ଲାଞ୍ଜିଗଡ:ଉଭୟ କେନ୍ଦ୍ର ଓ ରାଜ୍ୟ ସରକାର ବିକାଶର ଡିଣ୍ଡିମ ପିଟି ଚାଲିଥିବା ବେଳେ ଲାଞ୍ଜିଗଡ ବ୍ଲକ ରେ ଥିବା ଗ୍ରାମାଞ୍ଚଳରେ ସରକାରଙ୍କ ବିକାଶ ବାରିହୋଇ ପଡୁଛି । ସରକାର ଗ୍ରାମାଞ୍ଚଳର ବିକାଶ ପାଇଁ ଅନେକ ଯୋଜନା କରି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ହେଲେ ପ୍ରଶାସନିକ ଅଧିକାରୀଙ୍କ ଇଛା ଶକ୍ତିର ଅଭାବ ଯୋଗୁଁ ଏହି ଯୋଜନା ସବୁ ବାଟବଣା ହେବାରେ ଲାଗିଛି ।ଲାଞ୍ଜିଗଡ ବ୍ଳକରେ ଅନେକ ଗାଁ ଅଛି ଯେଉଁ ଗାଁରେ କି ଏ ପର୍ଯ୍ୟନ୍ତ ବିକାଶର ଛିଟା ମଧ୍ୟ ବାଜିନାହିଁ। ଲୋକେ ସରକାରଙ୍କ ମୌଳିକ ଅଧିକାର ରୁ ବଞ୍ôଚତ ହୋଇ ରହିଛନ୍ତି ।ଏଭଳି ଗାଁ ହେଉଛି ଲାଞ୍ଜିଗଡ ବ୍ଲକ ମହକୁମାରୁ ଦୁଇ କିଲୋମିଟର ଦୂରରେ ଥିବା ସୀତାପୁର ଗାଁ । ଏହି ଗାଁରେ ଦୁଇଶହରୁ ଉର୍ଦ୍ଧ ପରିବାର ରହୁଥିବା ବେଳେ ଏହି ଗାଁରେ ମୁଖ୍ୟ ସମସ୍ୟା ହେଲା ରାସ୍ତା । ଗାଁ ବସ୍ତି ଠାରୁ ନାଉରିପଡା ଓ ନାଉରିପଡ଼ା ଠାରୁ ଡୋଳାପଡା ପର୍ଯ୍ୟନ୍ତ ଅଳ୍ପ ବର୍ଷା ହେଲେ ଘରୁ ବାହାରକୁ ବାହାରିବା ମୁସ୍କିଲ ହୋଇପଡୁଛି ।ରାସ୍ତାରେ ଆଣ୍ଠୁଏ କାଦୁଅ ।
ଏହି ରାସ୍ତା ଦେଇ ଭୋରପଡା, ମାଳିପଡା, ଜାମକେଜୁ ପ୍ରମୁଖ ଗାଁ ଲୋକେ ଯିବା ଆସିବା କରିଥାନ୍ତି । ରାସ୍ତା ଖରାପ ଯୋଗୁଁ ଆଣ୍ଠୁଏ କାଦୁଅରେ ସ୍କୁଲ ଛାତ୍ର ଛାତ୍ରୀ ଯିବା ଆସିବା କରୁଛନ୍ତି । ଏହି ରାସ୍ତା ନିର୍ମାଣ ପାଇଁ ଗ୍ରାମବାସୀ ପଞ୍ଚାୟତ କର୍ତ୍ତୃପକ୍ଷଙ୍କ ଠାରୁ ବ୍ଲକ ପ୍ରଶାସନ ଓ ଜିଲ୍ଲାପାଳ ଅଭିଯୋଗ ଶୁଣାଣୀରେ ମଧ୍ୟ ଅନେକ ଥର ଅଭିଯୋଗ କରିଛନ୍ତି ହେଲେ ସବୁ ଦେଖି ଶୁଣି ନିରବଦ୍ରଷ୍ଟା ସାଜିଛି ପ୍ରଶାସନ ।ଏହି ରାସ୍ତାକୁ ନେଇ ଅଞ୍ଚଳରେ ଅସନ୍ତୋଷର ବାତାବରଣ ଦେଖାଦେଇଥିବା ବେଳେ ଆଗାମୀ ଦିନରେ ଏକ ବିରାଟ ଆନ୍ଦୋଳନ ହେବାର ଆଶଙ୍କା କରାଯାଉଛି । ରାସ୍ତା ନିର୍ମାଣ ନହେଲେ ଆଗାମୀ ନିର୍ବାଚନରେ ଭୋଟ ବର୍ଜନ କରାଯିବ ବୋଲି ସୀତାକାନ୍ତ ଦୋରା,ଧନେଶ୍ୱର ଦୋରା ପ୍ରମୁଖ ଚେତାବନୀ ଦେଇଛନ୍ତି । ଏ ସମ୍ପର୍କରେ ବିଶ୍ୱନାଥପୁର ପଞ୍ଚାୟତ ନିର୍ବାହୀ ଅଧିକାରୀ ବେଣୁଧର କନ୍ଧପାନଙ୍କୁ ପଚାରିବାରୁ ମନରେଗା ଯୋଜନାରେ ୫ଲକ୍ଷ ଟଙ୍କା ମଞ୍ଜୁର କରାଯାଇଛି ବର୍ଷା ପରେ କାମ ଅରମ୍ଭ ହେବ ବୋଲି ପ୍ରକାଶ କରିଛନ୍ତି।
