ଭବାନୀପାଟଣା: ଜଗତ ସାରା ତିନିଠାକୁର ରଥେ ବିଜେ କରି ଭକ୍ତଙ୍କ ଗହଣରେ ମନ୍ଦିରକୁ ବାହୁଡ଼ି ଆସିବାର ପରମ୍ପରା ରହିଛି। ହେଲେ କଳାହାଣ୍ଡିର ଉପାନ୍ତ ଅଞ୍ଚଳ ଗୋତୋମୁଣ୍ଡା ଗାଁରେ ଅନୁଷ୍ଠିତ ବାହୁଡ଼ା ଯାତ୍ରା ବେଳେ ତିନି ଠାକୁର ଦେବାଦେବୀଙ୍କ ପ୍ରତୀକ ଲାଠି ମାନଂକ ଗହଣରେ ମନ୍ଦିରକୁ ଫେରିବାର ଏକ ନିଆରା ପରମ୍ପରା ରହିଛି। ସେହି ଅନୁଯାୟୀ ଆଜି ଗୋତୋମୁଣ୍ଡା ଗାଁରେ ଦେବାଦେବୀଙ୍କ ପ୍ରତୀକ ଲାଠି ମାନଂକ ଗହଣରେ ମାଉସୀ ମାଁ ମନ୍ଦିରରୁ ମୁଖ୍ୟ ମନ୍ଦିରକୁ ଫେରିଥିଲେ।
ପରମ୍ପରା ଅନୁଯାୟୀ ଗଡ଼ଜାତ ସମୟର ଦଣ୍ଡପାଟ ଅଞ୍ଚଳ ଏବଂ ଆଖପାଖ ଅଂଚଳର ଗ୍ରାମ ଦେବାଦେବୀଙ୍କ ପ୍ରତୀକ ଲାଠି, କୁର୍ଷି ବା ସିଂହାସନ ଗୁଡ଼ିକ ବାହୁଡ଼ା ଯାତ୍ରା ଅବସରରେ ଗୋତୋମୁଣ୍ଡା ଗ୍ରାମ ଦେବୀଙ୍କ ମେଲଣ ପଡ଼ିଆରେ ଆଜି ଏକାଠି ହେଇଥିଲେ। ସେଠାରୁ ପଟୁଆରରେ ମାଉସୀ ମାଁ ମନ୍ଦିରକୁ ଯାଇ ମୁଖ୍ୟ ମନ୍ଦିରକୁ ଫେରିବାକୁ ତିନି ଠାକୁରଙ୍କୁ ନିମନ୍ତ୍ରଣ କରିଥିଲେ। ଏହାପରେ ପ୍ରଭୁ ଜଗନ୍ନାଥ, ବଳଭଦ୍ର ଏବଂ ଦେବୀ ସୁଭଦ୍ରା ରଥାରୂଢ଼ ହେଇ ମନ୍ଦିରକୁ ଫେରିଥିଲେ। ରଥକୁ ସୁରକ୍ଷା ଦେଇ ଲାଠି ଗୁଡ଼ିକ ମନ୍ଦିର ଯାଏଁ ଆସିଥିଲେ। ଏହି ଅବସରରେ କୋକସରା, ଆମପାଣି, ଧର୍ମଗଡ ପ୍ରଭୃତି ଅଞ୍ଚଳ ସମେତ ପଡୋଶୀ ଛତିଶଗଡ ଅଞ୍ଚଳରୁ ବହୁ ସଂଖ୍ୟାରେ ଭକ୍ତଙ୍କ ସମାଗମ ହେଇଥିଲା।
Comments are closed.