି ଖାଲ ସୃଷ୍ଟି ହୋଇଥିବା ବେଳେ ଦୁର୍ଘଟଣାରୁ ବର୍ତ୍ତିବା ପାଇଁ ସ୍ଥାନୀୟ ଲୋକେ ଏକ ଟାୟାର ସହ ଗଛର ଡାଳକୁ ସେଠାରେ ପୋତିଥିବା ପରିଲକ୍ଷିତ ହୋଇଛି।
ଜାତୀୟ ରାଜପଥର ପିପିଲି ବାଇପାସ ରାସ୍ତାର ଫ୍ଲାଏଓଭର ନିକଟରେ ପୁରୀ ଦିଗକୁ ଥିବା ରାସ୍ତା ପାଶ୍ୱର୍କୁ ଲାଗି ଏଭଳି ଖାଲ ରହିଛି। ଦୈନିକ ଶହ ଶହ ସଂଖ୍ୟାରେ ଗାଡିମୋଟର ଏହି ରାସ୍ତାରେ ଚଳାଚଳ କରୁଥିବା ବେଳେ ଏହି ଖାଲ ଯୋଗୁଁ ଯିବା ଆସିବା ବେଳେ ଲୋକେ ପଡି ଖଣ୍ଡିଆଖାବରା ହେଉଛନ୍ତି। ବିଶେଷ କରି ରାତି ସମୟରେ କେତେକ ଗାଡି ଚାଳକ ଉକ୍ତ ଖାଲକୁ ଦେଖି ନପାରିବା କାରଣରୁ ସେଥିରେ ପଡି ଆହତ ହେଉଥିବା ସୂଚନା ମିଳିଛି।
ସାମାନ୍ୟ ବର୍ଷାରେ ଏହି ଖାଲରେ ପାଣି ଭର୍ତ୍ତି ହୋଇ ରାସ୍ତା ସହ ସମାନ ହୋଇଯାଉଥିବାରୁ ଛୋଟମୋଟ ଦୁର୍ଘଟଣାମାନ ଘଟୁଛି। ଲୋକଙ୍କୁ ଦୁର୍ଘଟଣାରୁ ବଞ୍ଚାଇବା ପାଇଁ ତଥା ସତର୍କତା ସୃଷ୍ଟି କରାଇବା ପାଇଁ ସ୍ଥାନୀୟ କେତେକ ଲୋକେ ଉକ୍ତ ଖାଲରେ ଏକ ଟାୟାର ସହ ଗଛଡାଳକୁ ପୋତିଥିବା ପରିଲକ୍ଷିତ ହୋଇଛି। ୨ରୁ ୩ ଦିନ ବ୍ୟବଧାନରେ ଉକ୍ତ ଗର୍ତ୍ତରେ ଗଛଡାଳ ବଦଳା ଯାଉଥିବାର ସୂଚନା ମିଳିଛି।
ଏହି ଖାଲ ସହ ସେଠାରେ ରାଜପଥ କଡରେ ଏକାଧିକ ଖାଲ ସୃଷ୍ଟି ହୋଇଥିବା ବେଳେ ଗାଡି ଚାଳକ ସାମାନ୍ୟ ଅସାବଧାନ ହେଲେ ଦୁର୍ଘଟଣା ଘଟି ଜୀବନ ହାନୀର ଯଥେଷ୍ଟ ଆଶଙ୍କା ରହିଛି। ଏନେଇ ବାରମ୍ବାର ଅଭିଯୋଗ କରିବା ସତ୍ତେ୍ୱ ମଧ୍ୟ ଏହାକୁ ମରାମତି କରିବା ଦିଗରେ ବିଭାଗ ଆଦୌ ଗୁରୁତ୍ୱ ଦେଉନଥିବା ଅଭିଯୋଗ ହୋଇଛି। ଜାତୀୟ ରାଜପଥର ରକ୍ଷଣାବେକ୍ଷଣ ପାଇଁ କୋଟି କୋଟି ଟଙ୍କା ଖର୍ଚ୍ଚ ହେଉଥିବା ବେଳେ ଭୁବନେଶ୍ୱର-ପୁରୀ ଜାତୀୟ ରାଜପଥରେ ଥିବା ଏହି ଖାଲର ମରାମତି ଦିଗରେ ବିଭାଗୀୟ ଉଦାସିନତାକୁ ନେଇ ସାଧାରଣରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଗତ ରଥଯାତ୍ରା ପୂର୍ବରୁ ଏହି ଜାତୀୟ ରାଜପଥର ବିଭିନ୍ନ ମରାମତି କାର୍ଯ୍ୟ ହୋଇଥିବା ବେଳେ ସେ ସମୟରେ ଏହି ଖାଲଖାମାକୁ ମରାମତି କରିବା ଦିଗରେ ରାଜପଥ ବିଭାଗ ଆଗ୍ରହ ନଦେଖାଇବା ଘଟଣା ସମସ୍ତଙ୍କୁ ଚକିତ କରିଛି। କୌଣସି ବଡ ଧରଣର ଦୁର୍ଘଟଣା ଘଟିବା ପୂର୍ବରୁ ବିଭାଗ ପକ୍ଷରୁ ତୁରନ୍ତ ଏହାର ମରାମତି ପାଇଁ ସାଧାରଣରେ ଦାବି କରାଯାଇଛି।
Comments are closed.