ସହରାଞ୍ଚଳ ସ୍ଥାନୀୟ ସଂସ୍ଥା କର୍ମଚାରୀଙ୍କ ପାଇଁ ନୂତନ ପେନସନ ବ୍ୟବସ୍ଥା ଉପରେ କର୍ମଶାଳା

ଡେସ୍କ: ଭୁବନେଶ୍ୱର ରାଜ୍ୟ ସହରାଞ୍ଚଳ ଉନ୍ନୟନ ସଂସ୍ଥାର ସମ୍ମିଳନୀ କକ୍ଷରେ ସହରାଞ୍ଚଳ ସ୍ଥାନୀୟ ସଂସ୍ଥାର କର୍ମଚାରୀଙ୍କ ପାଇଁ ନୂଆ ପେନସନ ବ୍ୟବସ୍ଥାର କାର୍ଯ୍ୟକାରିତା ଉପରେ ଏକ କର୍ମଶାଳା ଅନୁଷ୍ଠିତ ହୋଇଯାଇଛି। ଏହି ପ୍ରଶିକ୍ଷଣ କାର୍ଯ୍ୟକ୍ରମର ଉଦ୍ଦେଶ୍ୟ ହେଉଛି ୟୁଏଲବିର ପ୍ରମୁଖ ଆର୍ଥିକ କର୍ମଚାରୀଙ୍କ ମଧ୍ୟରେ ଏନପିଏସ ଢାଞ୍ଚାର ବୁଝାମଣା ବୃଦ୍ଧି କରିବା, ପୌର କର୍ମଚାରୀଙ୍କ ପାଇଁ ପେନସନ ଯୋଜନାର ପ୍ରଭାବଶାଳୀ କାର୍ଯ୍ୟକାରିତା ଏବଂ ପରିଚାଳନା ସୁନିଶ୍ଚିତ କରିବା ।

ଏହି କାର୍ଯ୍ୟକ୍ରମରେ ରାଜ୍ୟର ୫ଟି ମହାନଗର ନିଗମ ଓ ୩୫ଟି ପୌରପାଳିକା ସମେତ ୪୦ଟି ସହରାଞ୍ଚଳ ସ୍ଥାନୀୟ ସଂସ୍ଥାର ଆକାଉଣ୍ଟାଣ୍ଟମାନେ ଅଂଶଗ୍ରହଣ କରିଥିଲେ। ଏଥିରେ ପେନସନ ସମ୍ବନ୍ଧୀୟ ଆର୍ଥିକ ବ୍ୟବସ୍ଥାକୁ ଦକ୍ଷତାର ସହ ପରିଚାଳନା କରିବା, ସମସ୍ତ ପୌର କର୍ମଚାରୀଙ୍କ ପାଇଁ ଦୀର୍ଘମିଆଦୀ ଆର୍ଥିକ ନିରାପତ୍ତା ସୁନିଶ୍ଚିତ କରିବା ଓ ୟୁଏଲବି କର୍ମଚାରୀଙ୍କୁ ପ୍ରସ୍ତୁତ କରିବା ଉପରେ ଆଲୋଚନା କରାଯାଇଥିଲା।

ଏହି କର୍ମଶାଳାକୁ ପୌର ପ୍ରଶାସନ ନିର୍ଦ୍ଦେଶକ ଦେବାଶିଷ ସିଂହ ଉଦଘାଟନ କରି ୟୁଏଲ୍ବି କର୍ମଚାରୀଙ୍କ ପାଇଁ ଏକ ସ୍ଥାୟୀ ଏବଂ ସ୍ୱଚ୍ଛ ପେନସନ୍ ବ୍ୟବସ୍ଥା ସୁନିଶ୍ଚିତ କରିବାରେ ନୂତନ ପେନସନ୍ ବ୍ୟବସ୍ଥାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଆର୍ଥିକ ପରାମର୍ଶଦାତା ଶିଖା ବିଶ୍ୱାଳ ଏନପିଏସର ପ୍ରମୁଖ ଦିଗ ଉପରେ ଆଲୋକପାତ କରିବା ସହ କର୍ମଚାରୀଙ୍କ ଅବଦାନ ପରିଚାଳନା ଏବଂ ଉପଯୁକ୍ତ ପାଣ୍ଠି ପରିଚାଳନାରେ ୟୁଏଲବି ଆକାଉଣ୍ଟାଣ୍ଟଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ। ସୁଡାର ପ୍ରକଳ୍ପ ନିର୍ଦ୍ଦେଶକ ରବୀନ୍ଦ୍ର କୁମାର ସାହୁ ତାଙ୍କ ଅଭିଭାଷଣରେ ଏନପିଏସକୁ ସୁରୁଖୁରୁରେ ପରିଚାଳନା କରିବା ପାଇଁ ୟୁଏଲବିରେ ଦକ୍ଷତା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲେ। ଉପଯୁକ୍ତ ପ୍ରଶିକ୍ଷଣ ଦ୍ୱାରା ଉନ୍ନତ ଆର୍ଥିକ ପରିଚାଳନା ଏବଂ ଉତ୍ତରଦାୟିତ୍ୱ ମିଳିପାରିବ, ଯାହା ପେନସନ ବ୍ୟବସ୍ଥାର ସଫଳତା ପାଇଁ ଆବଶ୍ୟକ ବୋଲି ସେ ଗୁରୁତ୍ୱାରୋପ କରିଥିଲେ।