ମୁଖୀଗୁଡା : ପୁଣି ଏକ ଶ୍ରମିକ ଦାଦନ ଖଟିବାକୁ ଯାଇ ତାମିଲନାଡୁରେ ନିଖୋଜ ହୋଇଥିବା ଅଭିଯୋଗ ଆସିଛି । କଳାହାଣ୍ଡି ଜିଲ୍ଲା ଜୟପାଟଣା ଥାନା କୁଚାଗାଁର ଶ୍ରମିକ ଚକ୍ରଧର ନାଏକ ( ୩୫) ତାମିଲନାଡୁରେ ନିଖୋଜ ହୋଇଥିବା ନେଇ ଜୟପାଟଣା ଥାନାରେ ଅଭିଯୋଗ ହୋଇଛି । ଗତ ଛଅ ମାସ ତଳେ କୁଚାଗାଗାଁର ୧୦ଜଣଙ୍କ ସହ ଚକ୍ରଧର ଦାଦନ ଖଟିବାକୁ ସୁଦୂର ତାମିଲନାଡୁକୁ ଯାଇଥିଲେ। ଗତ ୧୮ ତାରିଖ ମହାଶିବରାତ୍ରି ଦିନ ନିଜ ସ୍ତ୍ରୀ ସହ ଘରକୁ ଆସିବା ନେଇ କଥା ହୋଇଥିଲେ କିନ୍ତୁ ଆଜି ସୁଦ୍ଧା ତାଙ୍କର କୋଣସି ଖୋଜ ଖବର ମିଳୁନାହିଁ। ତାଙ୍କ ସହ ବାହାରିଥିବା ଗାଁ ଲୋକେ ଘରକୁ ଫେରିଥିବା ବେଳେ ସେ କୁଆଡ଼େ ଚାଲି ଯାଇଥିବା କହିଥିଲେ। ସେଠାରେ ଥିବା ଲୋକେ ତାଙ୍କୁ ବହୁତ ଖୋଜିଲେ ମଧ୍ୟ ଚକ୍ରଧରଙ୍କ କୋଣସି ଖବର ମିଳିନାହିଁ। ଏ ନେଇ ଚକ୍ରଧରଙ୍କ ବାପା ପୂର୍ଣ୍ଣଚନ୍ଦ୍ର ନାଏକ ଜୟପାଟଣା ଥାନାରେ ଅଭିଯୋଗ କରିଛନ୍ତି । ଚକ୍ରଧର ଦାଦନ ଖଟି ସେଥିରୁ ରୋଜଗାର ଟଙ୍କା ଘରକୁ କିଛି ପଠାଉଥିବା ବେଳେ ସ୍ତ୍ରୀ ଶ୍ରୀମତୀ କୁଲି ମଜୁରୀ କରି ପରିବାର ପ୍ରତିପୋଷଣ କରୁଥିଲେ।ତେବେ ଚକ୍ରଧରଙ୍କ ହଠାତ ନିଖୋଜକୁ ନେଇ ସ୍ତ୍ରୀ ଶ୍ରୀମତୀ ଚିନ୍ତିତ ଥିବା ବେଳେ ଜିଲ୍ଲା ପ୍ରଶାସନ ତାଙ୍କ ସ୍ୱାମୀକୁ ଫେରେଇ ଆଣିବା ଦିଗରେ ପଦକ୍ଷେପ ନେବାକୁ ଅନୁରୋଧ କରିଛନ୍ତି ।
Comments are closed.