ବ୍ରହ୍ମପୁର ଅଗ୍ନିଶମ ବିଭାଗ ପକ୍ଷରୁ ହାଇଡ୍ରୋଲୋକି ପ୍ଲାଟଫର୍ମ ଯାନକୁ ନେଇ ମକ ଡ୍ରିଲ 

ଗୋପାଳପୁର :  ବ୍ରହ୍ମପୁର ଅଗ୍ନିଶମ ବିଭାଗ ପକ୍ଷରୁ ବୁଧବାର ବ୍ରହ୍ମପୁର ବିଶ୍ବବିଦ୍ୟାଳୟ ପରିସରରେ  ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ ବ୍ରହ୍ମପୁର ଅଗ୍ନିଶମ ବିଭାଗ ପାଇଁ ୪.୫୦ କୋଟି ଟଙ୍କା ବ୍ୟୟରେ କିଣା ଯାଇଥିବା ହାଇଡ୍ରୋଲୋକି ପ୍ଲାଟଫର୍ମ ଯାନକୁ କିପରି ଚଳାଯିବ ଏହା ନେଇ ହରିଆଣାରୁ ଆସିଥିବା ପ୍ରଶିକ୍ଷକ ଅମରିକ ସିଂ ବ୍ରହ୍ମପୁରର ୬ ଜଣଙ୍କୁ ଟ୍ରେନିଂ ଦେଇଥିଲେ।

ଆଜି ପ୍ରଥମ ଦିନରେ ହାବିଲଦାର ରାଜେଶ ମଲିକ, ଫାୟର ମେନ ସଞ୍ଜୟ କୁମାର ଗୌଡ,ସୁଶାନ୍ତ କୁମାର ବେହେରାଙ୍କୁ ପ୍ରଶିକ୍ଷଣ ଦିଆଯାଇଥିଲା । ପ୍ରଥମ ଥର ନିମନ୍ତେ ଏହି ଗାଡି ବ୍ରହ୍ମପୁର ଅଗ୍ନିଶମ ବିଭାଗକୁ ମିଳିଥିବା ବେଳେ ଏଥିରେ  ୩ ଟି ଇଞ୍ଜିନ ଖଞ୍ଜା ଯାଇଛି ଏହା ସହ ଏଥିରେ ଲାଗିଥିବା ମେସିନ ଗୁଡିକ ରିମୋଟ ଦ୍ବାରା ପରିଚାଳିତ କରାଯିବ। ଏହି ମେସିନ ସାହାଯ୍ୟରେ ସହରରେ ଥିବା ୧୪ ମହଲା ବିଶିଷ୍ଟ କୋଠାରେ କୈାଣସି ପ୍ରକାର ନିଆଁ ଲାଗିଲେ,ଏହା ବ୍ୟବହାର କରାଯାଇ ଧନ ଜୀବନର ସୁରକ୍ଷା କରାଯାଇ ପାରିବ ବୋଲି ଏଏଫଓ ସନ୍ତୋଷ ପାଣିଗ୍ରାହୀ ସୂଚନା ଦେଇଛନ୍ତି । ନିଆଁକୁ ଆୟତ୍ତ କରିବା ପାଇଁ ଏଥିରେ  ୪ ଟି ଗ୍ୟାସ ସିଲିଣ୍ଡର ସହ ଫୋମ ଓ ପାଣି ପାଇଁ ମୋଟର ସହ ପାଇପ ଖଞ୍ଜା ଯାଇଛି । ଗତ ୧୫ ଦିନ ତଳେ ଏହି ଗାଡି ବ୍ରହ୍ମପୁର ଅଗ୍ନିଶମ ବିଭାଗକୁ ମିଳିଥିବା ବେଳେ ଏହାକୁ ବ୍ରହ୍ମପୁର ସହର ମଧ୍ୟରେ ରହିଥିବା ଅଗ୍ନିଶମ ବିଭାଗକୁ ନେବାରେ ଅସୁବିଧା ପରିଲକ୍ଷିତ ହେଉଥିବା ଜଣାପଡିଛି । ଏହି ଗାଡିର ଚଳପ୍ରଚଳ ନିମନ୍ତେ ପ୍ରାୟ ୧୫ ଫୁଟର କ୍ଲିୟରାନ୍ସ ଦରକାର‌ ପଡୁଥିବା ବେଳେ ବ୍ରହ୍ମପୁର ସହର ମଧ୍ୟରେ ଯାଇଥିବା ବିଦ୍ୟୁତ, ଟେଲିଫୋନ ଓ କେବୁଲ ଗୁଡିକ କେବଳ‌ ୫ ଫୁଟ ଉଚ୍ଚତାରେ ରହିଛି। ଯାହା ଫଳରେ ଏହାର ଚଳପ୍ରଚଳରେ ଅସୁବିଧା ହେବା ଆଶଙ୍କା ଦେଖା ଦେଇଛି । ଆସନ୍ତା କାଲି ବିଭାଗ ପକ୍ଷରୁ ବ୍ରହ୍ମପୁର ବଡ ମେଡିକାଲରେ ନିର୍ମିତ ହୋଇଥିବା ନୂତନ କୋଠାକୁ ନିଆଯାଇ କର୍ମଚାରୀଙ୍କୁ ପ୍ରଶିକ୍ଷଣ ଦେବା ନିମନ୍ତେ ବିଭାଗ ପକ୍ଷରୁ ସ୍ଥିର କରାଯାଇଥିବା ଶ୍ରୀ ପାଣିଗ୍ରାହୀ ପ୍ରକାଶ କରିଛନ୍ତି ।