ଶିଲଂ: ମେଘାଳୟରେ କେଉଁ ଦଳ ସରକାର ଗଢ଼ିବ, ତାହା ସ୍ପଷ୍ଟ ହୋଇଛି। ନ୍ୟାସନାଲ ପିପୁଲ୍ସ ପାର୍ଟି (ଏନପିପି) ନେତୃତ୍ୱରେ ବିଜେପି ଏଠାରେ ସରକାର ଗଢ଼ିବାକୁ ଯାଉଛି।
କଂଗ୍ରେସ ୨୧ଟି ଆସନ ଜିତିଥିଲେ ହେଁ ବିଜେପି ସରକାର ଗଢ଼ିବ। ବିଜେପି (୨), ଏନପିପି (୧୯), ୟୁଡିପି (୬), ଏଚଏସ୍ପିଡିପି (୨), ପିଡିଏଫ (୪) ଓ ଜଣେ ସ୍ୱାଧୀନ ବିଧାୟକଙ୍କୁ ନେଇ ମୋଟ ୩୪ଜଣ ବିଧାୟକଙ୍କ ସମର୍ଥନ ନେଇ ରାଜ୍ୟପାଳ ଗଙ୍ଗାପ୍ରସାଦଙ୍କୁ ଦାବିପତ୍ର ପ୍ରଦାନ କରାଯାଇଛି। ତେଣୁ ରାଜଭବନ ପକ୍ଷରୁ କେବଳ ଔପଚାରିକ ଘୋଷଣାକୁ ଅପେକ୍ଷା କରାଯାଇଛି। ଅପରପକ୍ଷରେ ନ୍ୟାସନାଲ ପିପୁଲ୍ସ ପାର୍ଟି (ଏନ୍ପିପି) ଅଧ୍ୟକ୍ଷ କନରାଡ ସାଙ୍ଗମା ମୁଖ୍ୟମନ୍ତ୍ରୀ ହେବା ଏକପ୍ରକାର ସ୍ଥିର ହୋଇଛି। ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ ୬ ତାରିଖ ମଙ୍ଗଳବାର ପୂର୍ବାହ୍ନ ସାଢେ ୧୦ଟାରେ ସାଙ୍ଗମା ଶପଥ ନେବେ।
ରାଜ୍ୟପାଳଙ୍କୁ ଭେଟିବା ପରେ ସାଙ୍ଗମା କହିଛନ୍ତି ଯେ, ଆମେ ୩୪ଜଣ ବିଧାୟକଙ୍କ ସମର୍ଥନରେ ସରକାର ଗଢ଼ିବା ପାଇଁ ଦାବି କରିଛୁ। ଆଗାମୀ ୨/୩ ଦିନ ଆମ ପାଇଁ ଗୁରୁତ୍ୱପୂର୍ଣ୍ଣ। ଏବେକାର ସରକାରଙ୍କ କାର୍ଯ୍ୟକାଳ ୭ ମାର୍ଚ୍ଚରେ ସରିବାକୁ ଯାଉଛି। ଶନିବାର ଆସିଥିବା ନିର୍ବାଚନ ଜନାଦେଶ ବିଭିନ୍ନ ଦଳକୁ ବାଣ୍ଟି ହୋଇରହିଛି। ଶାସକ କଂଗ୍ରେସ ୬୦ ସଦସ୍ୟ ବିଶିଷ୍ଟ ବିଧାନସଭା ଆସନରୁ ୨୧ଟି ଆସନ ଜିତିଛି। ଗତ ନିର୍ବାଚନ ଅପେକ୍ଷା ଏଥର କଂଗ୍ରେସ ୮ଟି ଆସନ କମ୍ ପାଇଛି। ଏନପିପି ୧୯ ଆସନ ପାଇ ଦ୍ୱିତୀୟ ସ୍ଥାନରେ ରହିଛି। ଅପରପକ୍ଷରେ ଏହି ବିଧାନସଭା ନିର୍ବାଚନ ୫୯ଟି ଆସନ ପାଇଁ କରାଯାଇଥିଲା। ଆଇଇଡି ବିସ୍ଫୋରଣରେ ଜଣେ ଏନସିପି ବିଧାୟକ ପ୍ରାର୍ଥୀଙ୍କ ମୃତ୍ୟୁ ଯୋଗୁ ସେହି ଆସନରେ ନିର୍ବାଚନ ବାତିଲ କରାଯାଇଛି।
