ହରଭଙ୍ଗା : ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ସମ୍ପୋଚ ପଂଚାୟତର ତିତିରିକଟାଠାରେ ଥିବା ବିଡିପିଏଲ କମ୍ପାନୀରେ ଗୁରୁବାର ଶ୍ରମିକ ଉତ୍ତେଜନା ଦେଖିବାକୁ ମିଳିଛି। କମ୍ପାନୀରେ କାର୍ଯ୍ୟରତ ଶହେରୁ ଅଧିକ ଶ୍ରମିକମାନଙ୍କୁ ଅଧିକ ସମୟ ଖଟାଇବା ସହିତ ଛୁଟି ଦିଆଯାଉ ନାହିଁ। ଏପରିକି ଅଧିକ ସମୟ କାମର ପାଉଣା ମିଳୁନଥିବା ଅଭିଯୋଗରେ ଗୁରୁବାର କମ୍ପାନୀ ମୁଖ୍ୟ ଫାଟକ ସମ୍ମୁଖରେ ୨ଶହରୁ ଅଧିକ ଶ୍ରମିକ ଧାରଣାରେ ବସି ଏହାର ପ୍ରତିବାଦ କରିଥିଲେ। ପ୍ରକାଶ ଯେ ବିଡିପିଏଲ କମ୍ପାନୀରେ ଜେନା ଆସୋସିଏସଟସ ,ସାଈ ଶିବମ୍ ଏବଂ ଏମଆର ଭଳି ତିନୋଟି ଆଉଟସୋର୍ସିଂ କମ୍ପାନୀ ଜରିଆରେ ବିଡିପିଏଲରେ ଦୁଇଶହରୁ ଅଧିକ ଶ୍ରମିକ ୫ବର୍ଷ ହେଲା କାର୍ଯ୍ୟରତ ଅଛନ୍ତି। ଗାଈଦାନା ବସ୍ତା ପ୍ୟାକିଂ କାର୍ଯ୍ୟରେ ନିୟୋଜିତଥିବା ଶ୍ରମିକଙ୍କୁ ଆଗରୁ ୪୦କେଜି ଗାଈଦାନା ବସ୍ତା ପ୍ୟାକିଂ କାର୍ଯ୍ୟ କରୁଥିବାବେଳେ ବର୍ତମାନ ଏହା ୫୫କେଜିରେ ପଂହଚିଛି । ଯଦ୍ୱାରା ବସ୍ତା ଟେକିବା ଏବଂ ୧୨ଧାଡି ଉଚ୍ଚାରେ ବସ୍ତା ଥାକେଇବା ପାଇଁ ଶ୍ରମିକମାନଙ୍କୁ ଅଧିକ ପରିଶ୍ରମ ଏବଂ କଷ୍ଟ ସହିବାକୁ ପଡୁଛି। ଏପରିକି ସପ୍ତାହକୁ ଛୁଟି ମିଳୁନ ଥିବାବେଳେ ଅଧିକ କାମ ବାବଦରେ ଅର୍ଥ ମିଳୁନଥିବା ଶ୍ରମିକଙ୍କ ପକ୍ଷରୁ ଅଭିଯୋଗ ଉଠୁଛି । ଏହା ସହିତ ଇନକ୍ରିମେଣ୍ଟ ମଧ୍ୟ ଦିଆଯାଉନଥିବା ଶ୍ରମିକମାନଙ୍କ ପକ୍ଷରୁ ଅଭିଯୋଗ ଉଠୁଛି । ଏହାର ପ୍ରତିବାଦ କଲେ କମ୍ପାନୀରୁ ବାହାରିଯିବା ପାଇଁ ଧମକ ଦିଆଯାଉଛି। ଏଭଳି ଘଟଣାକୁ ନେଇ ଆଜି ଶ୍ରମିକମାନଙ୍କ ପକ୍ଷରୁ ଉତେଜନା ପ୍ରକାଶ ପାଇବା ସହିତ ମୁଖ୍ୟଫାଟକ ସମ୍ମୁଖରେ ସମସ୍ତେ ଆଜି ଧାରଣାରେ ବସି ରହିଥିଲେ। ଖବରପାଇ ବୌଦ୍ଧ ପୁଲିସ ଓ କମ୍ପାନୀ ସିଇଓ ଘଟଣାସ୍ଥଳରେ ପହଞ୍ଚି ବୁଝାସୁଝା ପରେ ମଧ୍ୟ କୌଣସି ନିଷ୍କର୍ଷ ବାହାରି ନପାରିବାରୁ ଧାରଣା ଜାରି ରହିଥିଲା। ଏହି କମ୍ପାନୀରେ ଜିଲ୍ଲାର ଅନେକ ଶ୍ରମିକ କାର୍ଯ୍ୟରତ ଥିବା ଜଣା ପଡିଛି । କମ୍ପାନୀର ଶ୍ରମିକ ମାରଣନୀତି ଅଭିଯୋଗ ଉପରେ ବୌଦ୍ଧ ଶ୍ରମ ଅଧିକାରୀ ସ୍ୱତନ୍ତ୍ର ଦୃଷ୍ଟିଦେବାକୁ ଦାବୀ ଉଠୁଛି।
Popular Categories
Previous article
Next article