ନୀଳଗିରି: ରାଜ୍ୟସ୍ତରୀୟ କରାଟେ ପ୍ରତିଯୋଗିତାରେ ବାଲେଶ୍ୱର ଜିଲା ଅଧୀନ ନୀଳଗିରିର ବାଳକ ସ୍ୱର୍ଣ୍ଣ ପଦକ ବିଜେତା ହୋଇଛନ୍ତି । ଓଡ଼ିଶା ରାଜ୍ୟ ସ୍ତରୀୟ କରାଟେ ସଂଘ ପକ୍ଷରୁ ଉତ୍କଳ କରାଟେ ସ୍କୁଲରେ କନିଷ୍ଠ କରାଟେ ଚମ୍ପିଆନସିପ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି । ବିଯୁକ୍ତ ୩୦କିଲୋ ବର୍ଗରେ ଅନୁଷ୍ଠିତ ଏହି ପ୍ରତିଯୋଗିତାରେ ନୀଳଗିରି ବ୍ଲକ ମହିଷାପଟ୍ଟା ପଞ୍ଚାୟତ ଅଧୀନ ବଣିଆଗାଁର ତଥା ଆର୍ମି ସୁବେଦାର କାର୍ତ୍ତିକ ଆଚାର୍ଯ୍ୟ ଓ ବଲିନା ଆଚାର୍ଯ୍ୟଙ୍କ ୧୧ବର୍ଷର ପୁଅ ସାଇକିରଣ ସମସ୍ତ ପ୍ରତିଯୋଗୀଙ୍କୁ ପଛରେ ପକାଇ ଆଜି ସ୍ୱର୍ଣ୍ଣ ପଦକ ହାସଲ କରିଛନ୍ତି । ସମ୍ପୃକ୍ତ ବାଳକ ବାଲେଶ୍ୱର କେନ୍ଦ୍ରୀୟ ବିଦ୍ୟାଳୟରେ ୬ଷ୍ଠ ଶ୍ରେଣୀରେ ପାଠ ପଢ଼ୁଥିବା ବେଳେ ଗୁରୁ ଜଗନ୍ନାଥ ରଣାଙ୍କ ତତ୍ତ୍ୱାବଧାନରେ କରାଟେ ପ୍ରଶିକ୍ଷଣ ନେଉଥିଲେ ।
ତେବେ ସେ ରାଜ୍ୟସ୍ତରୀୟ ପ୍ରତିଯୋଗିତାରେ ସ୍ୱର୍ଣ୍ଣ ପଦକ ବିଜେତା ହୋଇ ନୀଳଗିରିକୁ ଗୌରାବନ୍ୱିତ କରିଛନ୍ତି ବୋଲି ଅଞ୍ଚଳବାସୀ ମତ ଦେଇଛନ୍ତି । ଏହି ଖବର ପାଇବା ପରେ ନୀଳଗିରି ବିଧାୟକ ସୁକାନ୍ତ ନାୟକ, ବାଳକର ମାମୁ ମାନିଆ ଦ୍ୱିବେଦୀ ପ୍ରମୁଖ ତାଙ୍କୁ ଶୁଭେଛା ଜଣାଇଛନ୍ତି । ଛାତ୍ରଜଣକ ପୂର୍ବରୁ ସ୍ୱର୍ଣ୍ଣ ଓ ବ୍ରୋଞ୍ଜ ବିଜେତା ମଧ୍ୟ ହୋଇଥିଲେ । ଆସନ୍ତା ୧୭ ଓ ୧୮ତାରିଖରେ ଦିଲ୍ଲୀରେ ହେବାକୁ ଥିବା ଆନ୍ତର୍ଜାତୀୟ ପ୍ରତିଯୋଗିତାରେ ପୁଣି ଥରେ ସ୍ୱର୍ଣ୍ଣ ପଦକ ହାସଲ କରିବା ଲକ୍ଷ୍ୟ ରଖିଛନ୍ତି ।
Comments are closed.