୧୮୬% ବଢ଼ିବ କେନ୍ଦ୍ର କର୍ମଚାରୀଙ୍କ ଦରମା 

ନୂଆଦିଲ୍ଲୀ : ୭ମ ବେତନ କମିଶନ କାର୍ଯ୍ୟକାରୀ ହେବାର ଅବଧି ଆଗାମୀ ୨୦୨୬ ଜାନୁଆରୀରେ ଶେଷ ହେବାକୁ ଯାଉଛି। ପ୍ରତି ୧୦ବର୍ଷରେ ବେତନ କମିଶନ ବସାଯାଇ କେନ୍ଦ୍ର ସରକାରୀ କର୍ମଚାରୀଙ୍କ ଦରମା ଫିଟମେଣ୍ଟ କରାଯାଇଥାଏ। ୭ମ ବେତନ କମିସନ କାର୍ଯ୍ୟକାରୀ କରିବା ଲାଗି ମନମୋହନ ସିଂହଙ୍କ ନେତୃତ୍ବାଧୀନ ସରକାର ୨୦୧୪ ଫେବୃଆରୀରେ କମିସନ ଗଠନ କରାଇଥିଲେ। ୨୦୧୬ରେ ୭ମ ବେତନ କମିସନ ଲାଗୁ ହୋଇଥିଲା। ସେହି ଆଧାରରେ ୨୦୨୬ରେ ଅଷ୍ଟମ ବେତନ କମିସନ ଲାଗୁ କରିବା ଲାଗି ଏବେ ଠାରୁ କମିସନ ଗଠନ କରାଯିବାର ଆବଶ୍ୟକତା ରହିଛି। ମାତ୍ର ଏ ସମ୍ପର୍କରେ ସରକାର କୌଣସି ନିଷ୍ପତ୍ତି ନେଇନାହାନ୍ତି। ୮ମ ବେତନ କମିସନ ଗଠନକୁ ନେଇ କର୍ମଚାରୀ ଆଶାୟୀ ରହିଥିବାବେଳେ ଏନେଇ ଦରମା ଆକଳନ କରାଯାଇଛି। ଆକଳନ ଅନୁଯାୟୀ ୮ ବେତନ କମିସନରେ ସରକାରୀ କର୍ମଚାରୀଙ୍କ ମୂଳ ଦରମାରେ ୧୮୬% ବୃଦ୍ଧି ହେବ। ଯଦ୍ଦ୍ବାରା ଜଣେ କର୍ମଚାରୀଙ୍କ ସର୍ବନିମ୍ନ ମୂଳ ଦରମା ୫୧,୪୮୦ ଟଙ୍କାକୁ ବୃଦ୍ଧି ପାଇବ। ଏବେ ଜଣେ କର୍ମଚାରୀଙ୍କ ସର୍ବନିମ୍ନ ମୂଳ ଦରମା ୧୮,୦୦୦ ଟଙ୍କା ରହିଛି। ୮ମ ବେତନ କମିସନରେ ୨.୮୬ ଫିଟମେଣ୍ଟ ଫ୍ୟାକ୍ଟର ଲାଗି ସୁପାରିସ କରାଯିବାର ସମ୍ଭାବନା ରହିଛି। ସେହିପରି ଅବସରପ୍ରାପ୍ତ ସରକାରୀ କର୍ମଚାରୀଙ୍କ ସର୍ବନିମ୍ନ ପେନସନ ୨୫,୭୪୦ ଟଙ୍କାକୁ ବୃଦ୍ଧି ପାଇବ। ଏବେ ସର୍ବନିମ୍ନ ପେନସନ ୯୦୦୦ ଟଙ୍କା ରହିଛି। ୮ମ ବେତନ କମିସନ କେବେ ଗଠନ ହେବ ତାକୁ ନେଇ ଅନିଶ୍ଚିତତା ଲାଗି ରହିଛି। ତେବେ ଗଣମାଧ୍ୟମର ରିପୋର୍ଟ ଅନୁଯାୟୀ ଆଗାମୀ ୨୦୨୫-୨୬ ବ​‌େ​‌ଜଟରେ ସରକାର ଏ ସମ୍ପର୍କରେ ଘୋଷଣା କରିବାର ସମ୍ଭାବନା ରହିଛି। ଗତ ୨୦୨୪-୨୫ ବଜେଟ୍‌ରେ ଏ ସମ୍ପର୍କରେ ଘୋଷଣା କରିବା ଲାଗି କର୍ମଚାରୀ ସଂଘ ପକ୍ଷରୁ ଦାବି କରାଯାଇଥିଲା। ଏଥିପାଇଁ କର୍ମଚାରୀ ସଂଘ କ୍ୟାବିନେଟ ସଚିବ ଓ ଅର୍ଥ ମନ୍ତ୍ରଣାଳୟ ନିକଟରେ ଦାବି ଉପସ୍ଥାପନ କରିଥିଲା। ୨୦୧୬ରେ ସପ୍ତମ ବେତନ କମିସନ ଲାଗୁ କରାଯିବା ପରେ କର୍ମଚାରୀଙ୍କ ସର୍ବନିମ୍ନ ମୂଳ ଦରମା ୭୦୦୦ ଟଙ୍କାରୁ ୧୮,୦୦୦ ଟଙ୍କାକୁ ବୃଦ୍ଧି ପାଇଥିଲା।