ଫୁଲବାଣୀ: କାର୍ଯ୍ୟରେ ଅବହେଳା ପ୍ରଦର୍ଶନ କରିବା ଓ ନିୟମିତ ଭାବରେ ବିଦ୍ୟାଳୟ କୁ ନଆସି ଅନୁପସ୍ଥିତି ରହିବା ଜଣେ ଶିକ୍ଷୟିତ୍ରୀଙ୍କୁ ମହଙ୍ଗା ପଡିଛି। ଅଭିଯୋଗ ହେବାପରେ ଶିକ୍ଷୟିତ୍ରୀଙ୍କ ଦରମା ବନ୍ଦ କରିଛନ୍ତି ସ୍ଥାନୀୟ ଗୋଷ୍ଠି ଶିକ୍ଷା ଅଧିକାରୀ। ଘଟଣାଟି ଘଟିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଫିରିଙ୍ଗିଆ ପଞ୍ଚାୟତ ଅଧୀନରେ ଥିବା ନୂଆପଡା ସରକାରୀ ପ୍ରାଥମିକ ବିଦ୍ୟାଳୟରେ। ତେବେ ଏହି ବିଦ୍ୟାଳୟରେ ନିହାରିକା ସାହୁ ନାମକ ଜଣେ ସହକାରୀ ଶିକ୍ଷୟିତ୍ରୀ ଗତ ବର୍ଷେ ହେବ କାର୍ଯ୍ୟରତ ଅଛନ୍ତି। ତାଙ୍କ ନିଜ ଘର ନୟାଗଡ଼ ଜିଲ୍ଲାରେ ହୋଇଥିବା ବେଳେ ଶିକ୍ଷୟିତ୍ରୀ ଜଣକ ବିଦ୍ୟାଳୟକୁ ନିୟମିତ ଭାବରେ ଆସୁନଥିବା ଅଭିଯୋଗ ହୋଇଥିଲା। ଦୀର୍ଘ ଦିନ ଧରି ଅଭିଯୋଗ ହୋଇଆସୁଥିଲେ ମଧ୍ୟ୍ୟ ଫିରିଙ୍ଗିଆ ଶିକ୍ଷା ବିଭାଗରେ କାର୍ଯ୍ୟରତ କିଛି କର୍ମଚାରୀ ଶିକ୍ଷୟିତ୍ରୀ ଜଣକୁ ଦୟା ଦେଖାଇ ତାଙ୍କ ଅବହେଳାକୁ ଘଣ୍ଟ ଘୋଡାଇ ଆସୁଥିଲେ। ତେବେ ଗତ କିଛିଦିନ ହେବ ସରକାରଙ୍କ ନିର୍ଦେଶ କ୍ରମେ ଗ୍ରୀଷ୍ମ ପ୍ରବାହ ପାଇଁ ବିଦ୍ୟାଳୟ ଗୁଡିକ ଛୁଟି ରଖିବା ପାଇଁ ନିର୍ଦେଶ ଦେବା ସହ ଶିକ୍ଷକ ଶିକ୍ଷୟିତ୍ରୀ ବିଦ୍ୟାଳୟରେ ଉପସ୍ଥିତ ରହିବା ପାଇଁ ନିର୍ଦେଶ ରହୁଛି। କିନ୍ତୁ ଶିକ୍ଷୟିତ୍ରୀ ଜଣକ ଏହି ନିୟମକୁ ଅବମାନନା କରି କୁଆଡେ ୧୫ରୁ ୨୦ ଦିନ ଧରି ବିଦ୍ୟାଳୟରେ ଅନୁପସ୍ଥିତି ଥିଲେ। ଏହି ଅଭିଯୋଗ ଜିଲ୍ଲା ଶିକ୍ଷାଧିକାରୀଙ୍କ ପାଖରେ ପହଂଚିବା ପରେ ଜିଲ୍ଲା ଶିକ୍ଷାଧିକାରୀ ଫିରିଙ୍ଗିଆ ବ୍ଲକ ଶିକ୍ଷା ଅଧିକାରୀଙ୍କୁ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିର୍ଦେଶ ଦେଇଥିଲେ। ତେବେ ଫିରିଙ୍ଗିଆ ଗୋଷ୍ଠି ଶିକ୍ଷା ଅଧିକାରୀ ଦାୟିତ୍ୱରେ ଥିବା ସାଧନ କର୍ମୀଙ୍କ ଦ୍ୱାରା ଏହି ଘଟଣାର ତଦନ୍ତ କରାଇଥିଲେ। ଘଟଣାଟି ସତ ପ୍ରମାଣିତ ହେବା ପରେ ବୁଧବାର ସମ୍ପୃକ୍ତ ଶିକ୍ଷୟିତ୍ରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଇଛନ୍ତି ଫିରିଙ୍ଗିଆ ଗୋଷ୍ଠି ଶିକ୍ଷା ଅଧିକାରୀ ଅଶୋକ କୁମାର ମିଶ୍ର। ସମ୍ପୃକ୍ତ ଶିକ୍ଷୟିତ୍ରୀଙ୍କ ମାସକର ଦରମା ବନ୍ଦ କରିବା ସହ ତାଙ୍କୁ କାରଣ ଦର୍ଶାଅ ନୋଟିସ ମଧ୍ୟ ଜାରି କରାଯାଇଥିବା ସୂଚନା ଦେଇଛନ୍ତି ଗୋଷ୍ଠି ଶିକ୍ଷା ଅଧିକାରୀ ଶ୍ରୀ ମିଶ୍ର।
Popular Categories
Previous article
Next article