ଲଣ୍ଡନ୍: ପଞ୍ଜାବ ନ୍ୟାଶ୍ନାଲ୍ ବ୍ୟାଙ୍କ ଠକେଇର ଖଳନାୟକ ତଥା ବିଶିଷ୍ଟ ହୀରା ବ୍ୟବସାୟୀ ନିରବ ମୋଦି ବ୍ରସେଲ୍ସ ଚାଲି ଯାଇଥିବା କୁହାଯାଉଛି। ବ୍ରିଟେନ୍ରେ ରାଜନୈତିକ ଶରଣରେ ସେ ରହିଥିବା ଖବର ପ୍ରକାଶ ପାଇବା ପରେ ଗତ ମଙ୍ଗଳବାର କିମ୍ବା ବୁଧବାର ନିରବ ବିମାନରେ ବ୍ରସେଲ୍ସ ଚାଲିଯାଇଥିବା ଅନୁମାନ କରାଯାଉଛି।
ନିରବ ଲଣ୍ଡନ୍ରେ ଥିବା ଜଣାପଡ଼ିବା ପରେ ତାଙ୍କ ବିରୋଧରେ ରେଡ୍ କର୍ଣ୍ଣର ନୋଟିସ୍ ଜାରି କରିବାକୁ ଗତ ସୋମବାର ଦିନ ସିବିଆଇ ଇଣ୍ଟରପୋଲ୍କୁ ଅନୁରୋଧ କରିଥିଲା। ଗତ ମଙ୍ଗଳବାର ମୁମ୍ବଇର ଏକ କୋର୍ଟ ନିରବ ଓ ତାଙ୍କର କିଛି ପରିବାର ସଦସ୍ୟଙ୍କ ନାମରେ ଜାମିନ ବିହୀନ ଗିରଫ ପରୱାନା ଜାରି କରିଥଲା। ଇଣ୍ଟରପୋଲ୍ର କହିବା ଅନୁଯାୟୀ ଗତ ମାର୍ଚ୍ଚ ୩୧ ତାରିଖଠାରୁ ଭାରତୀୟ ପାସ୍ପୋର୍ଟ ଜରିଆରେ ଯାତ୍ରା ସମ୍ପର୍କିତ ସମସ୍ତ ରେକର୍ଡ ଯାଞ୍ଚ କରାଯାଇଥିଲା। କିନ୍ତୁ ଭାରତୀୟ ପାସ୍ପୋର୍ଟରେ ନିରବ ଯାତ୍ରା କରିଥିବା ସୂଚନା ନାହିଁ। ତେଣୁ ସେ ହୁଏତ ସିଙ୍ଗାପୁର ପାସପୋର୍ଟରେ ଯାତ୍ରା କରିଥାଇପାରନ୍ତି ବୋଲି ଅନୁମାନ କରାଯାଉଛି। ଯଦି ସେ ସିଙ୍ଗାପୁର ପାସପୋର୍ଟ ବ୍ୟବହାର କରୁଥିବେ ତେବେ ତାଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରାଯାଇପାରିବ ନାହିଁ।
