କୋମନା: କୋମନା ପୁଲିସକୁ ମାଡ଼ମାରି ଥାନା ଗାଡ଼ି ଭଙ୍ଗାରୁଜୁ ଘଟଣାର ମୁଖ୍ୟ ଅଭିଯୁକ୍ତ ମନୋଜ ସାହୁକୁ ସୁନାବେଡ଼ା ଜଙ୍ଗଲରୁ ଗିରଫ କରାଯାଇଛି। ନୂଆପଡ଼ା ଜିଲା କୋମନା ଥାନା ବରକୋଟ ଗାଁରେ ମେ’ ୩୦ ତାରିଖରେ ବିଦ୍ୟୁତ ବିଭ୍ରାଟକୁ କେନ୍ଦ୍ରକରି ବିଭାଗ କର୍ମଚାରୀଙ୍କୁ ଦିନ ଦି’ ପହରେ ଗାଁ ଦାଣ୍ଡରେ ୪ ଘଣ୍ଟା କାଳ ଅଟକ ରଖାଯାଇଥିଲା। ଏହି ଘଟଣାରେ ବିଦ୍ୟୁତ ବିଭାଗ ପକ୍ଷରୁ କୋମନା ଥାନାରେ ଏତଲା ଦିଆଯାଇଥିଲା।
ଏହି ଘଟଣାର ମୁଖ୍ୟ ଅଭିଯୁକ୍ତ ମନୋଜ ସାହୁକୁ ଗିରଫ କରିବାକୁ କୋମନା ଥାନା ଏସ୍ଆଇ ବିଷ୍ଣୁପ୍ରସାଦ ସାହୁଙ୍କ ନେତୃତ୍ୱରେ ପୁଲିସ ଦଳ ଶୁକ୍ରବାର ରାତିରେ ବରକୋଟକୁ ଯାଇଥିଲେ। ପୁଲିସ ଅଶୋକକୁ ଗିରଫ କରି ଆଣୁଥିବାବେଳେ ପରିବାର ଲୋକେ ଠେଙ୍ଗା ବାଡ଼ି ଧରି ପୁଲିସ ଉପରେ ସଂଘବଦ୍ଧ ଆକ୍ରମଣ କରିଥିଲେ। ପରିବାର ଲୋକେ ଅଶୋକକୁ ଛଡ଼ାଇ ନେବା ସହିତ କର୍ତ୍ତବ୍ୟରତ ପୁଲିସ ଅଧିକାରୀ ଓ କର୍ମଚାରୀଙ୍କୁ ମାଡ଼ମାରି ଲହୁଲୁହାଣ କରି ପକାଇଥିଲେ।
ପୁଲିସ ଗାଡ଼ିକୁ ଭଙ୍ଗାରୁଜା କରିଥିଲେ। ଉତ୍ତ୍ୟକ୍ତ ଲୋକଙ୍କ ମାଡ଼ରେ ୨ ପୁଲିସ ଅଧିକାରୀଙ୍କ ସହିତ ୮ ଜଣ ପୁଲିସ କର୍ମଚାରୀ ଆହତ ହୋଇଥିଲେ। ଏହି ଘଟଣାରେ ୧୭ ଜଣଙ୍କ ନାମରେ ଥାନାରେ ମାମଲା ରୁଜୁ ହୋଇଥିଲା। ଆକ୍ରମଣକାରୀମାନେ ଫେରାର ଥିବାବେଳେ ପୁଲିସ ୩ ଜଣ ମହିଳାଙ୍କୁ କୋମନା ଥାନାକୁ ଆଣି ପଚରାଉଚରା କଲାପରେ ବ୍ୟକ୍ତିଗତ ମୁଚାଲିକାରେ ଛାଡ଼ିଥିଲା। ଆଜି ମାଓପ୍ରବଣ ସୁନାବେଡ଼ା ଅଭୟାରଣ୍ୟରେ ଏକ ପାହାଡ଼ରେ ଲୁଚିଥିବା ମୁଖ୍ୟ ଅଭିଯୁକ୍ତ ମନୋଜ ସାହୁକୁ କୋମନା ପୁଲିସ ଗିରଫ କରିଛି । ସୂଚନାଯୋଗ୍ୟ ଯେ ଏହି ଅଭିଯୁକ୍ତ ପୂର୍ବରୁ ମଧ୍ୟ ବନ ବିଭାଗ କର୍ମଚାରୀଙ୍କୁ ମାଡ଼ ମାରିଥିବା ଅଭିଯୋଗ ହେଉଛି। ଅନ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି କୋମନା ପୁଲିସ କହିଛି।
