ପାରଳାଖେମୁଣ୍ଡି: ପାରଳାଖେମୁଣ୍ଡିର ସହକାରୀ ବନ ସଂରକ୍ଷକ ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ ମାମଲାର ତଦନ୍ତ କରୁଥିବା ଅପରାଧ ଶାଖା ଶୁକ୍ରବାର ସପ୍ତମ ଦିନରେ ଗୁରାଣ୍ଡି ଥାନା ଅଧିକାରୀଙ୍କୁ ଜେରା କରିଛି। ଆଜି ସକାଳ ସାଢେ ୧୦ଟାରୁ ଆରମ୍ଭ ହୋଇଥିବା ଜେରା ଦ୍ବିପହର ୨ଟା ଯାଏ ଜାରି ରହିଥିଲା। ସାଢେ ୩ଘଣ୍ଟା ଜେରାରେ ଗୁରାଣ୍ଡି ଥାନା ଅଧିକାରୀ ମମତା ପଣ୍ଡାଙ୍କୁ ବିଭିନ୍ନ ପ୍ରଶ୍ନ ପଚାରି ଥିଲା ଅପରାଧ ଶାଖା। କିପରି ଓ କାହିଁକି ସେ ଜିଲା ମୁଖ୍ୟ ଚିକିତ୍ସାଳୟକୁ ଯାଇଥିଲେ, ତାଙ୍କୁ କିଏ ସୂଚନା ଦେଇଥିଲେ, ଚିକିତ୍ସାଳୟରେ ସେ କ’ଣ କରିଥିଲେ, ଅନ୍ୟ କିଏ ଉପସ୍ଥିତ ଥିଲେ ଓ ସେମାନେ କ’ଣ କରୁଥିଲେ, ସୌମ୍ୟରଞ୍ଜନଙ୍କୁ କଟକ ସ୍ଥାନାନ୍ତର ପାଇଁ ଚାପ ପ୍ରୟୋଗ କରିଥିଲେ କି, ଘଟଣା ବିଷୟରେ ବିଦ୍ୟାଭାରତୀ ତାଙ୍କୁ କ’ଣ କହିଥିଲେ, ସୌମ୍ୟରଞ୍ଜନଙ୍କ ବାସଭବନକୁ କାହିଁକି ଯାଇଥିଲେ, ସେଠାରେ କ’ଣ କେଲ, ବନଖଣ୍ଡ ଅଧିକାରୀଙ୍କୁ ଜାଣିଥିଲେ କି, କେବେ ଜାଣିଲେ, ୧୦୮ ଆମ୍ବୁୁଲାନ୍ସ ଅଟକିବା ଘଟଣାରେ ସମ୍ପୃକ୍ତି କ’ଣ ଥିଲା ଆଦି ସମ୍ପର୍କରେ ଅପରାଧ ଶାଖା ପ୍ରଶ୍ନ କରିଥିଲେ।
ତେବେ ଜେରା ସମୟରେ ସେ ସମସ୍ତ ପ୍ରଶ୍ନର ଉତ୍ତର ଦେଇଥିବା ଥାନା ଅଧିକାରିଣୀ ସୂଚନା ଦେବା ସହ ଆଉ କିଛି କହିବାକୁ ଗଣମାଧ୍ୟମକୁ ମନା କରିଥିଲେ। ମମତା ପଣ୍ଡା ସନ୍ତୋଷଜନକ ଉତ୍ତର ଦେଇଛନ୍ତି ବୋଲି ଜେରା ସରିବା ପରେ ଅପରାଧ ଶାଖାର ଉପଖଣ୍ଡ ଅଧିକାରୀ ଜ୍ଞାନରଞ୍ଜନ ମିଶ୍ର ଗଣମାଧ୍ୟମକୁ କହିଛନ୍ତି। ବନଖଣ୍ଡ ଅଧିକାରୀ ସଂଗ୍ରାମକେଶରୀ ବେହେରାଙ୍କୁ ସେ ଜାଣିନଥିବା, ବିଦ୍ୟାଭାରତୀ ତାଙ୍କ ଦୂର ସମ୍ପର୍କୀୟ ଏବଂ ମାନବିକତା ଦୃଷ୍ଟିରୁ ସେ ଯାଇଥିଲେ ବୋଲି ମମତା କହିଥିବା ଉପଖଣ୍ଡ ଅଧିକାରୀ କହିଛନ୍ତି। ଅନ୍ୟପକ୍ଷରେ ପ୍ରମାଣ ନଷ୍ଟ କରିବା ଓ ଆମ୍ବୁଲାନ୍ସକୁ ଜାଣିଶୁଣି ଅଧିକା ସମୟ ଅଟକାଇବାରେ ମମତା ପଣ୍ଡାଙ୍କ ଭୂମିକା ରହିଥିଲା ବୋଲି ଅଭିଯୋଗ ଆଣିଥିଲେ ମୃତ ସୌମ୍ୟଙ୍କ ପରିବାର ଲୋକେ l
ସୌମ୍ୟରଞ୍ଜନଙ୍କ ମୃତ୍ୟୁକୁ ୩୮ଦିନ ଅତିକ୍ରାନ୍ତ ହୋଇ ସାରିଛି; ହେଲେ ମୃତ୍ୟୁ ରହସ୍ୟରୁ ପରଦା ହଟିପାରିନି। ବରଂ ମୃତ୍ୟୁ ଅଧିକ ରହସ୍ୟ ଆଡକୁ ଠେଲି ହୋଇଯାଇଛି l ପୂର୍ବରୁ ଏହି ଘଟଣାରେ ପୁଲିସ ତଦନ୍ତରେ ଅପରାଧ ଶାଖା ସହାୟତା କରିଥିଲା। ୧୪ରୁ ତଦନ୍ତ ଆରମ୍ଭ କରି ଅପରାଧ ଶାଖା ଏପର୍ଯ୍ୟନ୍ତ ମୃତ ୧୪ ଜଣଙ୍କୁ ଜେରା କରିସାରିଲାଣି l
