ରାଞ୍ଚି : ଝାଡଖଣ୍ଡର ଗରହ୍ୱା ଜିଲା ବୁଢ଼ାପାହାଡ ଅଞ୍ଚଳରେ ମଙ୍ଗଳବାର ସନ୍ଧ୍ୟାରେ ମାଓବାଦୀଙ୍କ ଲ୍ୟାଣ୍ଡମାଇନ ବିସ୍ଫୋରଣରେ ୬ଜଣ ସୁରକ୍ଷାକର୍ମୀ ସହିଦ ହେବା ସହ ୧୦ଜଣ ଆହତ ହୋଇଛନ୍ତି। ନିହତ ସୁରକ୍ଷାକର୍ମୀମାନେ ଜାଗୁଆର ବାହିନୀର ବୋଲି ଜଣାଯାଇଛି।
ଘଟଣାସ୍ଥଳରେ କୋବ୍ରା, ସିଆର୍ପିଏଫ୍ ଓ ପୁଲିସ ବାହିନୀ ପହଞ୍ଚି ତଲାସ ଅଭିଯାନ ଆରମ୍ଭ କରିଛନ୍ତି। ରିପୋର୍ଟ ଅନୁଯାୟୀ ଲ୍ୟାଣ୍ଡମାଇନ ବିସ୍ଫୋରଣରେ ୪ଜଣ ଯବାନ ସହିଦ ହୋଇଥିବାବେଳେ ଅନ୍ୟ ଦୁଇ ଜଣ ମାଓବାଦୀଙ୍କ ସହ ଗୁଳିବିନିମୟରେ ସହିଦ ହୋଇଛନ୍ତି। ଡିଆଇଜି ବିପୁଳ ଶୁକ୍ଳାଙ୍କ କହିବା ଅନୁଯାୟୀ ଗରହ୍ୱା ଜିଲାର ଚିଞ୍ଜୋ ଅଞ୍ଚଳରେ ମାଓବାଦୀଙ୍କ ଉପସ୍ଥିତି ସମ୍ପର୍କରେ ସୂଚନା ମିଳିବା ପରେ ଅଭିଯାନ ନିମନ୍ତେ ସୁରକ୍ଷାକର୍ମୀଙ୍କୁ ପଠାଯାଇଥିଲା। ଏହି ସମୟରେ ନକ୍ସଲମାନେ ଲ୍ୟାଣ୍ଡମାଇନ ବିସ୍ଫୋରଣ ଘଟାଇଥିଲେ। ରିପୋର୍ଟ ଲେଖାହେବା ବେଳକୁ ଘଟଣାସ୍ଥଳରେ ଗୁଳିବିନିମୟ ଜାରି ରହିଥିଲା।
