ପିପିଲି :ସାମାଜିକ ଗଣମାଧ୍ୟମରେ ମହିଳାଙ୍କ ପ୍ରତି ଅପମାନସୂଚକ ମନ୍ତବ୍ୟ ପ୍ରସଙ୍ଗରେ ସମାଲୋଚନାର ଶିକାର ହୋଇଥିବା ରାଜ୍ୟ ପଞ୍ଚାୟତରାଜ ମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରଦୀପ ମହାରଥୀଙ୍କ ବିରୋଧରେ ମହିଳା କଂଗ୍ରେସ ପକ୍ଷରୁ ଶୁକ୍ରବାର ପିପିଲି ଥାନାରେ ଅଭିଯୋଗ କରାଯାଇଛି।
ପୁରୀ ଜିଲା ମହିଳା କଂଗ୍ରେସ କମିଟିର କାର୍ଯ୍ୟକାରୀ ସଭାନେତ୍ରୀ ନିରୁପମା ପାତ୍ରଙ୍କ ନେତୃତ୍ୱରେ କେତେକ ମହିଳା କଂଗ୍ରେସ ନେତ୍ରୀମାନେ ଶୁକ୍ରବାର ପିପିଲି ହାଟଛକ ଠାରୁ ଥାନା ପର୍ଯ୍ୟନ୍ତ ପଦଯାତ୍ରାରେ ଆସି ପିପିଲି ଆଇଆଇସି ଶରତ କୁମାର ସାହୁଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ନାରୀ ଜାତି ପ୍ରତି ଶ୍ରୀ ମହାରଥୀଙ୍କ ଅଶୋଭନୀୟ ମନ୍ତବ୍ୟ ସମଗ୍ର ମହିଳା ଜାତିର ସମ୍ମାନ ଓ ଇଜ୍ଜତ ଉପରେ ଆଞ୍ଚ ଆଣିଥିବାର ସେମାନେ ଅଭିଯୋଗ କରିବା ସହ ଏହାର ତଦନ୍ତ କରାଯାଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।
