ସମାଜ: ଘରୋଇ ଉପଲବ୍ଧତା ବଢ଼ାଇବା ଓ ଏହାର ମୂଲ୍ୟ ନିୟନ୍ତ୍ରଣରେ ରଖିବା ପାଇଁ କେନ୍ଦ୍ର ସରକାର ପିଆଜ ରପ୍ତାନି ଉପରେ ନିଷେଧାଦେଶ ସମୟ ବୃଦ୍ଧି କରିଛନ୍ତି। ଏହାପୂର୍ବରୁ ଚଳିତ ମାସ ୩୧ ତାରିଖ ପର୍ଯ୍ୟନ୍ତ ରପ୍ତାନି ଉପରେ ନିଷେଧାଦେଶ ଜାରି କରାଯାଇଥିବା ବେଳେ ପରବର୍ତ୍ତୀ ନିର୍ଦେଶ ପର୍ଯ୍ୟନ୍ତ ଏହା ବଳବତ୍ତର ରହିବ। ଗତ ଶୁକ୍ରବାର ବିଦେଶ ବ୍ୟାପାର ମହାନିର୍ଦେଶାଳୟ (ଡିଜିଏଫ୍ଟି) ପକ୍ଷରୁ ଏହି କଟକଣା ବୃଦ୍ଧି କରାଯାଇଛିି। ଡିଜିଏଫ୍ଟି ହେଉଛି କେନ୍ଦ୍ର ସରକାରଙ୍କ ଏକ ଶାଖା, ଯାହା ରପ୍ତାନି ଓ ଆମଦାନୀ ସମ୍ପର୍କିତ ପ୍ରସଙ୍ଗ ସହ ଜଡ଼ିତ। ଡିସେମ୍ବର ୨୦୨୩ ଡିସେମ୍ବର ୮ରେ କେନ୍ଦ୍ର ସରକାର ପିଆଜ ରପ୍ତାନି ଉପରେ ପ୍ରତିବନ୍ଧକ ଲଗାଇଥିଲେ। ତେବେ ଆନ୍ତଃ ମନ୍ତ୍ରିମଣ୍ଡଳର ଅନୁମୋଦନ ପରେ ମିତ୍ର ରାଷ୍ଟ୍ରଙ୍କୁ ପିଆଜ ରପ୍ତାନି ପାଇଁ ଅନୁମତି ରହିଛି। ଫଳରେ ରାଷ୍ଟ୍ରୀୟ ସମବାୟ ରପ୍ତାନି ଲିମିଟେଡ୍ (ଏନସିଏଲ) ମାଧ୍ୟମରେ ୟୁଏଇ ଏବଂ ବାଂଲାଦେଶକୁ ୬୪,୪୦୦ ଟନ୍ ପିଆଜ ରପ୍ତାନି କରିବାକୁ ସରକାର ଅନୁମତି ଦେଇଛନ୍ତି।
ଏହା ପୂର୍ବରୁ ୨୦୨୩ ଅକ୍ଟୋବରରେ ଗ୍ରାହକଙ୍କ ପାଇଁ ଖୁଚୁରା ବଜାରରେ କେନ୍ଦ୍ର ସରକାର କିଲୋଗ୍ରାମ ପିଛା ୨୫ ଟଙ୍କା ରିଆତିରେ ପିଆଜ ବିକ୍ରି କରିବାକୁ ଅନୁମତି ଦେଇଥିଲେ। ଦେଶରେ ପିଆଜ ମୂଲ୍ୟ ନିୟନ୍ତ୍ରଣରେ ରଖିବା ପାଇଁ କେନ୍ଦ୍ର ସରକାର ୨୦୨୩ ଅକ୍ଟୋବର ୨୮ରୁ ଡିସେମ୍ବର ୩୧ ପର୍ଯ୍ୟନ୍ତ ପିଆଜ ରପ୍ତାନି ଉପରେ ଟନ୍ ପିଛା ସର୍ବନିମ୍ନ ରପ୍ତାନି ମୂଲ୍ୟ ଧାର୍ଯ୍ୟ କରିଥିଲେ। ଅଗଷ୍ଟରେ, ୩୧ ଡିସେମ୍ବର ୨୦୨୩ ପର୍ଯ୍ୟନ୍ତ ପିଆଜ ଉପରେ ୪୦ ପ୍ରତିଶତ ରପ୍ତାନି ଶୁଳ୍କ ଲାଗୁ କରାଯାଇଥିଲା।
Comments are closed.