ବରଗଡ଼ : ଗୁରୁବାର ବିଶ୍ବ ପ୍ରସିଦ୍ଧ ବରଗଡ ଧନୁଯାତ୍ରାର ଶେଷ ଦିନ। ଶ୍ରୀକୃଷ୍ଣଙ୍କ ହାତରେ ବଧ ହେବେ ମହାରାଜ କଂସ। କୃଷ୍ଣ ବଳରାମଙ୍କ ମଥୁରା ଭ୍ରମଣ, କୁବଳୟା ବଧ, ଅଷ୍ଟମଲ୍ଲ ବଧ, ଶିବଧନୁ ଭଗ୍ନ, କଂସ ବଧ ଏବଂ ପରିଶେଷରେ ଉଗ୍ରସେନଙ୍କ ରାଜ୍ୟାଭିଷେକ ଦୃଶ୍ୟ ଅଭିନୀତ ହେବ । ମହାରାଜ କଂସଙ୍କ ଅତ୍ୟାଚାରରୁ ମୁକ୍ତ ହେବେ ମଥୁରାବାସୀ । ଦୀର୍ଘ ୧୧ ଦିନ ଧରି ଯାତ୍ରା ଚାଲିଥିବାବେଳେ ଗୁରୁବାର ଏହାର ଯବନୀକା ପଡିବ । ବୁଧବାର ଦଶମ ଦିନରେ ମଥୁରାରେ କୃଷ୍ଣ ବଳରାମ ପହଞ୍ଚିଥିଲେ । ପ୍ରଭୁଙ୍କୁ ଦର୍ଶନ କରିବା ଲାଗି ବରଗଡରେ ପ୍ରବଳ ଜନସମାଗମ ହୋଇଥିଲା । ଦଶମ ଦିନରେ ନଗର ଭ୍ରମଣ ସହ ମହାରାଜ କଂସ ରଙ୍ଗ ମହଲରେ ଗୀତ ନାଚର ମଜା ଉଠାଇଥିଲେ। ଏହାପରେ କଂସ ରାତିରେ ଶୋଇଥିବାବେଳେ ସ୍ବପ୍ନରେ କୃଷ୍ଣ ଭଗବାନଙ୍କୁ ଦେଖି ବ୍ୟତିବ୍ୟସ୍ତ ହୋଇପଡିଥିଲେ। କିନ୍ତୁ ପରେ ମନ୍ତ୍ରୀ ଏବଂ ସେନାପତିମାନେ ମହାରାଜାଙ୍କୁ ଆଶ୍ବସ୍ତି ଦେଇଥିଲେ। ଗୁରୁବାର ଶେଷ ଦିନରେ କଂସାସୁର ବଧ ଦେଖିବାକୁ ପ୍ରବଳ ଭିଡ ଜମିବା ନେଇ ଆଶା କରାଯାଉଛି।
Comments are closed.