ସିପିଇସିକୁ ସାମରିକ ରୂପରେଖ ଦିଆଯିବ ନାହିଁ : ପାକିସ୍ତାନ

ଇସଲାମାବାଦ : ଚୀନ-ପାକିସ୍ତାନ ଅର୍ଥନୈତିକ କରିଡର (ସିପିଇସି) ହେଉଛି ପାକିସ୍ତାନ ଓ ଚୀନ ମଧ୍ୟରେ ଆର୍ଥିକ ସହଯୋଗିତାର ପ୍ରକଳ୍ପ। ଏହାକୁ ସାମରିକ ରୂପରେଖ ଦିଆଯିବ ନାହିଁ ବୋଲି ପାକିସ୍ତାନ କହିଛି। ପାକିସ୍ତାନ ବୈଦେଶିକ ମନ୍ତ୍ରଣାଳୟ ମୁଖପାତ୍ର ମହମ୍ମଦ ଫୈଜଲ କହିଛନ୍ତି ଯେ ଚୀନ ସହ ଆର୍ଥିକ କାରବାର ଓ ସହଯୋଗ ଲାଗି ଏହି ପ୍ରକଳ୍ପ ନିର୍ମାଣ କରାଯାଇଛି। ଏହି ପ୍ରକଳ୍ପକୁ ସାମରିକ ରୂପରେଖ ଦିଆଯିବର ନାହିଁ। ଏହା ଚୀନ-ପାକିସ୍ତାନର ଦ୍ବିପାକ୍ଷିକ ଅର୍ଥନୈତିକ ପ୍ରକଳ୍ପ। ଏହି ପ୍ରକଳ୍ପ ଦ୍ବାରା ଦୁଇଦେଶ ଆର୍ଥିକ ଫାଇଦା ପାଇବେ।
ଇମ୍ରାନ ଖାଁ ନେତୃତ୍ବ ସରକାର କ୍ଷମତାକୁ ଆସିବା ପରେ ସିପିଇସି ପ୍ରକଳ୍ପର ଉଦ୍ଦେଶ୍ୟ ପରିବର୍ତ୍ତନ ହେବାର ଆଶଙ୍କା ପ୍ରକାଶ ପାଇଥିଲା। ଏହି କରିଡର ଦେଇ ଚୀନ ଓ ପାକିସ୍ତାନ ସାମରିକ କାରବାର କରିବା ନେଇ ବ୍ରିଟେନସ୍ଥିତ ଫାଇନାନ୍ସିଆଲ ଟାଇମ୍ସରେ ରିପୋର୍ଟ ପ୍ରକାଶ ପାଇଥିଲା। ରିପୋର୍ଟରେ ଉଲ୍ଲେଖ କରାଯାଇଥିଲା ଯେ ୬୨୦୦ କୋଟି ଡଲାରର ଏହି ପ୍ରକଳ୍ପ ଉପରେ ସମୀକ୍ଷା ଲାଗି ଇମ୍ରାନ ଏକ ୯ଜଣିଆ କମିଟି ଗଠନ କରିଛନ୍ତି। ଇମ୍ରାନ ତାଙ୍କର ଚୀନ ଗସ୍ତ କାଳରେ ଏହି ସିପିଇସି ପ୍ରକଳ୍ପକୁ ପ୍ରଶଂସା କରିବା ସହିତ ପାକିସ୍ତାନର ଅର୍ଥନୀତି ଉପରେ ଏହାର ପ୍ରଭାବ ସମ୍ପର୍କରେ କହିଥିଲେ।
ଗତ ନଭେମ୍ବରରେ ଚୀନ-ପାକିସ୍ତାନ ସିପିଇସି ଦେଶ ବସ୍ ସେବା ଆରମ୍ଭ କରିଥିଲେ। ଏହି ବସ୍ ସେବାକୁ ନେଇ ଭାରତ ଦୃଢ ବିରୋଧ କରିଥିଲା। ଭାରତ କହିଥିଲା ଯେ ଏହି ବସ୍ ସେବା ନୂଆଦିଲ୍ଲୀର ସାର୍ବଭୌମତ୍ବ ଓ ଅଖଣ୍ଡତାକୁ ଉଲ୍ଲଙ୍ଘନ କରୁଛି। ଭାରତର ଏହି ବିରୋଧକୁ ଉଭୟ ଚୀନ ଓ ପାକିସ୍ତାନ ଅସ୍ବୀକାର କରିଥିଲେ। ପାକିସ୍ତାନ ଅଧିକୃତ କାଶ୍ମୀର ଦେଇ ସିପିଇସି ନିର୍ମାଣ କରାଯାଇଛି; ଯାହାକୁ ଭାରତ ନିଜର ଅଂଶ ବୋଲି ଦାବି କରିଆସୁଛି। ପିଓକେ ଦେଇ ସିପିଇସି ନିର୍ମାଣ ହୋଇଥିବାରୁ ଏହା ଭାରତର ସାର୍ବଭୌମତ୍ବକୁ ଉଲ୍ଲଙ୍ଘନ କରୁଥିବା ନୂଆଦିଲ୍ଲୀ ଅଭିଯୋଗ କରିଛି। ଭାରତର ଅଭିଯୋଗକୁ ଖଣ୍ଡନ କରି ଚୀନ କହିଛି ଯେ ସମଗ୍ର ଜାମ୍ମୁ-କାଶ୍ମୀର ଏକ ବିବାଦୀୟ ଅଞ୍ଚଳ। ଚୀନ ବୈଦେଶିକ ମନ୍ତ୍ରଣାଳୟ ମୁଖପାତ୍ର ଲୁ କାଙ୍ଗ କହିଥିଲେ ଯେ ସିପିଇସି ଏକ ଅର୍ଥନୈତିକ ପ୍ରକଳ୍ପ। ଏହା ପଛରେ କୌଣସି ତୃତୀୟ ଦେଶକୁ କ୍ଷତି ପହଞ୍ଚାଇବାର ଉଦ୍ଦେଶ୍ୟ ନାହିଁ। ଭାରତର ଅଭିଯୋଗ ଦ୍ବାରା ଜାମ୍ମୁ-କାଶ୍ମୀର ପ୍ରତି ଚୀନର ଦୃଷ୍ଟିକୋଣରେ କୌଣସି ପରିବର୍ତ୍ତନ ହେବାର ନାହିଁ ବୋଲି କାଙ୍ଗ କହିଥିଲେ।