ଡେସ୍କ: ଜାତୀୟ ଟାସ୍କ ଫୋର୍ସ ପ୍ରସ୍ତୁତ କରିଥିବା ରିପୋର୍ଟକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ଶାସନ ସଚିବଙ୍କ ସମେତ ଡାକ୍ତର ସଂଘକୁ ଉପଲବ୍ଧ କରାଇବାକୁ ସୁପ୍ରିମକୋର୍ଟ ଗୁରୁବାର ନିର୍ଦ୍ଦେଶ ଦେଇଛନ୍ତି। ଚଳିତ ବର୍ଷ ଅଗଷ୍ଟ ମାସରେ କୋଲକାତାର ଆରଜି କର ମେଡିକାଲ କଲେଜ ଓ ହସ୍ପିଟାଲରେ ଜଣେ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ପରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ କେନ୍ଦ୍ର ସରକାର ଜାତୀୟ ଟାସ୍କ ଫୋର୍ସ ଗଠନ କରିଥିଲେ।
ଜାତୀୟ ଟାସ୍କ ଫୋର୍ସ ଦୁଇଟି ବର୍ଗରେ ସୁପାରିସ ପ୍ରସ୍ତୁତ କରିଛି: ପ୍ରଥମ, ଡାକ୍ତରୀ ବୃତ୍ତିଜୀବୀଙ୍କ ବିରୋଧରେ ହିଂସା ରୋକିବା ଏବଂ ସୁରକ୍ଷିତ କାର୍ଯ୍ୟ ପରିସ୍ଥିତି ପ୍ରଦାନ କରିବା ଏବଂ ଦ୍ୱିତୀୟଟି, ଡାକ୍ତରଙ୍କ ବିରୋଧରେ ଯୌନ ହିଂସା ରୋକିବା।
ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଆର୍ ଜି କର ଦୁଷ୍କର୍ମ ଓ ହତ୍ୟା ମାମଲାକୁ ପଶ୍ଚିମବଙ୍ଗ ବାହାରକୁ ସ୍ଥାନାନ୍ତର କରିବାକୁ ମନା କରିଦେଇଛନ୍ତି। ଜଣେ ଓକିଲଙ୍କ ମୌଖିକ ପ୍ରାର୍ଥନାକୁ ଖଣ୍ଡପୀଠ ପ୍ରତ୍ୟାଖ୍ୟାନ କରିଥିଲେ। ଖଣ୍ଡପୀଠ କହିଛନ୍ତି ଯେ ମଣିପୁରରେ ଲିଙ୍ଗଗତ ହିଂସା ମାମଲାକୁ କୋର୍ଟ ସ୍ଥାନାନ୍ତର କରିଥିବା ବେଳେ ଏହି ମାମଲାରେ ସେଭଳି କାର୍ଯ୍ୟାନୁଷ୍ଠାନ ଗ୍ରହଣ କରିବେ ନାହିଁ।
ଜଷ୍ଟିସ ଜେ.ବି.ପାର୍ଦିୱାଲା ଓ ଜଷ୍ଟିସ ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଚଳିତ ମାସ ୧୧ ତାରିଖରୁ କୋଲକାତାର ଏକ ସ୍ୱତନ୍ତ୍ର ଅଦାଲତରେ ଶୁଣାଣି ଆରମ୍ଭ କରିବାକୁ ତାରିଖ ଧାର୍ଯ୍ୟ କରିଛନ୍ତି। ଏହି ମାମଲାର ଏକମାତ୍ର ମୁଖ୍ୟ ଅଭିଯୁକ୍ତ ସଞ୍ଜୟ ରାୟଙ୍କ ବିରୋଧରେ ଅଭିଯୋଗ ଆସିବା ପରେ ଶୁଣାଣି ଆରମ୍ଭ ହେବ ବୋଲି କୋର୍ଟ କହିଛନ୍ତି। ତାଲିକାଭୁକ୍ତ ହେବାର ପରବର୍ତ୍ତୀ ତାରିଖ ପୂର୍ବରୁ ସିବିଆଇକୁ ଏକ ନୂତନ ଷ୍ଟାଟସ୍ ରିପୋର୍ଟ ଦାଖଲ କରିବାକୁ ସୁପ୍ରିମକୋର୍ଟ କହିଛନ୍ତି।
