ଆଠଗଡ: ଆଠଗଡ ତାଲୁକ ଆଇନ ସେବା ସମିତି ଆନୁକୂଲ୍ୟରେ ଦାଦନ ଶ୍ରମିକଙ୍କ ପାଇଁ ଏକ ଆଇନ ସଚେତନତା ଶିବିର ବୁଧବାର ସକାଳେ ଅନୁଷ୍ଠିତ ହୋଇଯାଇଛି । ସ୍ଥାନୀୟ ବ୍ଲକ କାର୍ଯ୍ୟାଳୟ ସମ୍ମିଳନୀ କକ୍ଷରେ ବୁଧବାର ଆୟୋଜିତ ଏହି ସଭାରେ ମୁଖ୍ଯଅତିଥି ଭାବେ ଆଇନ ସେବା ସମିତିର ଅଧ୍ୟକ୍ଷ ତଥା ଅତିରିକ୍ତ ଜିଲ୍ଲା ଓ ଦୌରାଜଜ ରାଜକୁମାର ଦାସ ଯୋଗଦେଇ ଆମ ଦେଶରେ ଦାଦନ ଶ୍ରମିକଙ୍କର ବହୁ ସମସ୍ୟା ରହିଛି ବୋଲି ପ୍ରକାଶ କରିଥିଲେ । ଆମ ଦେଶର ବିଭିନ୍ନ ପ୍ରଦେଶରେ ଦାଦନ ଶ୍ରମିକମାନଙ୍କର ରହିଥିବା ବିବିଧ ସମସ୍ୟା ଓ ସେଗୁଡିକର ସମାଧାନ ନିମନ୍ତେ ଆଇନରେ ଥିବା ବ୍ୟବସ୍ଥା ସମ୍ପର୍କରେ ଏଡିଜେ ଶ୍ରୀ ଦାସ ବିସ୍ତୃତ ଭାବେ ଆଲୋକପାତ କରିଥିଲେ । ଶ୍ରମିକ ମାନେ ଯେ କୌଣସି ସମସ୍ୟାର ସମ୍ମୁଖୀନ ହେଲେ ଅଦାଲତର ଦ୍ବାରସ୍ଥ ହୋଇପାରିବେ ଏବଂ ସେମାନଙ୍କୁ ଆଇନ ସେବା ସମିତି ପକ୍ଷରୁ ବିନା ମୂଲ୍ୟରେ ଆଇନସେବା ଯୋଗାଇ ଦିଆଯାଇପାରିବ ବୋଲି ବିଚାରପତି ଶ୍ରୀ ଦାସ ସୂଚାଇ ଦେଇଥିଲେ। ଆଠଗଡ ଓକିଲ ସଂଘ ସଭାପତି ସତ୍ୟେନ ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ଏହି ଶିବିରରେ ମୁଖ୍ଯବକ୍ତା ଭାବେ ଆଇନଜୀବୀ ପ୍ରସନ୍ନ କୁମାର ରାଉତ, ସମ୍ମାନିତ ବକ୍ତା ରୂପେ ଆଇନଜୀବୀ ଶ୍ରୀନିବାସ ଦାସ ଓ ସୁପ୍ରଭା ଦୋରା ନିଜ ନିଜ ବକ୍ତବ୍ଯରେ ଆମ ଦେଶର ବିକାଶ କ୍ଷେତ୍ରରେ ଶ୍ରମିକମାନଙ୍କର ସବୁଠାରୁ ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ପ୍ରକାଶ କରିଥିଲେ । ଶ୍ରମିକ ବା ଦାଦନ ଶ୍ରମିକଙ୍କ ସୁରକ୍ଷା ଓ ମୌଳିକ ଅଧିକାର, ଦାଦନ ଶ୍ରମିକ ନିୟନ୍ତ୍ରଣ ଆଇନ ମାଧ୍ୟମରେ ମିଳୁଥିବା ସୁବିଧା, ସୁଯୋଗ ଓ ଆଇନଗତ ଅଧିକାର ବିଷୟରେ ସେମାନେ ପ୍ରାଞ୍ଜଳ ଭାବେ ବୁଝାଇଥିଲେ। ଏହି ଶିବିରରେ ପଶ୍ଚିମବଙ୍ଗ ଓ ଅନ୍ୟ ପ୍ରଦେଶରୁ ଆସି ଏଠାରେ କୁଶଳୀ ଓ ଅଶକୁଶଳୀ ଶ୍ରମିକ ଭାବେ କାର୍ଯ୍ୟ କରୁଥିବା ବହୁ ଶ୍ରମିକ, ଠିକଦାର ଓ ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟ ଯୋଗ ଦେଇଥିଲେ।
Comments are closed.