ମୋହନା : ମୋହନା ଥାନା ଅନ୍ତର୍ଗତ ଚନ୍ଦ୍ରଗିରି-ଅନ୍ତର୍ବା ରାସ୍ତାର ଜଗନ୍ନାଥପୁର ଛକ ନିକଟରୁ ୫୦୦ମିଟର ଦୂର ଏକ ମକା ବାଡରେ ଜଣେ ଅଜଣା ଯୁବକଙ୍କୁ କିଛି ଦୁବୃର୍ତ୍ତ ସଂଘବଦ୍ଧ ଭାବେ ହତ୍ୟା କରିଥିବା ଜଣାପଡିଛି । ହାତକୁ ପ୍ୟାଣ୍ଟ ବେଲ୍ଚ, ଗୋଡ଼କୁ ଜୋତାର ଲେସ(ଦଉଡ଼ି) ଓ ମୁହଁକୁ କପଡାରେ ଘୋଡାଇ ଅତି ନିର୍ମମ ଭାବେ ହତ୍ୟା କରିଛନ୍ତି। ତାଙ୍କ ମୁହଁରେ ରକ୍ତର ଛିଟା ଲାଗିଥିବା ବେଳେ ଛାତିରେ ଆଘାତ ଲାଗିଥିବା ଥାନା ପକ୍ଷରୁ ସୂଚନା ମିଳିଛି । ଗୁରୁବାର ଦିନ ଏହି ଘଟଣା ଘଟିଛି । ଯୁବକ ଜଣକ ମାଟିରେ ମୁହଁ ମାଡି ପଡିରହିଥିବା ଦେଖି କିଛି ସ୍ଥାନୀୟ ଲୋକ ଚନ୍ଦ୍ରଗିରି ଫାଣ୍ଡିକୁ ଖବର ଦେଇଥିଲେ । ଖବର ପାଇ ଫାଣ୍ଡି ଅଧିକାରୀ ନିରଞ୍ଜନ ପାଣିଗ୍ରାହୀ ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିବା ପରେ ମୋହନା ଥାନା ଅଧିକାରୀ ସୁଜିତ କୁମାର ନାୟକ ଓ କର୍ମଚାରୀ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି । ମୃତ ଯୁବକଙ୍କର ପରିଚୟ ମିଳିନାହିଁ । ଘଟଣାସ୍ଥଳରୁ ୧୦୦ ମିଟର ଦୂରରେ ଯୁବକଙ୍କର ହେଲମେଟ୍ ଓ ଏକ କପଡା ବ୍ୟାଗ ପଡ଼ିରହିଥିବା ଦେଖିବାକୁ ମିଳିଛି। ଛତ୍ରପୁରରୁ ସାଇଣ୍ଟିଫିକ ଟିମ ଆସି ତଦନ୍ତ କରିବାପରେ ସତ୍ୟାସତ୍ୟ ଜଣାପଡିବ ବୋଲି ଥାନା ଅଧିକାରୀ କହିଛନ୍ତି । ପଞ୍ଚାୟତ ନିର୍ବାଚନ ସରୁ ସରୁ ଏଭଳି ଏକ ଅଭାବନୀୟ ଘଟଣା ଚନ୍ଦ୍ରଗିରି ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି ।
Popular Categories
Previous article
Next article