ନୂଆଦିଲ୍ଲୀ : ୪ ବର୍ଷ ପରେ ଜଣେ ଭାରତୀୟ ପୁଣି ଥରେ ବିଶ୍ବ ମହିଳା ବକ୍ସିଂ (ମୁଷ୍ଟିଯୁଦ୍ଧ) ଚମ୍ପିଆନସିପ୍ରେ ସ୍ବର୍ଣ୍ଣପଦକ ଜିତିଛନ୍ତି। ଇସ୍ତାନବୁଲରେ ଚାଲିଥିବା ବିଶ୍ବ ମହିଳା ବକ୍ସିଂ ଚମ୍ପିଆନସିପରେ ସ୍ବର୍ଣ୍ଣ ପଦକ ହାସଲ କରିଛନ୍ତି ମହିଳା ମୁଷ୍ଟିଯୋଦ୍ଧା ନିଖତ ଜରିନ୍। ଗୁରୁବାର ୫୨ କିଗ୍ରା ବର୍ଗ ଫାଇନାଲରେ ନିଖତ ୫-୦ ନିଷ୍ପତ୍ତିରେ ଥାଇଲାଣ୍ଡର ଜିଟପଙ୍ଗ ଜୁଟାମାସ୍ଙ୍କୁ ସହଜରେ ପରାସ୍ତ କରି ସ୍ବର୍ଣ୍ଣ ପଦକ ବିଜୟୀ ହୋଇଛନ୍ତି। ତେଲେଙ୍ଗାନାର ପୂର୍ବତନ କନିଷ୍ଠ ଚମ୍ପିଆନ ଜରିନ ୫ମ ଭାରତୀୟ ମହିଳା ମୁଷ୍ଟିଯୋଦ୍ଧା ଭାବେ ବିଶ୍ବ ବକ୍ସିଂ ଚମ୍ପିଆନସିପ୍ରେ ସ୍ବର୍ଣ୍ଣ ପଦକ ଜିତିଛନ୍ତି। ପୂର୍ବରୁ ୬ଥର ବିଶ୍ବ ଚମ୍ପିଆନ ମ୍ୟାରୀ କମ୍ ୨୦୦୨, ୨୦୦୫, ୨୦୦୬, ୨୦୦୮, ୨୦୧୦ ଓ ୨୦୧୮ରେ ସରିତା ଦେବୀ ୨୦୦୬, ଜେନି ଆର୍.ଏଲ୍. ୨୦୦୬ରେ ଓ ଲେଖା କେ.ସି. ୨୦୦୬ରେ ମହିଳା ବକ୍ସିଂ ବିଶ୍ବ ଚମ୍ପିଆନ ହୋଇଥିଲେ। ପୂର୍ବରୁ ମନୀଷା ମୌନ ୫୭ କିଗ୍ରା ଓ ପରୱିନ ହୁଡା ୬୩ କିଗ୍ରା ବର୍ଗରେ କାଂସ୍ୟ ପଦକ ବିଜୟୀ ହୋଇଥିଲେ। ପ୍ରତିଯୋଗିତାରେ ୧୨ ଜଣିଆ ଭାରତୀୟ ଦଳ ଅଂଶଗ୍ରହଣ କରିଛନ୍ତି। ଶେଷଥର ୨୦୧୮ରେ ମ୍ୟାରୀ କମ୍ ୪୮ କିଗ୍ରା ବର୍ଗରେ ବିଶ୍ବ ମହିଳା ବକ୍ସିଂ ଚମ୍ପିଆନସିପ୍ରେ ଚମ୍ପିଆନ ହୋଇଥିଲେ।
ନିଖତଙ୍କ ଏହି ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ତାଙ୍କୁ ଅଭିନନ୍ଦନ ଜଣାଇଛନ୍ତି।
