ଆଠଗଡରେ ରାଷ୍ଟ୍ରୀୟ ଲୋକ ଅଦାଲତ: ଦୁର୍ଘଟଣାରେ କ୍ଷତିଗ୍ରସ୍ତଙ୍କୁ ୧ କୋଟି ୨୬ ଲକ୍ଷ ୯୦ ହଜାର ଟଙ୍କା ପ୍ରଦାନ କରିବାକୁ ବୀମା କମ୍ପାନୀ ଆଦେଶ

ଆଠଗଡ: ଆଠଗଡ ତାଲୁକ ଆଇନ ସେବା ସମିତି ଆନୁକୂଲ୍ୟରେ ଶନିବାର ଅଦାଲତ ପରିସରରେ ଏକ ରାଷ୍ଟ୍ରୀୟ ଲୋକ ଅଦାଲତ ଅନୁଷ୍ଠିତ ହୋଇଯାଇଛି । ଆଇନ ସେବା ସମିତିର ଅଧ୍ୟକ୍ଷ ତଥା ଅତିରିକ୍ତ ଜିଲା ଓ ଦୌରାଜଜ ରାଜକୁମାର ଦାସ ଏହାକୁ ଉଦଘାଟନ କରିବା ସହିତ ନିଜ ଅଦାଲତ ପରିଚାଳନା କରିଥିଲେ । ଏଡିଜେ ଶ୍ରୀ ଦାସ ନିଜ ଅଦାଲତରେ ୧୬ ମୋଟରଯାନ ଦୁର୍ଘଟଣାଜନିତ ମାମଲା ଫଇସଲା କରି ମୋଟ ୧ କୋଟି ୨୬ ଲକ୍ଷ ୯୦ ହଜାର ଟଙ୍କା ଦୁର୍ଘଟଣାରେ କ୍ଷତିଗ୍ରସ୍ତଙ୍କୁ ପ୍ରଦାନ କରିବାକୁ ବୀମା କମ୍ପାନୀଗୁଡିକୁ ଆଦେଶ ଦେଇଥିଲେ।

ବରିଷ୍ଠ ଦେୱାନୀ ବିଚାରପତି ମହାଶ୍ୱେତା  ପରିଜା ନିଜ ଅଦାଲତରେ ୨ଟି ବୈବାହିକ ଓ ୨ଟି ଦେୱାନୀ ମାମଲା, ଏସଡିଜେଏମ ନରୋଜ କୁମାର ସାହୁ ଗୋଟିଏ ବୈବାହିକ ଓ ୪୨ଟି ଫୌଜଦାରୀ ମାମଲା ଏବଂ ଜେଏମଏଫସି ସ୍ଥିତିପ୍ରଜ୍ଞା ଅମୃତତନୟା ନିଜ ଅଦାଲତରେ ୧ଟି ବୈବାହିକ ଓ ୧ଟି ଫୌଜଦାରୀ ମାମଲା ଫଇସଲା କରିଥିଲେ।

ଏତଦବ୍ୟତୀତ ଉପଜିଲାପାଳ ପ୍ରହଲ୍ଲାଦ ନାରାୟଣ ଶର୍ମା ଏବଂ ଭାରପ୍ରାପ୍ତ ତହସିଲଦାର ଆକାଶ କୁମାର ପଣ୍ଡା ନିଜ ନିଜ ଅଦାଲତରେ ୨୭୬ ଟି ସାର୍ଟିଫିକେଟ ଓ ଦାଖଲ ଖାରଜ ମାମଲା ସମାଧାନ କରି ରାଜସ୍ବ ବାବଦକୁ ୧ ଲକ୍ଷ ୩୮୫୫୦ ଟଙ୍କା ଆଦାୟ କରିଥିଲେ।

ଏହି ରାଷ୍ଟ୍ରୀୟ ଲୋକ ଅଦାଲତରେ ଆଠଗଡ ଷ୍ଟେଟ ବ୍ୟାଙ୍କ, ୟୁନିୟନ ବ୍ୟାଙ୍କ, ୟୁକୋ ବ୍ୟାଙ୍କ ଓ ଓଡିଶା ଗ୍ରାମ୍ଯ ବ୍ୟାଙ୍କ ଅଧିକାରୀମାନେ ଯୋଗଦେଇ ବ୍ୟାଙ୍କର ଅନାଦେୟ ଋଣ ସମ୍ପର୍କିତ ମାମଲା ପରିଚାଳନାରେ ସହଯୋଗ କରିଥିଲେ । ଆଠଗଡ ଓକିଲ ସଂଘର ସଦସ୍ଯ ଓ ଅଦାଲତର ସମସ୍ତ କର୍ମଚାରୀ ଲୋକ ଅଦାଲତ ପରିଚାଳନାରେ ସହଯୋଗ କରିଥିଲେ।