ଆଠଗଡ: ଆଠଗଡ଼ର ଅନ୍ୟତମ ଅଗ୍ରଣୀ ସ୍ବେଛାସେବୀ ସଂଗଠନ ‘ଜଷ୍ଟ ଫର ୟୁ ସେବା ସଂଘ’ ପକ୍ଷରୁ ଶ୍ରୀ ଧବଳେଶ୍ଵରଙ୍କ ପଞ୍ଚକ ଓ ବଡଓଷା ଯାତ୍ରା ଅବସରରେ ବ୍ୟାପକ ସେବାମୂଳକ କାର୍ଯ୍ୟ ସମ୍ପାଦିତ ହୋଇଛି । ବାବା ଧବଳେଶ୍ଵରଙ୍କ ପୀଠରେ ଗତ ସୋମବାର ଠାରୁ ପାଞ୍ଚ ଦିନ ଧରି ଚାଲିଥିବା ପଞ୍ଚକ ଓ ବଡ ଓଷା ଯାତ୍ରାରେ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ସଂଗଠନ ପକ୍ଷରୁ ଭିଡ ନିୟନ୍ତ୍ରଣ, ଶ୍ରଦ୍ଧାଳୁଙ୍କ ଲାଡିରେ ଯାତାୟତ ସୁବିଧା, ବୟସ୍କ ଓ ଦିବ୍ୟାଙ୍ଗଙ୍କୁ ହ୍ୱିଲ୍ ଚେୟାରରେ ନେବା ଆଣିବା, ଅସୁସ୍ଥ ହୋଇ ପଡୁଥିବା ଶ୍ରଦ୍ଧାଳୁଙ୍କୁ ଅସ୍ଥାୟୀ ଆଶୁ ଚିକିତ୍ସା କେନ୍ଦ୍ରକୁ ନେବା ସହିତ ମନ୍ଦିର ପରିସରକୁ ପରିସ୍କାର ପରିଚ୍ଛନ କରିବା ଆଦି ସେବା କାର୍ଯ୍ୟ ଅତ୍ଯନ୍ତ ନିଷ୍ଠା ଓ ଆନନ୍ଦର ସହ କରାଯାଇଥିଲା । ଦେବୋତ୍ତର ପ୍ରଶାସନର ଅନୁମତି କ୍ରମେ ‘ଜଷ୍ଟ ଫର ଇୟୁ ସେବା ସଂଘ’ର ପ୍ରତିଷ୍ଠାତା ସଭାପତି ସୁଧାଂଶୁ ଶେଖର ସାହୁଙ୍କ ନେତୃତ୍ବରେ ଅନୁଷ୍ଠାନର ସଦସ୍ୟମାନେ ଏହି ପ୍ରସିଦ୍ଧ ପଞ୍ଚକ ଓ ବଡ ଓଷା ସମୟରେ ପୀଠରେ ୪ଦିନ ରହି ଦିନରାତି ସେବା ଯୋଗାଇଥିଲେ । ସେମାନଙ୍କର ଏହି ନିସ୍ୱାର୍ଥପର ସେବା କାର୍ଯ୍ୟକୁ ସବୁ ମହଲରେ ପ୍ରଶଂସା କରାଯାଇଛି ।
Comments are closed.