କଲମପୁର : ଦାଦନ ଶ୍ରମିକର ଦୁଃଖର ଅନ୍ତ ହେଉ ନାହିଁ କି ଦାଦନ ଶ୍ରମିକ ସମସ୍ୟାର ସମାଧାନ ହେଉ ନାହିଁ। କେତେବେଳେ କଳାହାଣ୍ଡିର ଶ୍ରମିକ ରାଜ୍ୟ ବାହାରକୁ ଦାଦନ ଖଟିବାକୁ ଯାଇ ହାତ ଗୋଡ଼ କାଟି ହେଇ ଫେରୁଛି ତ ଆଉ କେତେ ବେଳେ ଶବ ହେଇ ଫେରୁଛି। ପୁଣି କେତେବେଳେ ପରିବାର ପ୍ରତିପୋଷଣ ପାଇଁ ରୋଜଗାର କରିବାକୁ ଯାଇ ଗୁରୁତର ଅବସ୍ଥାରେ ଘରକୁ ଫେରି ପରିବାରର ବୋଝ ପାଲଟୁଛି। ପୁଣି କିିଏ ନିଖୋଜ ହେଇଯାଉଛି। ବର୍ଷ ବର୍ଷ ଧରି ଖୋଜ ଖବର ପାଉ ନାହାନ୍ତି ପରିବାର। ସତେ ଯେମିତି ଦୁନିଆରୁ ଉଭାନ ହେଇଯାଉଛି। ଏଭଳି ବହୁ ଅଭିଯୋଗ ଆସୁଥିଲେ ମଧ୍ୟ କଳାହାଣ୍ଡି ପ୍ରଶାସନ ଅଥବା କୌଣସି ସରକାରୀ ଯୋଜନା ସଫଳ ହେଇ ପାରୁନାହିଁ ଦାଦନ ଚାଲାଣକୁ ରୋକିବା ପାଇଁ। ଅନେକ ସମୟରେ କଳାହାଣ୍ଡିର ଶ୍ରମିକ ଦାଦନ ଦଲାଲର ପ୍ରଲୋଭନ ର ଶିକାର ହେଇ ରାଜ୍ୟ ବାହାରେ ଅଧିକ ଉପାର୍ଜନ କରିବା ଆଶାରେ ରାଜ୍ୟ ବାହାରକୁ ଯାଉଛନ୍ତି। କିନ୍ତୁ ବହୁ ସମୟରେ ନିର୍ଯାତିତ ହେଉଛନ୍ତି। ମାଡ ଗାଳି ସହିତ ଜୀବନ ପ୍ରତି ବିପଦ ଥବା ସତ୍ତ୍ବେ ବାଧ୍ୟ ହେଇ ଖଟୁଛନ୍ତି। ଏଭଳି ଅକଥନୀୟ ନିର୍ଯାତନାର ଶିକାର ହେଉଥିଲେ ମଧ୍ୟ ପ୍ରତିବାଦ କରିବାର ସାହାସ ରହୁ ନାହିଁ। ଦାଦନ ଦଲାଲ ବିଭିନ୍ନ ମାଲିକଙ୍କ ପାଖରେ ଛାଡି ଦେଇ ଫେରିବା ପରେ ବଢୁଛି ଶ୍ରମିକଙ୍କ ନିର୍ଯାତନା। ଏଭଳି ଏକ ଘଟଣା ବର୍ତମାନ କଲମପୁର ଅଞ୍ଚଳରେ ଆଲୋଡନ ସୃଷ୍ଟି କରିଛି। ଜୁନାଗଡ଼ ବ୍ଲକ ହାବସପୁର ଗାଁର ଦୁଇ ପରିବାର ସମେତ କଲମପୁର ବ୍ଲକ ଖଣ୍ଡିଗଙ୍ଗରୀଗୁଡାର ଗୋଟିଏ ପରିବାର ମୋଟ ଏହି ତନି ପରିବାରର ୮ ଜଣ ସଦସ୍ୟଙ୍କ ସମେତ ଖଣ୍ଡି ଡଙ୍ଗରୀଗୁଡାର ୯ ଜଣ ଶ୍ରମିକ ଜନୈକ ଦାଦନ ଦଲାଲର ପ୍ରଲୋଭନର ଶିକାର ହେଇ ଆନ୍ଧ୍ର ପ୍ରଦେଶର ମେହେବୁବ ନଗର ଅନ୍ତର୍ଗତ ମର୍କେଲ ଠାରେ ଥିବା ଏକ ଇଟା ଭାଟିରେ ନିର୍ଯାତନାର ଶିକାର ହେଉଛନ୍ତି।
ଦହନାପାଲି ଧର୍ମଗଡର ବାସିନ୍ଦା ଭାବେ ପରିଚୟ ଦେଇଥିବା ରାଧେଶ୍ୟାମ ବାଗ ନାମକ ଦାଦନ ଦଲାଲ ଜୁନାଗଡ଼ ବ୍ଲକ ଅଧୀନ ହାବସପୁର ଗାଁର ଶୁସାନ୍ତ ବାଗ ନିଜର ସ୍ତ୍ରୀ ବୁଧବାରୀ, ୧୨ ବର୍ଷିୟ ଝିଅ ଝିମିରୀ ଓ ଅନ୍ୟ ୬ ବର୍ଷର ଶିଶୁ ସମେତ ମାଙ୍ଗେଲାଲ ଛତ୍ରୀଆ ଓ ତାଙ୍କ ସ୍ତ୍ରୀ ସୁମତୀଙ୍କୁ ରାୟଗଡ଼ାଠାରେ କାମ କରିବା ପାଇଁ ପ୍ରଲୋଭିତ କରିଥିଲା। ଏହି ମାନଙ୍କ ପ୍ରରୋଚନାରେ ତାଙ୍କ ସମ୍ପର୍କୀୟ କଲମପୁର ବ୍ଲକ ଅନ୍ତର୍ଗତ ଖଣ୍ଡି ଡଙ୍ଗରୀଗୁଡାର ରାହୁଲ କୁମାର ଓ ତାଙ୍କ ସ୍ତ୍ରୀ ରଜନୀ କୁମାର ସହିତ ଯୋଗାଯୋଗ କରିଥିଲା। ଆହୁରି ଅଧିକ ଶ୍ରମିକ ଆବଶ୍ୟାକତା ଥିବା ଦର୍ଶାଇ ପୁଣି କଣ୍ଡି ଡଙ୍ଗରୀଗୁଡା ଗାଁରୁ ଅଧିକ ଶ୍ରମିକ ନେବା ପାଇଁ ଶ୍ରମିକଙ୍କ ମତାଇଥିଲା। ଏହାମୁତାବକଗତ ସୋମବାର ୮ ତାରିଖ ଦିନ ଖଣ୍ଡିଡଙ୍ଗରୀଗୁଡା ଗାଁର ଦଶରଥ ଲହଜଲ, ବିରାଟ ଲହଜଲ, ଭୋଦେବ ଲହଜଲ, କେତୁରାମ ମାଝୀ, ଉପେନ୍ଦ୍ର ମାଝୀ, ସତ୍ୟ ସୁନାନୀ, ନନ୍ଦ କିଶୋର ନିଆଲ, ଦୁର୍ଯ୍ୟୋଧନ ମହାଲିକ,ଜଗଦିଶ ମାଝୀ, ନବ ଲହଜଲ, ହେମନ୍ତ କଣ୍ଟା ଓ ଗଣେଷ କୁମାର ପ୍ରମୁଖ ୨୦ ଜଣ ଶ୍ରମିକଙ୍କୁ ଜୁନାଗଡ ପର୍ଯ୍ୟନ୍ତ ଯିବା ପରେ ପୂର୍ବରୁ ଅପେକ୍ଷା କରିଥିବା ଦାଦନ ଦଲାଲ ଜୁନାଗଡ ରାୟପୁର ଟ୍ରେନ ରେ ସମସ୍ତଙ୍କୁ ଚଢ଼ାଇଥିଲା। ଏହାସହ ରାୟଗଡ଼ାଠାରେ ଥିବା କାମରେ ଶ୍ରମିକ ନିୟୋଜିତ ହେଇ ସାରିଥିବା ଦର୍ଶାଇ ଖରିଆର ରୋଡ଼ ଷ୍ଟେସନ ପର୍ଯ୍ୟନ୍ତ ନେଇଯାଇଥିଲା।
