୩୩ ବର୍ଷ ପରେ ହତ୍ୟା ଅଭିଯୁକ୍ତ ଗିରଫ
ବଲାଙ୍ଗିର: ରାଜନୈତିକ କାରଣରୁ ୧୯୮୫ ମସିହାରେ ଲୋଇସିଂହା ଥାନାର ଲୁହୁରାମୁଣ୍ଡା ଗାଁର ବାଳକୃଷ୍ଣ ବାରିକଙ୍କୁ ହତ୍ୟା କରାଯାଇଥିଲା। ସେତେବେଳେ ୧୭ ଜଣଙ୍କ ନାଁରେ ଅଭିଯୋଗ ହୋଇଥିଲା। ଶେଷରେ ୮ ଜଣଙ୍କ ନାଁରେ ପୁଲିସ ଚାର୍ଜସିଟ କରିଥିଲା। ଅଭିଯୁକ୍ତଙ୍କୁ ଗିରଫ କରି ପୁଲିସ କୋର୍ଟ ଚାଲାଣ କରିଥିଲା। ଜିଲା ଦୌରା ଜଜ୍ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ଶୁଣାଇଥିଲେ। ତଳ କୋର୍ଟ ବିରୋଧରେ ଉଚ୍ଚ ନ୍ୟାୟାଳୟରେ ମାମଲା ପହଞ୍ଚି ଥିଲା। ସେଠାରେ ବିଚାର ପ୍ରକ୍ରିୟା ଚାଲିଥିଲା। ଉଚ୍ଚ ନ୍ୟାୟାଳୟ ତଳ କୋର୍ଟର ରାୟକୁ କାଏମ ରଖିଥିଲେ।
ଶେଷରେ ସର୍ବୋଚ୍ଚ ନ୍ୟାୟାଳୟର ଦ୍ବାରସ୍ଥ ହୋଇଥିଲେ ଅଭିଯୁକ୍ତମାନେ। ସେଠାରେ ପ୍ରାୟ ଦେଢ ବର୍ଷ ମାମଲା ବିଚାର ଚାଲିଥିଲା। ନ୍ୟାୟାଳୟ ମଧ୍ୟ ଉଚ୍ଚ ନ୍ୟାୟାଳୟର ରାୟକୁ କାଏମ ରଖିଥିଲେ। ୬ ଜଣ ଅଭିଯୁକ୍ତ ଆଜୀବନ ସଜା କାଟି ଜେଲରୁ ବାହାରିଲେଣି। ତେବେ ୨ଜଣ ଫେରାର ହୋଇଯାଇଥିଲେ। ୪୵୫ ମାସ ତଳେ ଜଣଙ୍କୁ ଗିରଫ କରାଯାଇଥିଲା। ଆଉ ସାଲେଭଟା, ଆଗଲପୁର ଫାଣ୍ଡି ଓ ଲୋଇସିଂହା ପୁଲିସର ମିଳିତ ଉଦ୍ୟମରେ ଫେରାର ଅଭିଯୁକ୍ତ ନୀଳ ସାହୁ(୫୮) ଆତ୍ମଗୋପନ କରି ରହୁଥିଲେ। ତାଙ୍କୁ ଲୋଇସିଂହା ପୁଲିସ ଗିରଫ କରି କୋର୍ଟ ଚାଲାଣ କରିଛି। ଦୀର୍ଘ ୩୩ ବର୍ଷ ପରେ ବାଳକୃଷ୍ଣ ହତ୍ୟା ମାମଲାରେ ଫେରାର ନୀଳଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡିଛି।
Comments are closed.