ମେଲବର୍ଣ୍ଣ: କିଛି ଲୋକ ନିଜ ପ୍ରିୟ ଜିନିଷ ପାଇଁ କିଛି ବି କରିପାରନ୍ତି ଏବଂ ଯେକୌଣସି ପଦକ୍ଷେପ ନେଇପାରନ୍ତି। ଏହି କଥାକୁ ସତ ପ୍ରମାଣିତ କରିଛନ୍ତି ଅଷ୍ଟ୍ରେଲିଆର ଜଣେ ବ୍ୟକ୍ତି।ବିଶ୍ୱରେ ଏବେ କରୋନା ମହାମାରୀ ପାଇଁ ସବୁ କିଛି ଠପ୍ ହୋଇଯାଇଥିବା ବେଳେ ଅଷ୍ଟ୍ରେଲିଆ ମେଲବର୍ନର ଜଣେ ବ୍ୟକ୍ତି ନିଜର ପ୍ରିୟ ବଟର ଚିକେନ ଖାଇବା ପାଇଁ ଏମିତି କିଛି କରିଛନ୍ତି ଯାହା ଆପଣଙ୍କୁ ଆଶ୍ଚର୍ୟ୍ୟ କରିଦେବ । ଏଠାକାର ଜଣେ ବ୍ୟକ୍ତି ବଟର ଚିକେନ ଖାଇବା ପାଇଁ ୩୨ କିଲୋମିଟର ଦୂରକୁ ପଳାଇଥିଲେ। କେବଳ ସେତିକି ନୁହେଁ ବଟର ଚିକେନ ପାଇଁ ତାଙ୍କୁ ଦେବାକୁ ପଡ଼ିଲା ୧ ଲକ୍ଷ ୨୩ ହଜାର ଟଙ୍କା।
ସୂଚନା ଅନୁସାରେ, ଏହି ବ୍ୟକ୍ତି ପରଫେକ୍ଟ ବଟର ଚିକେନ ଖାଇବା ପାଇଁ ମେଲବର୍ନର ସିବିଡ଼ିରୁ ୩୦ କିଲୋମିଟର ଦକ୍ଷିଣ ପଶ୍ଚିମରେ ଅବସ୍ଥିତ ବେର୍ବିଏରୁ ଯାତ୍ରା ଆରମ୍ଭ କରିଥିଲେ । ମାତ୍ର ସେହି ସ୍ଥାନରେ ଲକଡାଉନ ଜାରି କରାଯାଇଥିଲା । ତେଣୁ ନିୟମ ଉଲ୍ଲଂଘନ କରି ସେଠାକୁ ଯାଇଥିବାରୁ ତାଙ୍କୁ ଜୋରିମାନା ଦେବାକୁ ପଡ଼ିଥିଲା। ମିଳିଥିବା ଖବର ଅନୁସାରେ, ଉକ୍ତ ବ୍ୟକ୍ତି ୧୬୫୨ ଡଲାର ଅର୍ଥାତ୍ ପ୍ରାୟ ୧ ଲକ୍ଷ ୨୩ ହଜାର ଟଙ୍କା ଜୋରିମାନା ଦେଇଛନ୍ତି। ଏତେ ଟଙ୍କା ଦେଇ ବଟର ଚିକେନ ଖାଇବା ନିଶ୍ଚିତ ରୂପେ ଏକ ଆଶ୍ଚର୍ଯ୍ୟକର କଥା।
ପୁଲିସ କହିବା ଅନୁଯାୟୀ, ଚଳିତ ସପ୍ତାହରେ ୭୪ ଜଣଙ୍କଠାରୁ ଜୋରିମାନା ଆଦାୟ କରାଯାଇଛି। ଏହି ବ୍ୟକ୍ତିଙ୍କ ପରି ସେମାନେ ମଧ୍ୟ ଲକଡାଉନ ନିୟମ ଉଲ୍ଲଂଘନ କରିଥିଲେ।
ସୂଚନାଯୋଗ୍ୟ, ଅଷ୍ଟ୍ରେଲିଆରେ ମଧ୍ୟ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଗତ ସପ୍ତାହରେ ସେଠାରେ ପୁଣିଥରେ ନୂଆ ଲକଡାଉନ ଜାରି କରାଯାଇଛି । ଲୋକମାନେ କେବଳ ଅତ୍ୟନ୍ତ ଜରୁରୀ କାମରେ ବାହାରକୁ ବାହାରୁଛନ୍ତି । ଅନ୍ୟ କାରଣରେ ଘରୁ ବାହାରିବା ମାତ୍ରେ ସେମାନଙ୍କଠାରୁ ଜୋରିମାନା ଆଦାୟ କରାଯାଉଛି।
