ଭୁବନେଶ୍ବର: ଆୟୁଷ କ୍ଷେତ୍ରରେ ନୂଆ ପଦ ସୃଷ୍ଟି ସହିତ ନିଯୁକ୍ତି ଦାବିରେ ଗୁରୁବାରଠୁ ସମସ୍ତ ଆୟୁଷ ଛାତ୍ରଛାତ୍ରୀ ମହାବିଦ୍ୟାଳୟ ବର୍ଜନ କରିବେ। ଗତ ୨୫ ତାରିଖରୁ ରାଜ୍ୟରେ ଥିବା ୪ ହୋମିଓପାଥି ଭେଷଜ ମହାବିଦ୍ୟାଳୟ ଓ ୩ ଆୟୁର୍ବେଦ ଭେଷଜ ମହାବିଦ୍ୟାଳୟ ଛାତ୍ରଛାତ୍ରୀ କଳାବ୍ୟାଜ ପିନ୍ଧି ପଢୁଥିଲେ। ସରକାର ଏ ଦିଗରେ କୌଣସି ପଦକ୍ଷେପ ଗ୍ରହଣ ନ କରିବାରୁ ସମସ୍ତ ଛାତ୍ରଛାତ୍ରୀ ମହାବିଦ୍ୟାଳୟ ବର୍ଜନ କରିବେ। କେବଳ ପରୀକ୍ଷା କାର୍ଯ୍ୟରେ ନିୟୋଜିତ ଅଧିକାରୀଙ୍କ ବ୍ୟତୀତ ଅନ୍ୟ କୌଣସି ଅଧିକାରୀ ବା କର୍ମଚାରୀଙ୍କୁ ମହାବିଦ୍ୟାଳୟ ଭିତରକୁ ପ୍ରବେଶ କରିବାକୁ ଦିଆଯିବ ନାହିଁ ବୋଲି ଅଲ ଓଡ଼ିଶା ଆୟୁଷ ଛାତ୍ର ସଂଘ ପକ୍ଷରୁ ସୂଚନା ଦିଆଯାଇଛି। ଏହାପରେ ବି ଯଦି ସରକାର ସଂଘକୁ ଆଲୋଚନାକୁ ନ ଡାକନ୍ତି ଅବା ଦାବି ପୂରଣ ଦିଗରେ କୌଣସି ନିଷ୍ପତ୍ତି ନ ନିଅନ୍ତି ତେବେ ସଂଘ ପକ୍ଷରୁ ଆଗାମୀ ଦିନରେ ପଦକ୍ଷେପ ଗ୍ରହଣ କରାଯିବ ବୋଲି ସଂଘର ସଭାପତି ଡା. ରାଜେଶ ମିଶ୍ର ସୂଚନା ଦେଇଛନ୍ତି। ପ୍ରାୟ ୧୫ ଶହ ଛାତ୍ରଛାତ୍ରୀ ମହାବିଦ୍ୟାଳୟ ବର୍ଜନ କରିବେ। ସରକାର ଏ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରିବାକୁ ସଂଘ ପକ୍ଷରୁ କୁହାଯାଇଛି।
Comments are closed.