ନୂଆଦିଲ୍ଲୀ – କୋଭିଡ୍ର ଚାରି ବର୍ଷ ପରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପକ୍ଷରୁ ଦ୍ୱିତୀୟ ସତର୍କ ସୂଚନା ଜାରି କରାଯାଇଛି । କୌଣସି ସମୟରେ ଆଉ ଏକ ମହାମାରୀ ବ୍ୟାପି ପାରେ ବୋଲି ବିଶ୍ୱସ୍ୱାସ୍ଥ୍ୟ ସଙ୍ଗଠନ କହିଛି । ଏବେ ପୁଣି ବିପଦର ସଙ୍କେତ ଥିବା କଥା କୁହାଯାଇଛି । ଏହି ଭାଇରସ୍ ବା ଭୁତାଣୁର ନାମ ଏକ୍ସ ରଖାଯାଇଛି । କୋଭିଡ୍ଠାରୁ ଏହା ୨୦ ଗୁଣ ମାରାତ୍ମକ ।
ମାର୍ଚ୍ଚ ୧୧, ୨୦୨୦ କରୋନାକୁ ମହାମାରୀ ଭାବେ ଘୋଷଣା କରାଯାଇଥିଲା । ୟୁନାଇଟେଡ୍ କିଙ୍ଗଡମ୍ ବା ୟୁକେରେ ଏବେ ଏକ ସଂକ୍ରାମକ ଭୁତାଣୁ ମିଳିବାର ସୂଚନା ପରେ ଏପରି ଆଲର୍ଟ ବା ସତର୍କତା ଜାରି କରାଯାଇଛି । ସେଠାରେ ସଂକ୍ରାମକ ରୋଗର ବିଶେଷଜ୍ଞମାନେ ଏହି ସୂଚନା ଦେଇଛନ୍ତି । ଏହା ବେଶ୍ ଚିନ୍ତା ଜନକ ବୋଲି ସେମାନେ କହିଛନ୍ତି ।
ପଶୁଙ୍କଠାରୁ ଏହା ମଣିଷଙ୍କୁ ବ୍ୟାପୁଛି । ଦ୍ରୁତ ଗତିରେ ଏହା ସଂକ୍ରମଣ କରୁଥିବା ବେଳେ ସାରା ଦୁନିଆଁକୁ ବ୍ୟାପିଯାଇ ପାରେ । କିଙ୍ଗସ୍ କଲେଜ ଅଫ୍ ଲଣ୍ଡନର ସଂକ୍ରାମକ ରୋଗ ବିଶେଷଜ୍ଞ ଡକ୍ଟର ନଥଲୀ ମୈକଡରମାଟ୍ ଏ ବିଷୟରେ ସୂଚନା ଦେଇଛନ୍ତି । ଆସନ୍ତା ଦୁଇ ବର୍ଷରୁ ୨୦ ବର୍ଷ ମଧ୍ୟରେ ଏହା ସାରା ବିଶ୍ୱକୁ କବଳିତ କରିପାରେ ବୋଲି ସେ କହିଛନ୍ତି ।
ଏଥିପାଇଁ ପ୍ରସ୍ତୁତ ରହିବା ଏବଂ ଏହାକୁ ରୋକିବା ପାଇଁ ସବୁସ୍ତରରେ କାମ କରିବା ଉଚିତ୍ ବୋଲି ସେ ସୂଚନା ଦେଇଛନ୍ତି । ଏବେ ବିଶ୍ୱତାପାୟନ ବୃଦ୍ଧି ଏବଂ ପରିବେଶ ପ୍ରଦୁଷଣ ହେଉଥିବାରୁ ଏପରି ହେଉଛି ବୋଲି ସେ କହିଛନ୍ତି ।
ଜଙ୍ଗଲ କାଟି ଦେଉଥିବାରୁ ବିଭିନ୍ନ ଜୀବ ଏବଂ କୀଟ ପତଙ୍ଗ ମଣିଷ ନିକଟକୁ ଆସୁଛନ୍ତି । ସେମାନଙ୍କ ନିକଟରୁ ବିଭିନ୍ନ ଭୁତାଣୁ ମଣିଷ ଶରୀରରେ ପ୍ରବେଶ କରୁଛି । ଏବେ ମଣିଷ କମ୍ ସମୟରେ ଗୋଟିଏ ସ୍ଥାନରୁ ଅନ୍ୟସ୍ଥାନକୁ ସହଜରେ ଯାଇ ପାରୁଥିବାରୁ ତା ସହ ରୋଗ ମଧ୍ୟ ସହଜରେ ସଂକ୍ରମିତ ହେଉଛି।
