ଇସଲାମବାଦ: ଧୀରେ ଧୀରେ ଅର୍ଥନୈତିକ ସ୍ତରରେ ଦୁର୍ବଳ ହେଉଛି ପାକିସ୍ତାନ । ଅର୍ଥନୈତିକ ସଙ୍କଟ ମଧ୍ୟରେ ପାକ୍ ଛେନ୍ଦି ହୋଇଯାଇଛି । ଶ୍ରୀଲଙ୍କା ପରେ ପାକିସ୍ତାନରେ ଅର୍ଥନୈତିକ ସଂକଟ ଦେଖାଦେଲାଣି । କାରଣ ବାଣିଜ୍ୟ କ୍ଷେତ୍ରରେ ପାକିସ୍ତାନ ଦୁର୍ବଳ ହେଉଛି । ଗତ ଆର୍ଥିକ ବର୍ଷରେ ପାକିସ୍ତାନ ବାଣିଜ୍ୟ କାରବାର ୪୮.୬୬% ବିଲିୟନ ଡଲାରରେ ପହଞ୍ଚିଛି । ଯାହାକି ଗୋଟିଏ ବର୍ଷ ପୂର୍ବରୁ ୩୦.୯୬ ବିଲିୟନ ଡରାର ରହିଥିବା ବେଳେ ଏହା ୫୭ ପ୍ରତିଶତକୁ ବୃଦ୍ଧି ପାଇଛି ।
ପାକିସ୍ତାନର ଏକ ଖବରକାଗଜ ‘ଦ ଡନ୍’ ଏନେଇ କିଛି ତଥ୍ୟ ପ୍ରକାଶ କରିଛି । ରିପୋର୍ଟ ଅନୁଯାୟୀ ଶାହାବାଜ ସରିଫ ସରକାର ମେ’ ମାସରେ ୮ଶହରୁ ଅଧିକ ବିଳାଶପୂର୍ଣ୍ଣ ସାମଗ୍ରୀ ଆମଦାନୀ ଉପରେ ପ୍ରତିବନ୍ଧକ ଲଗାଇଥିଲେ । ହେଲେ ତଥାପି ପାକିସ୍ତାନରେ ବାଣିଜ୍ୟ କରାବାରରେ ନିଅଣ୍ଟ ଦେଖାଦେଇଛି ।
‘ଦ ଡନ୍’ ପ୍ରକାଶ କରିଥିବା ରିପୋର୍ଟରେ ଗତ ଜୁନ ମାସରେ ପାକିସ୍ତାନ ବାଣିଜ୍ୟ କାରବାରରେ ବ୍ୟାପକ କ୍ଷତି ଦେଖାଦେଇଛି । କ୍ଷତି ୩୨ ପ୍ରତିଶତରୁ ବୃଦ୍ଧି ଘଟି ୪.୮୪ ବିଲିୟନ ଡଲାରରେ ପହଞ୍ଚିଛି । ମାତ୍ର ଗୋଟିଏ ବର୍ଷ ପୂର୍ବରୁ ଅର୍ଥାତ୍ ଗତବର୍ଷ ଜୁନ୍ ମାସରେ ଏହା ୩.୬୬ ବିଲିୟନ ଡଲାର ରହିଥିଲା ।
ଏହି କାରଣରୁ କିଛି ଦିନ ପୂର୍ବରୁ ପାକିସ୍ତାନରେ ପେଟ୍ରୋଲ ଡିଜେଲ ଦର ଅହେତୁକ ବୃଦ୍ଧି ଘଟିଥିଲା । ଲିଟର ପିଛା ୧୪ରୁ ୧୯ଟଙ୍କା ଯାଏ ବୃଦ୍ଧି ପାଇଥିଲା । ବର୍ତ୍ତମାନ ପାକିସ୍ତାନରେ ପେଟ୍ରୋଲ ଲିଟର ପ୍ରତି ୨୪୮.୭୪ ପଇସା ରହିଥିବା ବେଳେ ଡିଜେଲ ମଧ୍ୟ ୨୫୦ଟଙ୍କା ଅତିକ୍ରମ କରିଛି । ଅନ୍ୟାନ୍ୟ ପେଟ୍ରୋଲିୟମ ସାମଗ୍ରୀ ଦର ମଧ୍ୟ ଅହେତୁକ ବୃଦ୍ଧି ପାଇଛି ।
