ସମ୍ବଲପୁର: ସ୍ଥାନୀୟ ଗଙ୍ଗାଧର ମେହେର ବିଶ୍ୱବିଦ୍ୟାଳୟର ଇତିହାସ ବିଭାଗ ଆନୁକୂଲ୍ୟ ଓ ଆଇସିଏଚଆରର ପ୍ରଯୋଜନାରେ ଦ୍ୱିଦିବସୀୟ ଜାତୀୟ ସମ୍ପାନ ଶନିବାର ଆରମ୍ଭ ହୋଇଯାଇଛି। ବିଶ୍ୱବିଦ୍ୟାଳୟର କୁଳପତି ପ୍ର. ଏନ. ନାଗାରାଜୁଙ୍କ ସଭାପତିତ୍ୱରେ ଆୟୋଜିତ ଉଦଘାଟନୀ ଉତ୍ସବରେ ପ୍ର. ଅଖିଳ ଚନ୍ଦ୍ର ଓତ, ଦାଶ ବେନହୁର, ଆଇସିଏଚଆରର ପ୍ର. ହରିହର ପଣ୍ଡା, ସସ୍ମିତ ପ୍ରସାଦ ପାଣି, ପିଜି କାଉନସିଲ ଅଧ୍ୟକ୍ଷ ସୁଶାନ୍ତ କୁମାର ଦାଶ, ଉପ କୁଳସଚିବ ଡ. ଉମା ଚରଣ ପତି ଓ ଇତିହାସ ବିଭାଗର ମୁଖ୍ୟ ଅତୁଲ କୁମାର ପ୍ରଧାନ ମଞ୍ଚାସୀନ ରହିଥିଲେ। ଇତିହାସ ସାମାଜିକ ବିଜ୍ଞାନ ଓ ସାହିତ୍ୟର ମୂଳ ପ୍ରାଣ ଅଟେ। ଏଣୁ ଇତିହାସ ଅମୂଲ୍ୟ ଅଟେ। ଇତିହାସକୁ ବାସ୍ତବାଦୀ, ଘଟଣା ଆଧାରିତ କରିବାର ସମୟ ଆସି ଯାଇଛି। ଇତିହାସକୁ ଅତିରଞ୍ଜିତ, କଳ୍ପନା ଆଧାରିତ କରିବାର ସମୟ ଚାଲି ଯାଇଛି। ପଶ୍ଚିମ ଓଡ଼ିଶାର ପ୍ରତିରୋଧର ଇତିହାସ ସମୃଦ୍ଧ ଅଥଚ ପ୍ରଘଟ ହୋଇ ନାହିଁ। ପଶ୍ଚିମ ଓଡ଼ିଶାର କୋଣ ଅଣୁକୋଣରେ ବିଭିନ୍ନ ରାଜ ଶାସିତ ଅଞ୍ଚଳରେ ସଂଗ୍ରାମ ହୋଇଛି। ସେ ଗୁଡିକୁ ଲୋକ ଲୋଚନକୁ ଆଣିବାକୁ ପଡ଼ିବ। ଏଥି ପାଇଁ ଥିବା ତଥ୍ୟ ଓ ସାକ୍ଷ୍ୟ ଗୁଡିକୁ ଖୋଜି ବାହାର କରିବାକୁ ପଡ଼ିବ ବୋଲି ଅତିଥି ମାନେ ମତବ୍ୟକ୍ତ କରିଥିଲେ। ଉଦଘାଟନୀ ଉତ୍ସବ ପରେ ୨ଟି ହଲରେ ସମାନ୍ତରାଳ ଭାବରେ ଦୁଇଟି ଅଧିବେଶନରେ ବିଶିଷ୍ଟ ଐତିହାସିକ, ଅଧ୍ୟାପକ, ଗବେଷକ ଓ ଲେଖକ ମାନେ ସନ୍ଦର୍ଭ ପାଠ କରିଥିଲେ। ରାଜ୍ୟର ବିଭିନ୍ନ ସ୍ଥାନରୁ ପ୍ରତିନିଧି ଓ ଛାତ୍ରଛାତ୍ରୀ ମାନେ ଏହ ଜାତୀୟ ସମ୍ପାନରେ ଅଂଶଗ୍ରହଣ କରୁଛନ୍ତି। ଏହି ଅବସରରେ ଘେସଁ, ପାହାଡଶ୍ରୀଗିଡା, କୁଲାବିରା ଓ ଗଡ଼ଲୋଇସିଂ ର ସଂଗ୍ରାମୀ ଜମିଦାର ପରିବାରର ଜଣେ ଲେଖାଏଁ ଦାୟାଦଙ୍କୁ ସମ୍ମାନିତ କରାଯାଇଥିଲା।
Popular Categories
Previous article
Next article