ରେଙ୍ଗାଲି: ଘରେ ବସି ଜିନିଷ କିଣିବା ଲାଗି ସମସ୍ତେ ଅନ୍ ଲାଇନ୍ ଶପିଂକୁ ପସନ୍ଦ କରୁଛନ୍ତି। ଏହାର ସୁଯୋଗରେ ସାଇବର ଠକ ବି ଫାଇଦା ଉଠାଇ ଲୋକଙ୍କଠାରୁ ଟଙ୍କା ଠକି ନେଇଯାଉଛନ୍ତି। ଏଭଳି ସାଇବର ଠକେଇର ଶିକାର ହୋଇଛନ୍ତି ସମ୍ବଲପୁର ଜିଲ୍ଲା ଠେଲକୋଲୋଇ ଅଞ୍ଚଳର ମିତିଳେଶ ସା ନାମକ ଜନୈକ ଦହିବରା ଓ ଲିଟି ଚୋଖା ବିକାଳି। ଠକେଇର ଶିକାର ହେବା ପରେ ମିତିଲେଶ ଆଜି ଠେଲକୋଲୋଇ ଥାନାରେ ଫେରାଦ୍ ହୋଇଛନ୍ତି।
ସୂଚନାରୁ ପ୍ରକାଶ ଯେ, ମିତିଳେଶ ଫ୍ଲିପକାର୍ଟରେ ୨୫ଶହ ଟଙ୍କା ମୂଲ୍ୟର ହୋମ୍ ଥିଏଟର୍ ମଗାଇଥିଲେ। ଡେଲିଭେରି ବଏ ଆସି ମିତିଳେଶଙ୍କୁ ହୋମ୍ ଥିଏଟର୍ ଦେଇଥିଲା। ହୋମ୍ ଥିଏଟର୍ ପସନ୍ଦ ନ ହେବାରୁ ମିତିଳେଶ ଅର୍ଡର କ୍ୟାନସେଲ୍ କରିଥିଲେ। ଏହାପରେ ଦୀର୍ଘ ଦିନ ଧରି ଫ୍ଲିପକାର୍ଟ କମ୍ପାନୀ ମିତିଳେଶଠାରୁ ହୋମ୍ ଥିଏଟର ଫେରସ୍ତ ନେଲା ନାହିଁ। ଫଳରେ ମିତିଳେଶ ଗୁଗୁଲରେ ଫ୍ଲିପକାର୍ଟ କମ୍ପାନୀର କଷ୍ଟମର କେୟାର ନମ୍ବର ସର୍ଚ୍ଚ କରିଥିଲେ। ସେଥରୁ ଏକ ନମ୍ବର ମିଳିବା ପରେ ସେଥିରେ ଫୋନ୍ କରି ହୋମ୍ ଥିଏଟର ଫେରାଇ ନେଇ ଟଙ୍କା ଫେରସ୍ତ ଦେବାକୁ କହିଥିଲେ। ଉକ୍ତ କଷ୍ଟମର କେୟାର ନମ୍ବରରେ କଥା ହେଉଥିବା ବ୍ୟକ୍ତି କୌଶଳ କରି ମିତିଳେଶର ଆକାଉଣ୍ଟ ନମ୍ବର ମାଗି ନେଇ ମିତିଳେଶଙ୍କ ଆକାଉଣ୍ଟରୁ ୯୪ ହଜାର ଟଙ୍କା ଠକି ନେଇ ଥିବା ଥାନାରେ ଅଭିଯୋଗ ହୋଇଛି।
ଏ ସଂକ୍ରାନ୍ତରେ ଠେଲକୋଲୋଇ ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି ବୋଲି ଆଇଆଇସି ବୁଲୁ ସ୍ବାଇଁ ସୂଚନା ଦେଇଛନ୍ତି। ସାଇବର ଠକେଇର ଶିକାର ହୋଇଥିବା ମିତିଳେଶ ବିହାରର ମୂଳ ବାସିନ୍ଦା। ଗତ ୫ବର୍ଷ ହେଲା ସେ ଠେଲକୋଲୋଇରେ ଦହିବରା ଓ ଲିଟି ଚୋଖା ବିକି ପରିବାର ପ୍ରତିପୋଷଣ କରୁଛନ୍ତି।
