ଧାମରା : ଭଦ୍ରକ ଜିଲା ବାଂଶଡା ଥାନା ଅର୍ନ୍ତଗତ ଚରଦିଆ ପଞ୍ଚାୟତରେ ବିଷାକ୍ତ ମଦ୍ୟପାନ କରି ଗୁରୁବାର ଜଣଙ୍କର ମୃତ୍ୟୁ ହୋଇଛି। ମୃତକ ଜଣଙ୍କ ଚରଦିଆ ଗ୍ରାମର ମହେଶ୍ୱର ମାଝି(୩୬)। ମହେଶ୍ବରଙ୍କ ମୃତ୍ୟୁକୁ ନେଇ ସ୍ଥାନୀୟ ଲୋକେ ଚରଦିଆ-ଚାନ୍ଦବାଲି ରାସ୍ତା ଅବରୋଧ କରିବା ସହ ପରିବାର ପାଇଁ ସରକାରୀ ସହାୟତା ଦାବି କରିଛନ୍ତି।
ସୂଚନା ଅନୁସାରେ, ବୁଧବାର ବିଳମ୍ବିତ ରାତିରେ ମହେଶ୍ୱର ଚରଦିଆ ପଞ୍ଚାୟତରେ ଚୋରାରେ ବିକ୍ରି ହେଉଥିବା ମଦ ପିଇ ନିଜ ଘରକୁ ଫେରିଥିଲେ। ଘରକୁ ଫେରି ନିଶାସକ୍ତ ଅବସ୍ଥାରେ ସେ ଶୋଇଥିଲେ। ଗୁରୁବାର ସକାଳ ସମୟରେ ସେ ବିଛଣାରୁ ନ ଉଠିବାରୁ ତାଙ୍କ ସ୍ତ୍ରୀ ତାଙ୍କୁ ଉଠାଇବାକୁ ଚେଷ୍ଟା କରିଥିବା ବେଳେ ମହେଶ୍ୱରଙ୍କ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ। ପରେ ଏ ନେଇ ତାଙ୍କ ପରିବାର ପକ୍ଷରୁ ବାଂଶଡା ଥାନାରେ ଏକ ଏତଲା ଦିଆ ଯାଇଛି।
ଚରଦିଆ ପଞ୍ଚାୟତରେ ଦିନକୁ ଦିନ ଚୋରା ମଦର କାରବାର ବୃଦ୍ଧି ପାଉଥିବା ସ୍ଥାନୀୟ ବାସୀ ଅଭିଯୋଗ କରିଛନ୍ତି। ତେଣୁ ଏହି ଚୋରା ମଦ ବେପାରକୁ ବନ୍ଦ କରିବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ପଞ୍ଚାୟତବାସୀ କହିଛନ୍ତି।
ଏହି ଘଟଣଟାରେ ବାଂଶଡ଼ା ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣା ପଡିବ ବୋଲି ବାଂଶଡା ଥାନାଅଧିକାରୀ ରମେଶ ସିଂହ କହିଛନ୍ତି।
