କଟକ: କିଟ୍ ବିଶ୍ବବିଦ୍ୟାଳୟ ବିଜୁ ପଟ୍ଟନାୟକ ଇନଡୋର ଷ୍ଟାଡ଼ିୟମରେ ଚାଲିଥିବା ୬୯ତମ ଜାତୀୟ ସିନିୟର (ପୁରୁଷ ମହିଳା) ଭଲିବଲ ଚମ୍ପିଆନସିପ୍ର ବାଳକ ବିଭାଗରେ ଓଡ଼ିଶା ଲଗାତାର ୪ର୍ଥ ବିଜୟ ହାସଲ କରିଛି। ଗ୍ରୁପ-ଏଫ୍ରେ ସ୍ଥାନ ପାଇଥିବା ଓଡ଼ିଶା ବାଳକ ଦଳ ରବିବାର ସକାଳେ ଖେଳିଥିବା ତୃତୀୟ ଲିଗ୍ ମ୍ୟାଚରେ ୩-୧ ସେଟ୍ରେ ଚଣ୍ଡିଗଡ଼କୁ ପରାସ୍ତ କରିଥିଲା। ଓଡ଼ିଶା ପ୍ରଥମ ସେଟ୍କୁ ୨୨-୨୫ରେ ପରାଜିତ ହୋଇଥିବାବେଳେ ଦ୍ବିତୀୟ ସେଟ୍କୁ ୨୫-୨୦, ୩ୟ ସେଟ୍କୁ ୨୯-୨୭ରେ ଓ ୪ର୍ଥ ସେଟ୍କୁ ୨୬-୨୪ରେ ଜିତିଥିଲା। ସେହିପରି ସନ୍ଧ୍ୟାରେ ଖେଳାଯାଇଥିବା ମ୍ୟାଚରେ ଓଡ଼ିଶା ୩-୦ ସେଟ୍ରେ ଲଦାଖକୁ ପରାସ୍ତ କରିଛି।
ପୂର୍ବରୁ ଓଡ଼ିଶା ୩-୦ ସେଟ୍ରେ ଛତିଶଗଡ଼ ଓ ମଧ୍ୟପ୍ରଦେଶକୁ ପରାସ୍ତ କରିଥିଲା। ସୋମବାର ଅନ୍ତିମ ଲିଗ୍ ମ୍ୟାଚ ଉତ୍ତରପ୍ରଦେଶ ସହିତ ଖେଳିବ। ସେହିପରି ମହିଳା ଦଳ ୩-୦ ସେଟ୍ରେ ଛତିଶଗଡ଼କୁ ପରାସ୍ତ କରି ଦ୍ବିତୀୟ ବିଜୟ ହାସଲ କରିଛି। ଓଡ଼ିଶା ପ୍ରଥମ ସେଟ୍କୁ ୨୫-୦୭ରେ, ୨ୟ ସେଟ୍କୁ ୨୫-୧୩ରେ ଓ ୩ୟ ସେଟ୍କୁ ୨୫-୧୨ରେ ଜିତିଥିଲା। ଓଡ଼ିଶା ପୂର୍ବରୁ ରାଜସ୍ଥାନ ନିକଟରୁ ପରାଜିତ ହୋଇଥିବାବେଳେ ୩-୦ ସେଟ୍ରେ ମଣିପୁରକୁ ପରାସ୍ତ କରିଥିଲା।
