ଆଠଗଡ: ଆଠଗଡରେ ଗ୍ରାମାଞ୍ଚଳରେ ପାନୀୟ ଜଳ ଯୋଗାଣ ପାଇଁ ପ୍ରାୟ ୨୫୦ କୋଟି ଟଙ୍କାର ମେଗା ପାନୀୟ ଜଳ ପ୍ରକଳ୍ପ ଚାଲିଛି। ପ୍ରକଳ୍ପ ପାଇଁ ବିଭିନ୍ନ ସ୍ଥାନରେ ଗଚ୍ଛିତ ଥିବା ଓ କାର୍ଯ୍ୟ ଚାଲିଥିବା ଅଞ୍ଚଳରେ ପଡ଼ିଥିବା କୋଟି କୋଟି ଟଙ୍କାର ପାଇପ ବାରମ୍ବାର ଚୋରି ହେଉଛି। ଜେନାପଦା ରେଙ୍ଗୀଲି କେନାଲ ନିକଟରେ ରାଜସ୍ଥାନ ନମ୍ବର ଥିବା ଏକ ଆଇଚର ଟ୍ରକରେ ମେଗା ପାନୀୟ ଜଳ ପ୍ରକଳ୍ପର ପାଇପ ବୋଝେଇ ହେଉଥିବା ବେଳେ ନିକଟରେ ଏକ ସ୍କର୍ପିଓ ଗାଡ଼ିକୁ ଦେଖି ସେହି ରାସ୍ତାଦେଇ ଆସୁଥିବା ଓ ସାଦା ପୋଷାକରେ ଥିବା ଆଠଗଡ ଥାନାର ଦୁଇ ଏଏସଆଇ ରାଧାନାଧ ରାଉତ ଓ ସତ୍ୟପ୍ରିୟ ବରାଳ ଘଟଣା ସଂପର୍କରେ ଥାନା ଅଧିକାରୀଙ୍କୁ ଜଣାଇଥିଲେ। ଖବର ପାଇ ଆଠଗଡ ଉପଖଣ୍ଡ ପୁଲିସ ଅଧିକାରୀ ରବୀନ୍ଦ୍ର କୁମାର ମଲ୍ଲିକ, ଆଇଆଇସି ଅନିରୁଦ୍ଧ ମୁଦୁଲି, ଉପନିରୀକ୍ଷକ ଜନ୍ମଜିତା ଶାସମଲ ଓ ବିଶ୍ୱଜିତ ଜେନା ଶଶସ୍ତ୍ର ପୋଲିସ ଫୋର୍ସ ସହ ଘଟଣାସ୍ଥଳରେ ପହଞ୍ଚି ଆଇଚର ଟ୍ରକ ଚାଳକ ରାଜସ୍ଥାନର ସୀତାରାମ ବର୍ମା ଓ ସ୍କର୍ପିଓ ଗାଡି ଚାଳକ ଦିପୁନା କୁମାର ଦେବତା ଏବଂ ସେହି ଗାଡ଼ିରେ ଥିବା ମୁଖ୍ୟ ଅଭିଯୁକ୍ତ ଢେଙ୍କାନାଳ ସଦର ଥାନା ଅନ୍ତର୍ଗତ ଚନ୍ଦ୍ରଶେଖରପ୍ରସାଦ ଅଞ୍ଚଳର ସୁଶୀଲ କୁମାର ବେହେରାଙ୍କୁ କାବୁ କରି ଆଠଗଡ ଥାନାକୁ ଆଣିଥିଲେ। ପୁଲିସ ଗାଡି ଦୁଇଟିକୁ ଜବତ କରି ଆଣିଥିଲେ। ୩ ଅଭିଯୁକ୍ତଙ୍କୁ ପଚରାଉଚୁରା କରିବା ପରେ ସେମାନେ ପାଇପ୍ ଚୋରିକରି ନେଇ ବିକ୍ରି କରିବା ଲାଗି ଉଦ୍ୟମ କରୁଥିବା ଜଣାପଡିଥିଲା। ଏଥିରେ ସମ୍ପୃକ୍ତ ୩-୪ ଜଣ ଫେରାର ହୋଇଯାଇଥିବା ପୁଲିସ ପଚରାଉଚୁରା ଓ ତଦନ୍ତରୁ ଜାଣିବାକୁ ପାଇଛି। ଶୁକ୍ରବାର ସନ୍ଧ୍ୟାରେ କଟକ ଗ୍ରାମାଞ୍ଚଳ ଅତିରିକ୍ତ ଏସପି କୃଷ୍ଣ ପ୍ରସାଦ ପଟ୍ଟନାୟକ ମଧ୍ଯ ଆଠଗଡ ଥାନାରେ ପହଞ୍ଚି ଘଟଣାର ତଦନ୍ତ କରିଥିଲେ । ପ୍ରକଳ୍ପର ଠିକାସଂସ୍ଥାର କର୍ମଚାରୀ ସାମସୁର୍ ଖାଁ ଙ୍କ ଏତଲା କ୍ରମେ ପୁଲିସ ସଂପୃକ୍ତ ୩ ଅଭିଯୁକ୍ତଙ୍କ ନାମରେ ବିଭିନ୍ନ ଦଫାରେ ମାମଲା ରୁଜୁକରି ଶନିବାର ରାତିରେ ସେମାନଙ୍କୁ ଅଦାଲତ ଚାଲାଣ କରିଥିବା ଜଣାପଡିଛି।
Comments are closed.