ପ୍ରାଚୀନ ପରମ୍ପରା ଆଜି ମଧ୍ୟ ବିଶ୍ବସ୍ତରରେ ଲୋକପ୍ରିୟ। ଅଧିକାଂଶଙ୍କ ଧାରଣା ଯେ ଗତ କିିଛି ବର୍ଷ ମଧ୍ୟରେ ବ୍ୟୁଟିପାର୍ଲରର ଫେସିଆଲ ଓ ଅନ୍ୟାନ୍ୟ ମସାଜ୍ ବ୍ୟବସ୍ଥା ଯୁବତୀ-ମହିଳାଙ୍କ ମଧ୍ୟରେ ଲୋକପ୍ରିୟ ହୋଇଛି। ପ୍ରକୃତରେ କିନ୍ତୁ ଏହି ତ୍ବଚା ମାଲିସ୍ ପ୍ରଣାଳୀ ହଜାରହଜାର ବର୍ଷ ପୁରାତନ। ତାଇୱାନର ରାଜଧାନୀ ତାଇପେକୁ ଆସୁଥିବା ସଂଖ୍ୟାଧିକ ପର୍ୟ୍ୟଟକ ଏଠାକାର ପ୍ରାଚୀନ ‘ଛୁରି ମାଲିସ୍’ର ପ୍ରୟୋଗ ନିଜ ଉପରେ କରିବାକୁ ପସନ୍ଦ କରନ୍ତି।
ସ୍ଥାନୀୟ ଏକ ନାମକରା ବ୍ୟୁଟି ପାର୍ଲର ମୁଖ୍ୟଙ୍କ କହିବାନୁସାରେ, ୨ହଜାର ବର୍ଷ ତଳେ ହିଁ ବୌଦ୍ଧ ଭିକ୍ଷୁକମାନେ ପ୍ରଥମେ ଏହି ଛୁରି ମାଲିସର ପ୍ରୟୋଗ ଆରମ୍ଭ କରିଥିଲେ। ବର୍ତ୍ତମାନ ପର୍ୟ୍ୟନ୍ତ ଏହି ମାଲିସର ଉପଯୋଗ ନେଇଥିବା ଲକ୍ଷାଧିକ ଗ୍ରାହକ କେହି ମଧ୍ୟ ଆହତ ହୋଇନାହାନ୍ତି। ଦକ୍ଷ ପ୍ରଶିକ୍ଷକମାନେ ବେଶ୍ ସତର୍କତାର ସହ ଗ୍ରାହକଙ୍କୁ ଏହି ଛୁରି ମାଲିସର ସେବା ଦେଇଥାନ୍ତି। ତ୍ବଚାରେ ଚମକ ଆଣିବା ସହ ଶରୀରର ଆଣ୍ଠୁଗଣ୍ଠି ବିନ୍ଧା ଯନ୍ତ୍ରଣା ମଧ୍ୟ ଏହି ଛୁରୀ ମାଲିସରେ ଉପଶମ ହେଉଥିବାର ପ୍ରକାଶ।
