ମୁମ୍ବଇ – ମୁମ୍ବଇରେ ତିନିଜଣ ନକଲି କିନ୍ନରଙ୍କୁ ପୁଲିସ ଗିରଫ କରିଛି । ଏହି ନକଲି କିନ୍ନର ବିଭିନ୍ନ ଚୋରି ସହ ଲୋକଙ୍କ ଠାରୁ ଜବରଦସ୍ତ ଟଙ୍କା ଆଦାୟ କରିବା କାମରେ ଲିପ୍ତ ଥିଲେ । କିଛି ଦିନ ତଲେ ଜଣେ ମହିଳାଙ୍କ ଘଲେ ଗୋଟିଏ ପିଲା ଜନ୍ମ ହୋଇଥିଲା । ଏହାପରେ କିନ୍ନରମାନେ ସେହି ମହିଳାଙ୍କ ଘରେ ପହଞ୍ଚିଥିଲେ । ପିଲାଟିର କିଛିଟା ସ୍ୱାସ୍ଥ୍ୟଗତ ସମସ୍ୟା ଥିବା କଥା କହି ମହିଳାଙ୍କୁ ଡରାଇଥିଲେ। ଏହି କିନ୍ନରମାନେ ହଳଦୀରେ ସୁନାକୁ ବାନ୍ଧିକରି ରଖି ଏକ ପୂଜା କରିବେ ବୋଲି କହିଥିଲେ ।
ଗୋଟିଏ ପୁଡିଆରେ ହଳଦୀ ରଖି ତା ଭିତରେ ସୁନା ରଖି ଏମାନେ ପୂଜା କରିଥିଲେ । ପରେ ସେମାନେ ସୁନା ସହ ଚମ୍ପଟ ମାରିଥିଲେ । ମହିଳା ଜଣଙ୍କ ଠକାମୀର ଶିକାର ହୋଇଛନ୍ତି ବୋଲି ଜାଣିବା ପରେ ଥାନାରେ ଅଭିଯୋଗ କରିଥିଲେ । ମହିଳାଙ୍କ ଅଭିଯୋଗ ଆଧାରରେ ପୁଲିସ ଏହି କିନ୍ନରମାନଙ୍କୁ ଗିରଫ କରିବା ପରେ ସେମାନଙ୍କ ଠାରୁ ଚୋରି ହୋଇଥିବା ସୁନା ଜବତ ହୋଇଛି ।
ଗିରଫ ହୋଇଥିବା ନକଲି କିନ୍ନରଙ୍କ ନାମ ଭାନୁଦାସ ସାଓ୍ୱନ୍ତ, ମହେନ୍ଦ୍ର ନାଗନାଥ ଓ ପ୍ରକାଶ ସିନ୍ଧେ ବୋଲି ଜଣା ପଡିଛି । ମୁମ୍ବାଇଠାରୁ ୫୦୦ କିଲୋମିଟର ଦୂରରୁ ସେମାନଙ୍କୁ ଗିରଫ କରାଯାଇଛି । ବିଭିନ୍ନ ନର୍ସିଂ ହୋମ ଏବଂ ମାର୍ଟିନିଟି ହୋମରେ ଏମାନେ ସେଠାରେ କାମ କରୁଥିବା କିଛି ଲୋକଙ୍କୁ ହାତ କରି ଶିଶୁ ଜନ୍ମ ହେବା ଖବର ସଂଗ୍ରହ କରିଥାଆନ୍ତି । ଏହାପରେ ସେଠାରେ ପହଞ୍ଚି ଜବରଦସ୍ତ ବିଭିନ୍ନ କଥା କହି ଟଙ୍କା ଆଦାୟ କରିବା ସହ ଚୋରି ପରି କାମ କରିଥାଆନ୍ତି ବୋଲି ପୁଲିସ ସୂଚନା ଦେଇଛି ।
