ସମ୍ବଲପୁର: ଶୁକ୍ରବାର ସମ୍ବଲପୁର ସାଂସଦ ତଥା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦ୍ୱାରା ବିଭିନ୍ନ ସୌନ୍ଦର୍ଯ୍ୟକରଣ ପ୍ରକଳ୍ପ ଗୁଡିକର ଉଦଘାଟନ କରାଯାଇଛି। ସମ୍ବଲପୁର ରୁ ବରଗଡ଼କୁ ସଂଯୋଗ କରୁଥିବା ରାସ୍ତାରେ ସ୍ୱାଗତମ / ଧନ୍ୟବାଦ ସମ୍ବଲପୁର ତ୍ୱରଣ (ଜାତୀୟ ରାଜପଥ), ଝାରସୁଗୁଡାକୁ ସଂଯୋଗ କରୁଥିବା ରାସ୍ତାରେ ସ୍ୱାଗତମ / ଧନ୍ୟବାଦ ତ୍ୱରଣ (ରାଜ୍ୟ ରାଜପଥ) ଏବଂ ସମ୍ବଲପୁରର ଦୁର୍ଗାପାଲି ଛକରେ (ଜାତୀୟ ରାଜପଥ) ଜୁହାର ନବ ଆକୃତି କୁ ଉଦଘାଟନ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କରିଛନ୍ତି। ଏହି ସୌନ୍ଦର୍ଯ୍ୟକରଣ ପ୍ରକଳ୍ପ ଗୁଡିକ ସମ୍ବଲପୁରକୁ ରାଜ୍ୟର ଆକର୍ଷଣୀୟ ସହର ରୂପେ ପରିଣତ କରିବାରେ ମୁଖ୍ୟ ଭୂମିକା ଗ୍ରହଣ କରିବା ସହିତ ନୁତନ ରୂପ ଦେବ। ଏହି ସମସ୍ତ ସୌନ୍ଦର୍ଯ୍ୟକରଣ ପ୍ରକଳ୍ପ ଗୁଡିକୁ ବର୍ଜ ବସ୍ତୁ ଗୁଡିକରୁ ନିର୍ମାଣ କରାଯାଇଛି। ସମ୍ବଲପୁରର ସଂସ୍କୃତି, ଲୋକକଳା, ପରମ୍ପରା ଏବଂ ଐତିହ୍ୟକୁ ଏହି ପ୍ରକଳ୍ପ ଗୁଡିକରେ ପ୍ରତିଫଳିତ କରାଯାଇଛି। ଯାହାକି ଆଗାମୀ ଦିନରେ ସମ୍ବଲପୁରର ଐତିହ୍ୟକୁ ଜାତୀୟ ରାଜପଥରେ ପ୍ରତିଫଳନ କରିବ।
ଆଗାମୀ ଦିନରେ ସମ୍ବଲପୁରକୁ ସୁନ୍ଦର ଓ ଆଧୁନିକ କରିବା ଦିଗରେ ଅନେକ ପଦକ୍ଷେପ ନିଆଯାଉଛି ବୋଲି ଶ୍ରୀ ପ୍ରଧାନ ଏହି ଅବସରରେ କହିଛନ୍ତି। ଏହି ଅବସରରେ ରାଜ୍ୟ ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାଏକ, ସମ୍ବଲପୁର ବିଧାୟକ ଜୟନାରାୟଣ ମିଶ୍ର, ପୁର୍ବତନ ବିଧାୟକ ନାଉରୀ ନାଏକ, ଉତ୍ତରାଞ୍ଚଳ ରାଜସ୍ୱ ଆୟୁକ୍ତ ସଚିନ ରାମଚନ୍ଦ୍ର ଜାଧବ, ଉତ୍ତରାଞ୍ଚଳ ପୁଲିସ ରେଞ୍ଜ ଆଇଜି ହିମାଂଶୁ ଲାଲ, ସମ୍ବଲପୁର ଜିଲାପାଳ ସିଦ୍ଧେଶ୍ବର ବଳିରାମ ବୋନ୍ଦର, ଜିଲା ପୁଲିସ ଆରକ୍ଷୀ ଅଧିକ୍ଷକ ମୁକେଶ ଭାମୁ, ସମ୍ବଲପୁର ମହାନଗର ନିଗମ ଆୟୁକ୍ତ ବେଦ ଭୂଷଣଙ୍କ ସମେତ ଅନ୍ୟ ମାନେ ଉପସ୍ଥିତ ରହିଥିଲେ।
