ଟିଟିଲାଗଡ଼ – ଟିଟିଲାଗଡ଼ ସହରରେ ତାପମାତ୍ରା ୪୪ ଡିଗ୍ରୀକୁ ଛୁଇଁଲାଣି। ଲୋକେ ପ୍ରଚଣ୍ଡ ଗରମରେ ତ୍ରାହି ତାହି ଡାକ ଛାଡ଼ୁଛନ୍ତି। ଝାଞ୍ଜି ପବନ ଜନଜୀବନକୁ ଅସ୍ତବ୍ୟସ୍ତ କରି ପକାଉଛି।
ସକାଳ ୭ଟାରୁ ତାପମାତ୍ରା ବୃଦ୍ଧି ହୋଇ ମଧ୍ୟ ରାତ୍ରୀ ପର୍ଯ୍ୟନ୍ତ ଝାଞ୍ଜି ପବନ ବହୁଛି । ଘର କାନ୍ଥ, ଆସବାବ ପତ୍ର ସହ , ପାନୀୟ ଜଳ ତାତୁଛି । ପୂର୍ବାହ୍ନ ୧୦ଟାରୁ ତାତି ନେଇ ସହର ଖାଁ ଖାଁ ଲାଗୁଛି। ହେଲେ ନିୟମିତ ଅନ୍ତରରେ ବିଦ୍ୟୁତ କାଟ ନେଇ ଲୋକଙ୍କ ଘରେ ମଧ୍ୟ ଆଶ୍ବସ୍ତି ନାହିଁ। ରାତ୍ରୀ ସାରା ଘଣ୍ଟା ଘଣ୍ଟା ଧରି ବିଦ୍ୟୁତ କାଟ ନେଇ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଛନ୍ତି।
ବିଦ୍ୟୁତ ଭଳି ଜରୁରୀ ସେବାର ଜନ ସମସ୍ୟା ନେଇ ଟିଟିଲାଗଡ଼ ବାର ସଂଘ ପକ୍ଷରୁ ସଭାପତି ସଞ୍ଜୟ ବେହେରାଙ୍କ ନେତୃତ୍ୱରେ ସ୍ଥାନୀୟ ବିଦ୍ୟୁତ କମ୍ପାନୀ ଟାଟା ନିର୍ବାହୀ ଯନ୍ତ୍ରୀ ବିନାୟକ ରାଉତଙ୍କୁ ଘେରିଥିଲେ। ଏଭଳି ଅବହେଳା ଜାରି ରହିଲେ ଆଗକୁ ଆନ୍ଦୋଳନର ରାସ୍ତା ଗ୍ରହଣ କରାଯିବ ବୋଲି ଆଇନଜୀବୀ କହିଛନ୍ତି। ସମସ୍ୟାର ସ୍ଥାୟୀ ନିରାକରଣ ନେଇ ଟିଟିଲାଗଡ଼ ଠାରେ ପ୍ରସ୍ତାବିତ ୧୩୩କେଭି ବିଦ୍ୟୁତ ଗ୍ରୀଡ଼ ସ୍ଥାପନ ପାଇଁ ଦାବୀ କରାଯାଇଛି ।
