ଗଳାକାଟି ଯୁବକଙ୍କୁ ହତ୍ୟା

ପାରାଦ୍ୱୀପ : ପାରାଦ୍ୱୀପ ଥାନା ନିକଟ ବଡ଼ପଡ଼ିଆ ମାର୍କେଟରେ ଜଣେ ଯୁବକଙ୍କୁ କେହି ଦୁର୍ବୁତ୍ତ ଗଳା କାଟି ହତ୍ୟା କରିଛନ୍ତି । ହତ୍ୟାକାଣ୍ଡ ସମ୍ପର୍କରେ ଖବର ପାଇ ପାରାଦ୍ୱୀପ ପୁଲିସ ଘଟଣା ସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ମୃତ ଯୁବକଙ୍କ ଘର କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଅଂଚଳରେ, ସେ ପାରାଦ୍ୱୀପର ଏକ ହୋଟେଲରେ କାମ କରୁଥିଲା ବୋଲି ପୁଲିସ କହିଛି ।
ଆଜି ସକାଳୁ ଥାନା ନିକଟ ଟ୍ୟାକ୍ସି ଷ୍ଟାଣ୍ଡରେ ଥିବା ଚାନ୍ଦିନୀ ଉପରେ ହୋଟେଲ କର୍ମଚାରୀ ମରି ପଡିଥିବା ଲୋକେ ଦେଖି ପୁଲିସକୁ ଖବର ଦେଇଥିଲେ। ଯୁବକଙ୍କର ବେକ କଟା ହେବା ସହ କ।ନମୁଣ୍ଡାରୁ ରକ୍ତ ବାହାରୁଥିଲା । ଗତକାଲି ରାତିରେ ଏହି ହତ୍ୟାକାଣ୍ଡ ଘଟିଥିବା ସ୍ଥାନୀୟ ଲୋକେ କହିଛନ୍ତି। ମୃତକଙ୍କ ଘର କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ନିକଟ ଗଣ୍ଡାଖିଆ ଲୋକନାଥପୁର ଗାଁରେ। ତାଙ୍କ ନାଁ ଟୂବୁଲା ଜେନା ବୟସ ୨୮ ବୋଲି ଜଣାପଡିଛି। ସେ ଅଳ୍ପ ଦିନ ହେବ ଏଠାରେ କାମ କରୁଥିଲେ। କଣ ପାଇଁ ତାଙ୍କୁ ହତ୍ୟା କରାଯାଇଛି ସେ ସମ୍ପର୍କରେ ଜଣାପଡିନି । ସେ ପୂର୍ବରୁ ପାରାଦ୍ୱୀପରେ ରହି ଆଉ ଏକ ହୋଟେଲରେ କାମ କରୁଥିଲେ ବୋଲି ସୂଚନା ମିଳିଛି । ଘଟଣା ପରେ ରେବୀକା ହୋଟେଲର ଷ୍ଟାଫଙ୍କୁ ପୁଲିସ ଥାନାରେ ଅଟକ ରଖି ପଚାରୁଚୁରା ଚଳାଇଛି । ଘଟଣା ସମ୍ପର୍କରେ ତାଙ୍କ ପରିବାରକୁ ଖବର ଦିଆଯାଇଛି।