ସମାଜ ଡିଜିଟାଲ ଡେସ୍କ: କୋରାପୁଟ ବସ୍ ଦୁର୍ଘଟଣାର ୧୬ ଆହତଙ୍କୁ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି। ରବିବାର ବିଳମ୍ବିତ ରାତିରେ ଆହତମାନେ ଏସସିବିରେ ଭର୍ତ୍ତି ହୋଇଛନ୍ତି। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ଗୁରୁତର ରହିଛି। ଅର୍ଥୋପେଡିକ ବିଭାଗରେ ସେମାନଙ୍କ ଚିକିତ୍ସା ଚାଲିଛି। ସ୍ୱତନ୍ତ୍ର ଡାକ୍ତରୀ ଟିମ୍ ସେମାନଙ୍କ ଚିକିତ୍ସା କରୁଛନ୍ତି। ବର୍ତ୍ତମାନ ତିନି ଜଣ ଆହତଙ୍କୁ ଆଶୁ ଚିକିତ୍ସା ଯୋଗାଇ ଦିଆଯାଇ ଡିସଚାର୍ଜ କରାଯାଇଛି। ଅନ୍ୟମାନେ ମଧ୍ୟ ବିପଦମୁକ୍ତ ରହିଥିବା କହିଛନ୍ତି ଏସସିବି କୁଳସଚିବ ଡ. ଅବିନାଶ ରାଉତ।
ରବିବାର କୋରାପୁଟ ଜିଲା ଗୁପ୍ତେଶ୍ୱର ପାଖ ସୁକୁନାଳ ପାଖରେ ବସ୍ ଓଲଟିବା ପରେ ୪ ଜଣଙ୍କ ମୃତ୍ୟ ଘଟିଥିଲା। ଏହାବ୍ୟତୀତ ବସ୍ର ସମସ୍ତ ଯାତ୍ରୀ ଆହତ ହୋଇଥିଲେ। ଗତ ୨୭ ତାରିଖରୁ ପିକନିକ ବସ୍ଟି କଟକରୁ ଯାଇଥିଲା। ୨୮ ତାରିଖରେ ଷ୍ଟ୍ରାଇକ ଯୋଗୁଁ ଭବାନୀପାଟଣାରେ ବସ୍ଟି ରହିଥିଲା। କିନ୍ତୁ ଗତକାଲି ସକାଳୁ ବସ୍ଟି ଘାଟିରୁ ଖସିବା ପରେ ରାସ୍ତା ପାର୍ଶ୍ବକୁ ଓଲଟି ପଡ଼ିଥିଲା। ବସ୍ରେ ୨ ଜଣ ଚାଳକ ଥିବାସତ୍ବେ ଏଭଳି ଘଟଣା ଘଟିବା ସମସ୍ତଙ୍କୁ ଚକିତ କରିଛି। ବସ୍ଟି ହଠାତ ଭାରସାମ୍ୟ ହରାଇ ଗୁପ୍ତେଶ୍ୱର ପାଖ ସୁକୁନାଳ ପାଖରେ ଓଲଟିବା ଘଟଣାରେ ନିଶ୍ଚୟ ରୂପେ ଚାଳକ ହିଁ ଦାୟୀ ବୋଲି ଅଭିଯୋଗ କରିଛନ୍ତି ଆହତଙ୍କ ପରିବାର। ସୂଚନା ଅନୁଯାୟୀ, କଟକ ଅଲିଶାବଜାର, ନିଆଳି ଓ ନିମାପଡ଼ା ଅଞ୍ଚଳର କିଛି ଲୋକଙ୍କୁ ନେଇ କୋରାପୁଟ ଗୁପ୍ତେଶ୍ବର ଶୈବପୀଠକୁ ଦର୍ଶନ ପାଇଁ ଯାଉଥିଲା ଏହି ବସ୍। ଏଥିରେ ପାଖାପାଖି ୫୦ ଯାତ୍ରୀ ରହିଥିଲେ। ଆହତଙ୍କ ମଧ୍ୟରେ ଅନେକ ଶିଶୁ, ବୃଦ୍ଧା ଓ ମହିଳା ମଧ୍ୟ ଅଛନ୍ତି।
Comments are closed.