ନୂଆଦିଲ୍ଲୀ : ଲୋକସଭା ନିର୍ବାଚନର ଦୁଇ ଦିନ ପୂର୍ବରୁ ସାମାଜିକ ଗଣମାଧ୍ୟମରେ ରୋକ ଲଗାଯିବ। ନିର୍ବାଚନ କମିଶନ ନିର୍ବାଚନ ତାରିଖ ଘୋଷଣା ପରେ ଏହାର ନିଷ୍ପତ୍ତି ନେବେ। ଏହାର ନିଷ୍ପତ୍ତି ନିଆଗଲେ କୌଣସି ବ୍ୟକ୍ତି ନିର୍ବାଚନର ଦୁଇ ଦିନ ପୂର୍ବରୁ ସାମାଜିକ ଗଣମାଧ୍ୟମ ବ୍ୟବହାର କରିପାରିବେ ନାହିଁ। ଏ ନେଇ ନିର୍ବାଚନ କମିଶନ ଏକ କମିଟି ଗଠନ କରିଛନ୍ତି। ଏହି କମିଟି ୧୯୫୧ ଧାରା ୧୨୬ ଅନୁସାରେ ସାମାଜିକ ଗଣମାଧ୍ୟମ ଫେସବୁକ, ହ୍ୱାଟ୍ସଆପ, ଟୁଇଟରରେ ନିର୍ବାଚନ ସମ୍ପର୍କିତ କୌଣସି ଖବର ଦୁଇ ଦିନ ପୂର୍ବରୁ ବନ୍ଦ କରିବା ଦରକାର ବୋଲି ମତ ଦେଇଥିଲେ।
ବରିଷ୍ଠ ଉପ ନିର୍ବାଚନ ଆୟୁକ୍ତ ଉମେଶ ସିଂହାଙ୍କ ଅଧ୍ୟକ୍ଷତାରେ ଏହି କମିଟି ଗଠନ କରାଯାଇଥିଲା। ଦୁଇଦିନ ପୂର୍ବରୁ ଭୋଟର ନିଜେ ଚିନ୍ତାକରି ନିଜର ଜନପ୍ରତିନିଧି ଚୟନ କରିବା ଦରକାର ବୋଲି କମିଟି କହିଛି। ଏହି ନିଷ୍ପତ୍ତି ପାଇଁ ନିର୍ବାଚନ ଆୟୋଗ ସହ ବିଧି ଆୟୋଗ ଏକମତ ହୋଇଛି। କାରଣ ନିର୍ବାଚନ ପୂର୍ବରୁ ବିଭିନ୍ନ ରାଜନୈତିକ ଦଳଙ୍କ ମିଛ ପ୍ରଚାର ଲୋକଙ୍କ ମାନସିକତା ଉପରେ ପ୍ରଭାବ ପକାଇଥାଏ ବୋଲି ଜଣାପଡିଛି।
